Ambasada e SHBA-së në Tiranë ka vlerësuar aktin e dorëheqjes së Lulzim Bashës nga posti i kryetarit të Partisë Demokratike.
Ambasada e SHBA-së përmes një deklarate thekson se, shpreson që ky vendim të përcaktojë rrugën që PD të ecë përpara drejt së ardhmes.
“Vënia e interesave të partisë dhe të vendit mbi ato personale është shenjë e udhëheqësisë së vërtetë. Shpresojmë që vendimi do të përcaktojë rrugën që Partia Demokratike të ecë përpara drejt së ardhmes; do të forcojë marrëdhënien e veçantë të Shqipërisë me Shtetet e Bashkuara; do të përforcojë mbështetjen për reformat dhe përpjekjet e tjera për qëllimin e Shqipërisë për t’iu bashkuar Bashkimit Evropian dhe do të ritheksojë parimet dhe idealet demokratike mbi të cilat u themelua. Një opozitë e fortë që mund të jetë e gatshme për të udhëhequr është thelbësore për demokracinë. Mbështetja e Shteteve të Bashkuara për demokracinë dhe përkushtimi për të luftuar korrupsionin dhe pandëshkueshmërinë mbeten të pandryshuara”, thuhet në deklaratën e ambasadës së SHBA-së në Tiranë.
Edhe delegacioni i BE-së në Tiranë ka reaguar duke vlerësuar dorëheqjen e Lulzim Bashës nga detyra e kryetarit të Partisë Demokratike.
Delegacioni i BE-së deklaron se, Shqipëria ka nevojë për një opozitë të fortë dhe se presin që lidershipi i ri të vazhdojë të mbështesë integrimin në BE.
“Ne respektojmë vendimin e Lulzim Bashës për t’u dorëhequr si Kryetar i PD-së. Si çdo demokraci tjetër, Shqipëria ka nevojë për një opozitë të fortë që i kërkon llogari qeverisë dhe e kontrollon atë. Ne presim që lidershipi i ri ta luajë këtë rol vendimtar dhe të vazhdojë të mbështesë integrimin në BE si qëllim themelor të veprimit të tij, duke nxitur reformat dhe duke mbështetur reformën në drejtësi dhe luftën kundër korrupsionit”, thuhet në deklaratën e delegacionit të BE-së.
/Argumentum.al
