Në një konferencë me gazetarët pas punimeve në Samitin e NATO-s, të mbajtur në Madrid, Kryeministri Edi Rama deklaroi sot se instalimi i një baze navale të NATO-s në portin e ri të Durrësit do të ketë vlerë të jashtëzakonshme strategjike për Shqipërinë, por edhe për vetë NATO-n.
Në një konferencë me gazetarët pas punimeve në Samitin e NATO-s, të mbajtur në Madrid, Rama informoi mbi propozimin e bërë nga pala shqiptare për krijimin enjë baze të tillë të NATO-s në Durrës.
“Kemi folur atje për projektin tonë dhe së shpejti besoj se do të rikthehemi në Bruksel për të vazhduar diskutimin lidhur me propozimin tonë që ka ngjallur jo vetëm interes, por edhe dëshirë për të thelluar bisedimet për instalimin e një baze navale të NATO-s në portin e ri të Durrësit, që do të jetë në Porto Romano. Përveç pjesës komerciale tregtare, parashikohet të ketë edhe një pjesë ushtarake”, tha Rama.
Ai informoi se së shpejti do të bëhet edhe një takim i posaçëm për këtë çështje me gjithë ekipi shqiptar të ekspertëve dhe ata të Aleancës, për të parashtruar projektin në detaje dhe vazhduar më tutje diskutimet.
“NATO ka hyrë në një fazë të re të bashkëfinancimit edhe të projekteve të posaçme. Aktualisht po ndërtohet baza e Kuçovës, tërësisht financim i huaj, ndërkohë që për sa i përket Portit, ne do të financojmë vetë të gjithë pjesën komerciale dhe e kemi ftuar NATO-n që të marri pjesë për bashkëfinancim për pjesën ushtarake. Nëse e realizojmë do të ketë vlerë të jashtëzakonshme strategjike për Shqipërinë, por edhe për vetë NATO-n”, tha Rama.
Njëkohësisht Kryeministri Rama informoi mbi përpjekjet e bëra për të arritur në një marrëveshje që i hap rrugën çeljes zyrtare të negociatave.
Kryeministri Edi Rama deklaroi sot se Maqedonia e Veriut duhet të pranojë pa asnjë hezitim propozimin e ri francez, që është edhe i fundit, i cili i hap rrugë çeljes së negociatave për Shqipërinë dhe Maqedoninë e Veriut.
“Kam qenë gjatë gjithë kohës në kontakt me Presidentin francez, Emmanuel Macron, i cili meriton një mirënjohje dhe falënderim të madh sepse e ka ndjekur vetë personalisht për 48 orë rresht pa pushim këtë proces, edhe pas mesnate kemi shkëmbyer mesazhe”, tha Rama.
“Në këndvështrimin tim propozimi i ri, që është edhe propozimi përfundimtar, këtë duhet ta kuptojnë mirë në Maqedoninë e Veriut, është një propozim plotësisht i pranueshëm dhe qeveria, shumica, parlamenti i Maqedonisë së Veriut, duhet ta pranojë pa asnjë hezitim. Shoqëria në Maqedonia e Veriut duhet të ndihet plotësisht e lehtësuar sepse është kapërcyer një ngërç dhe janë eliminuar disa nuanca që e bënin të papranueshëm propozimin e mëparshëm”, tha Rama.
Kryeministri informoi se ka zhvilluar një bashkëbisedim konstruktiv edhe me Presidentin e Bullgarisë.
“Është shumë e qartë për të gjithë. Ne nuk kemi asnjë problem me Bullgarinë, asnjë shqetësim të asnjë natyre tjetër veç shqetësimit të krijuar nga qasja e Bullgarisë ndaj Maqedonisë së Veriut dhe pengmarrja e Maqedonisë së Veriut dhe Shqipërisë në kushtet e një procesi që mund të kishte qenë shumë më civil dhe europian nga ana e Bullgarisë. Por është një ujë që ka kaluar nën urë dhe me mbylljen e procesit të shqyrtimit nga Maqedonia e Veriut të propozimit të fundit francez, nuk ka më asnjë gjë për të shtuar për sa i përket Bullgarisë. Uroj të mos ndeshim rrugës në të ardhmen të tjera Bullgari, në forma të tjera si shprehje e deformimit të shpirtit të zgjerimit”, tha Rama
Lidhur me konferencen e parë ndërqeveritare Kryeministri Edi Rama tha thënë se për të nuk ka shumë rëndësi për sa kohë që i kanë kryer detyrat e shtëpisë, gjë që e ka treguar edhe Komisioni Europian.
“Nuk e kam ndryshuar qëndrim dhe kam po atë masë buzëqeshje që kisha edhe kur situata ishte më e ngatërruar sesa duket që është sot. Ne do bëjmë tonën, se kur caktohen datat dhe kur merren vendimet nga ana e tyre, kjo është cështje e tyre. Ajo që për mua mbetet barometri objektiv i punës sonë është po ajo që ka qenë, pikëpamja e Komisionit Europian, është një autoritet me një kompetencë shumë më të madhe se të tjerët që bëjnë kompetentin lart e poshtë për të gjykuar cfarë është arritur e cfarë jo. Përsa kohë jemi në rregull me Komisionin Europian, jam shumë i qetë se e di atë që besoj se pak shqiptarë kanë mbetur pa mësuar se dëgjojnë pak të tjerë që duan t’i cojnë në drejtim të paditur se BE është një krijesë me tekat e veta, me hallët e veta. Më vjen shumë mirë që gjithë cfarë kemi bërë, sidomos në Bruksel, së bashku me kolegët nga Ballkani Perëndimor dhe posacërisht me kryeministrin e RMV dhe presidentin e Serbisë. Tani të shohim, mund të jetë nesër, pasnesër, pas një muaji, pas 10 vitesh, kjo për mua ka shumë pak rëndësi”, tha Rama.
/Argumentum.al
