Me rastin e Ditës Kombëtare Kineze dhe në kuadrin e Javes Kulturore Kineze, në Muzeun Historik Kombëtar në Tiranë u zhvillua Ekspozita e Fotografive Historike te miqesise Kino-Shqiptare. Ky event u organizua në bashkëpunim me Ambasadën e Kinës në Shqipëri, Ministrinë e Kulturës, Bashkinë e Tiranës, në kuadër të Javës së Kulturës Kineze.
Të pranishëm në këtë event ishin edhe ish-presidenti i Republikës së Shqipërisë Ilir Meta, nënkryetarja e Bashkisë së Tiranës Keti Luarasi, ish-ministrja e Jashtme Arta Dade, diplomatë, ish-ambasadorë të Shqipërisë në Kinë, drejtoresha e institutit “Konfuci” në Universitetin e Tiranës, studiues, gazetarë dhe qytetarë të Tiranës.
Drejtori i Muzeut Historik Kombëtar, z. Dorian Koçi, e cilësoi një kënaqësi të veçantë çeljen e kësaj ekspozite me fotografi në kuadër të Javës së Kulturës Kineze në Tiranë. Sipas tij, shumë persona e gjejnë veten në fotot e paraqitura, gjatë vizitave të shumta të realizuara ndër vite gjatë miqësisë së ngushtë shqiptaro-kineze, që ka vazhduar me respektin e ndërsjellë mes dy popujve.
“Sot Kina dhe Shqipëria janë partnere të besueshme në të gjitha instrumentet e duhura ku dëgjohet zëri i të dy shteteve. Kemi pasur shpesh bashkëpunime të frytshme me Ambasadën e Kinës, për të përcjellë thesaret kulturore të përbashkëta përgjatë gjithë këtyre viteve”,- deklaroi drejtori i Muzeut Kombëtar.
Ndërsa z. Spartak Nano, kreu i Shoqatës së Miqësisë Shqipëri-Kinë, deklaroi në fjalën e tij se ambasadori i Kinës në Shqipëri ka një meritë të veçantë për nxitjen e marrëdhënieve dypalëshe me qarqet e binjakëzuara. Sipas tij, Java e aktiviteteve të Kulturës Kineze që po zhvillohet në Tiranë do t’i shërbejë akoma më shumë njohjes për artin dhe kulturën dhe lidhjet e mëtejshme të marrëdhënieve tona.
Po ashtu ai përshëndeti në mënyrë të veçantë 73 –vjetorin e themelimit të Republikës së Kinës.
“Në emër të shoqatës së Miqësisë Shqipëri-Kinë dërgojmë përshëndetjet dhe urimet tona më të sinqerta dhe miqësore stafit të ambasadës së Kinës në Shqipëri dhe nëpërmjet tyre edhe popullit vëlla kinez. Shqipëria është një nga vendet e para që lidhi marrëdhëniet diplomatike në Nëntor të vitit 1949. Në bazë të kësaj lidhjeje midis dy vendeve tona, është ngjashmëria e të kaluarës së tyre, lufta për liri e Pavarësi , si dhe unioni ideologjik i kohës ”, theksoi ndër të tjera Z. Nano.
Ambasadori i Kinës në Shqipëri, Zhou Ding, deklaroi se në vitet ’60-’70 të shekullit të kaluar Kina dhe Shqipëria shkruan së bashku një poemë të mrekullueshme miqësie. Sipas ambasadorit Zhou ajo ishte një periudhë kur dy popujt u lidhën ngushtë dhe u miqësuan me njëri-tjetrin.
Ambasadori theksoi se fotot e kësaj ekspozite fokusohen në momentet e çmuara të miqësisë kino-shqiptare dhe paraqesin pamje emocionuese të shkëmbimeve miqësore dhe tregojnë historinë prekëse mes dy popujve që tejkalojnë politikën dhe ideologjinë.
“Le të ringjallim të kaluarën e miqësisë së vendeve tona dhe të punojmë së bashku për të krijuar një të ardhme të ndritur për marrëdhëniet dypalëshe” u shpreh Ambasadori.
Pikërisht për një të ardhme më të ndritur dypalëshe, Ambasadori Zhou Ding vuri theksin te vizita e Këshilltarit të Shtetit dhe Ministri i Jashtëm i Kinës Wang Yi vitin e kaluar në Shqipëri si një një shtysë të re të zhvillimit të marrëdhënieve Kino-Shqiptare.
“Këshilltari i Shtetit dhe Ministri i Jashtëm i Kinës Wang Yi bëri një vizitë të suksesshme në Shqipëri në tetorin të vitit të kaluar, duke i dhënë një shtysë të re zhvillimit të marrëdhënieve Kino-Shqiptare. Bashkëpunimi ekonomik dhe tregtar Kino-Shqiptar gjithashtu ka përparuar, vëllimi i tregtisë dypalëshe u rrit me 26% vitin e kaluar krahasuar me periudhen te njejte, dhe eksportet e Shqipërisë në Kinë u rritën ndjeshëm me 82.8%, në gjysmën e parë të këtij viti. Aktualisht të dy vendet janë duke intensifikuar negociatat dhe nënshkrimin e marrëveshjeve të bashkëpunimit në fusha të ndryshme si: lehtësimi i shkëmbimeve të personelit, arsimi dhe turizmi. Bashkëpunimi dypalësh pragmatik ka perspektiva të gjera”, theksoi Ambasadori
Fjala e Plotë e Ambasadorit Zhou Ding me rastin e Ditës Kombëtare Kineze
Të nderuar të ftuar,
Zonja, zotërinj dhe miq,
Mirëmbrema të gjithëve! Me rastin e Ditës Kombëtare të Republikës Popullore të Kinës, jam shumë i lumtur të jem i pranishëm këtu sot, me të gjithë ju në ceremoninë e hapjes së ekspozitës së fotografive historike kino-shqiptare. Në emër të Ambasadës Kineze, dëshiroj t’ju uroj mirëseardhjen të gjithëve dhe të falënderoj përzemersisht Ministrinë e Kulturës, Bashkinë e Tiranës dhe Muzeun Historik Kombëtar për mbështetjen e madhe të ofruar.
