Presidenti turk, Recep Tayyip Erdoğan, ka kritikuar mediat ndërkombëtare të cilat kohët e fundit janë përpjekur të ndikojnë në opinionin publik me artikuj për zgjedhjet e 14 majit në Türkiye, raporton Anadolu.
“Çfarë thonë të gjitha revistat në kopertinat e tyre… Erdoğan-i duhet të shkojë. Kështu thonë në Gjermani, Francë dhe Angli. Çfarë doni ju? Si i vendosni këto fjalë në kopertinat e këtyre revistave? Nuk jeni ju, Perëndimi. Është kombi im që do të vendosë për atë”, tha Erdoğan në një ngjarje në Istanbul.
Deklaratat e presidentit Erdoğan erdhën pasi revista britanike ‘The Economist’ shënjestroi presidentin turk me një kopertinë ku thuhej “Të shpëtojmë demokracinë”, “Erdoğan-i duhet të shkojë” dhe “Voto!”.
Revistat franceze ‘Le Point’ dhe ‘L’Express’ gjithashtu shfaqën kopertina kundër presidentit Erdoğan.
Më 14 maj, të dielën, në Türkiye do të zhvillohen zgjedhjet presidenciale dhe parlamentare.
Në fletën e votimit presidencial, votuesit do të zgjedhin midis Erdoğan-it, kreut të Partisë Popullore Republikane (CHP) opozitare, Kemal Kılıçdaroğlu dhe kandidatit të Aleancës ATA, Sinan Oğan, ndërsa Muharrem İnce dje u tërhoq nga gara.
– Pretendimet për ndërhyrjen e Rusisë në zgjedhjet në Türkiye
Lidhur me pretendimet e Kılıçdaroğlu-t për ndërhyrjen e Rusisë në zgjedhjet e 14 majit, Erdoğan tha se ai po tallet me Rusinë.
“(Kılıçdaroğlu tha se) Rusia po manipulon zgjedhjet në Türkiye. Turp të kesh. Nëse them ‘Amerika po manipulon zgjedhjet në Türkiye, Gjermania po i manipulon, Franca po i manipulon, Anglia po i manipulon’, çfarë do të thoshe (Kılıçdaroğlu)”, tha Erdoğan.
Presidenti Erdoğan tha se është në kontakt me këto vende për 20 vjet dhe e pyeti Kılıçdaroğlu-n “Sa herë ke ardhur bashkë me ta? Si i njeh ata”.
Dje, Kılıçdaroğlu e akuzoi Rusinë se qëndron pas video përmbajtjes që dyshohet se diskreditonte kandidatët për president në zgjedhjet e të dielës.
“Të dashur miq rusë, ju qëndroni pas montazheve, komploteve, përmbajtjeve të thella false dhe kasetave që u ekspozuan në këtë vend dje. Nëse doni që miqësia jonë të vazhdojë pas 15 majit, largoni duart nga shteti turk. Ne ende jemi në favor të bashkëpunimit dhe miqësisë”, shkroi Kılıçdaroğlu në Twitter.
Zëdhënësi i Kremlinit, Dmitry Peskov, hodhi poshtë akuzat, duke theksuar se nuk mund të bëhet fjalë për ndonjë ndërhyrje të Rusisë në zgjedhjet turke dhe shtoi se “ata që përhapin thashetheme të tilla janë gënjeshtarë”.
