Ministrat e Jashtëm të vendeve të G20-s janë mbledhur të premten në Atlanta të Xhorxhias, në Shtetet e Bashkuara, për një takim dyditor ku në qendër të diskutimeve janë sfidat ekonomike globale, tensionet gjeopolitike dhe çështjet e sigurisë ndërkombëtare.
Takimi, i organizuar nga Sekretari amerikan i Shtetit, Marco Rubio, zhvillohet në një moment tensionesh të shtuara ndërkombëtare, ku lufta në Ukrainë dhe përplasjet që përfshijnë Iranin kanë shtuar shqetësimet për stabilitetin rajonal dhe pasojat në ekonominë botërore.
Në axhendën e diskutimeve përfshihen rritja ekonomike, siguria energjetike dhe ushqimore, liria e lundrimit dhe qëndrueshmëria e zinxhirëve globalë të furnizimit.
Një element që tërhoqi vëmendjen që në nisje të takimit ishte mungesa e fotografisë tradicionale familjare të ministrave të Jashtëm. Vendimi erdhi pasi disa përfaqësues evropianë kishin sinjalizuar se nuk dëshironin të pozonin përkrah ministrit të Jashtëm rus, Sergei Lavrov.
Ministri i Jashtëm gjerman, Johann Wadephul, deklaroi për gazetarët se priste që fotografia të mos zhvillohej fare. “Nuk ka normalitet me Rusinë”, u shpreh ai, duke nënvizuar se partnerët evropianë nuk do të merrnin pjesë në një fotografi të përbashkët me Lavrovin.
Rubio: Krizat ekonomike dhe gjeopolitike kërkojnë bashkëpunim
Në fjalën hapëse, Rubio u bëri thirrje vendeve anëtare të G20-s të bashkëpunojnë përballë krizave të ndërlidhura ekonomike dhe gjeopolitike, duke paralajmëruar për kërcënimet ndaj furnizimit global me energji dhe ushqime, tregtisë ndërkombëtare dhe lirisë së lundrimit.
Ai e cilësoi periudhën aktuale si një “moment zgjedhjeje”, duke theksuar se sfidat me të cilat përballen Shtetet e Bashkuara kanë pasoja edhe për pjesën tjetër të botës.
“Po përballemi me një sërë krizash të ndërlidhura ekonomike dhe gjeopolitike, shumë prej të cilave përbëjnë kërcënime serioze për themelet thelbësore të rendit ekonomik global”, deklaroi Rubio.
Sipas tij, ndërprerjet në furnizimin me energji dhe ushqime, problemet në zinxhirët e furnizimit, pengesat në tregtinë ndërkombëtare dhe kërcënimet ndaj lirisë së lundrimit kërkojnë një përgjigje të koordinuar.
Rubio u kërkoi partnerëve të G20-s të forcojnë qëndrueshmërinë ekonomike, të mbrojnë tregjet dhe të koordinojnë politikat përballë krizave të reja.
“Duke i kthyer interesat tona të përbashkëta në bashkëpunim praktik dhe veprime konkrete, mund të forcojmë stabilitetin global dhe, mbi të gjitha, të sjellim rezultate domethënëse për qytetarët tanë”, u shpreh sekretari amerikan i Shtetit.
Sesioni i parë i takimit iu kushtua kryesisht lirisë së lundrimit dhe sigurisë ushqimore.
Lavrov kërkon dialog ekonomik, Moska kundërshton përjashtimin e Afrikës së Jugut
Ministri i Jashtëm rus, Sergei Lavrov, i cili kryeson delegacionin e Moskës, pritet të kërkojë zgjerimin e bashkëpunimit ekonomik dhe një dialog të barabartë ndërmjet vendeve anëtare.
Një tjetër çështje që ka shtuar tensionet brenda forumit është mungesa e Afrikës së Jugut në takimin e Atlantës. Moska ka kritikuar vendimin amerikan, duke kërkuar rikthimin e të drejtave të anëtarësimit për Pretorian.
Presidenti amerikan Donald Trump kishte njoftuar më herët se Afrikës së Jugut nuk do t’i dërgohej ftesë për samitin e G20-s të vitit 2026. Vendimi erdhi pas bojkotit amerikan të samitit të vitit të kaluar në Johanesburg dhe përplasjeve të administratës Trump me qeverinë e Afrikës së Jugut.
Trump ka pretenduar se në Afrikën e Jugut po ushtrohet përndjekje ndaj fermerëve të bardhë, një pretendim i kundërshtuar nga autoritetet e këtij vendi.
Afrika e Jugut, nga ana e saj, ka deklaruar se mospjesëmarrja në takimin e Atlantës nuk ishte zgjedhje e saj dhe ka kërkuar trajtim të barabartë si anëtare e forumit.
G20, e krijuar në vitin 1999 pas krizës financiare aziatike, është një forum ndërkombëtar që bashkon ekonomitë kryesore të zhvilluara dhe ato në zhvillim për koordinimin e politikave ekonomike dhe trajtimin e sfidave globale. Ai përbëhet nga 19 shtete, Bashkimi Evropian dhe Bashkimi Afrikan, i cili iu bashkua në vitin 2023.
Takimi i ministrave të Jashtëm në Atlanta zhvillohet më 30–31 tetor dhe shërben si një prej etapave përgatitore për samitin e liderëve të G20-s, që do të mbahet në Miami më 14–15 dhjetor 2026.
© 2026 Argumentum