Në vitet 60 dhe 70 të shekullit të kaluar, Kina dhe Shqipëria së bashku shkruan një poemë të mrekullueshme miqësie. Ishte një periudhë kontaktesh të shpeshta dhe të ngushta midis Kinës dhe Shqipërisë, por për më tepër ishte një periudhë kur dy popujt tanë u lidhën ngushtë e u miqësuan me njëri tjetrin. Ato vite, Kina ndihmoi Shqipërinë me më shumë se 140 projekte, që mbulonin të gjitha fushat ekonomike dhe shoqërore. Më shumë se 6,000 ekspertë dhe teknikë kinezë erdhën për të punuar në Shqipëri, duke dhënë kontribute të rëndësishme në zhvillimin ekonomik dhe shoqëror të vendit. Në të njëjtën kohë, shumë miq shqiptarë kanë shkuar në Kinën e largët dhe misterioze për të studiuar, punuar dhe vizituar .
Koha fluturon, ndjenjat e vërteta janë të përjetshme. Fotot historike të kësaj ekspozite fokusohen në momentet e çmuara të viteve të miqësisë kino-shqiptare, dhe do të paraqesin pamje emocionuese të shkëmbimeve miqësore mes dy vendeve në fusha të ndryshme, si dhe tregojnë historinë prekëse mes dy popujve që tejkalon politikën dhe ideologjinë. Sot ftuam posaçërisht Z.Dhrami, skulptorin dhe piktorin e njohur që mori pjesë në 18-vjetorin e themelimit të Republikës Popullore të Kinës në vitin 1967, për të ardhur në skenë dhe për të na sjellë albumin e tij të shkëlqyer . Ky album pasqyron atë që ai përjetoi gjatë vizitës së tij në Kinë, në vitin 1967, në formën e pikturave, skulpturave, fotove, etj. Jeni të mirëpritur ta merrni pas pak.
Kanë kaluar 55 vite nga vizita e fundit e Z.Dhrami në Kinë. Kina ashtu edhe Shqipëria kanë patur ndryshime të tyre, por miqësia mes dy vendeve është mbetur të palëkundur dhe bërë edhe më të fortë me kalimin e kohës. Pas pak ditësh do të festojmë 73-vjetorin e themelimit te Republikës Popullore të Kinës. Në vitin 2021, ekonomia e Kinës kapërceu sfida të shumta dhe pati një normë të lartë rritjeje prej 8.1%, me një vëllim të përgjithshëm ekonomik prej 17.7 trilion dollarësh. Kina do të vazhdojë të luajë rolin e saj si motori i rritjes ekonomike botërore dhe do të ofrojë mundësi të mëdha zhvillimi për të gjitha vendet në botë.
Kina ka insistuar gjithmonë një politikë të jashtme të pavarur te paqes, ka paraqitur iniciativa të zhvillimit dhe sigurisë botërore dhe ka dhënë kontribute të rëndësishme për paqen dhe prosperitetin botëror. Marrëdhëniet Kino-Shqiptare janë zhvilluar vrullshëm. Këshilltari i Shtetit dhe Ministri i Jashtëm i Kinës Wang Yi bëri një vizitë të suksesshme në Shqipëri në tetorin të vitit të kaluar, duke i dhënë një shtysë të re zhvillimit të marrëdhënieve Kino-Shqiptare. Bashkëpunimi ekonomik dhe tregtar Kino-Shqiptar gjithashtu ka përparuar, vëllimi i tregtisë dypalëshe u rrit me 26% vitin e kaluar krahasuar me periudhen te njejte, dhe eksportet e Shqipërisë në Kinë u rritën ndjeshëm me 82.8%, në gjysmën e parë të këtij viti. Aktualisht të dy vendet janë duke intensifikuar negociatat dhe nënshkrimin e marrëveshjeve të bashkëpunimit në fusha të ndryshme si: lehtësimi i shkëmbimeve të personelit, arsimi dhe turizmi. Bashkëpunimi dypalësh pragmatik ka perspektiva të gjera.
Kjo ekspozitë historike fotografike është gjithashtu një ngjarje e rëndësishme e Javës së Kulturës Kineze 2022. Festivali i Ushqimit Kinez dhe Shfaqja Muzikore e Kultures Kineze edhe do te vijne ne kete jave. Jeni të mirëpritur të merrni pjesë në serinë e aktiviteteve të Javës së Kulturës Kineze me familjarët dhe miqtë tuaj për të përjetuar bukurinë unike të kulturës kineze.
Se fundi, falënderoj sërish për mbështetjen tuaj ndaj Kinës dhe miqësisë kino-shqiptare. Le të ringjallim të kaluarën e miqësisë së vendeve tona dhe të punojmë së bashku për të krijuar një të ardhme të ndritur për marrëdhëniet dypalëshe. Ju uroj të gjithëve shëndet dhe gjithë të mirat, dhe uroj që miqësia kino-shqiptare të jetë e përjetshme!
Ju faleminderit!
/Argumentum.al
