Të premten u mbajtën në Budapest ceremonia e promovimit të versionit në gjuhën hungareze të vëllimit II të librit “Xi Jinping: Qeverisja e Kinës” dhe Simpoziumi për Qeverisjen e Shtetit Kinë-Hungari, ku ishin të pranishëm mbi 200 përfaqësues nga qarqe të ndryshme të të dy vendeve.
Ky vëllim, i përkthyer dhe i botuar bashkërisht nga Shtëpia Botuese e Gjuhëve të Huaja e Kinës dhe Qendra e Euroazisë e Universitetit “John von Neumann” të Hungarisë, përmban 99 vepra të presidentit kinez Xi Jinping mbi 17 tema, gjatë periudhës nga 18 gushti 2014 deri më 29 shtator 2017, duke përfshirë fjalime, biseda, artikuj dhe udhëzime.
Sandor Fazekas, nënkryetar i Parlamentit të Hungarisë, tha në ceremoni që në këtë libër paraqiten pyetjet me të cilat duhet të përballet çdo vend: si të arrihet një ekuilibër midis zhvillimit e respektimit të traditës dhe midis mbrojtjes së sovranitetit kombëtar e marrjes së përgjegjësisë ndërkombëtare.
“Vizioni i presidentit Xi Jinping për të ndërtuar një bashkësi me të ardhme të përbashkët të njerëzimit na kujton që sfidat e shekullit të 21-të mund të përballohen vetëm nëpërmjet bashkëpunimit ndërkombëtar,” theksoi Fazekas.
Botimi i këtij vëllimi simbolizon hapjen, mirëkuptimin dhe dialogun midis Kinës e Hungarisë dhe pasqyron miqësinë e gjatë ndërmjet të dy vendeve, shtoi ai.
Ndërsa Yu Yingfu, nënkryetar i Grupit të Komunikimeve Ndërkombëtare të Kinës, tha se libri mishëron filozofinë e vënies së popullit në qendër, konceptin e zhvillimit të hapur e me përfitime të përbashkëta, parimet e qeverisjes globale në epokën e re dhe vlerën e të mësuarit të ndërsjellë midis qytetërimeve. Ai shprehu shpresën se botimi në gjuhën hungareze i vëllimit II do të vazhdojë të ndërtojë një urë intelektuale ndërmjet qytetërimit kinez dhe qytetërimit hungarez./CGTN
