Ministri për Europën dhe Punët e Jashtme, Igli Hasani, ndodhet për një vizitë zyrtare në Gjenevë, pas marrjes së mandatit tre-vjeçar të Shqipërisë në Këshillin e të Drejtave të Njeriut (KDNJ).
Hasani zhvilloi këtë të hënë një takim të nivelit të lartë të Sesionit të 55-të të Këshillit të të Drejtave të Njeriut
Gjatë mandatit të saj 3-vjeçar (2024 – 2027) në Këshillin e të Drejtave të Njeriut, Shqipëria do të angazhohet ndaj parimeve të përjetshme të të drejtave dhe dinjitetit të njeriut e për ndërtimin e një bote, ku çdo person mund të realizojë potencialin e tij të plotë dhe të jetojë me dinjitet dhe respekt.
Kështu u shpreh sot, ministri për Evropën dhe Punët e Jashtme, Igli Hasani, gjatë fjalës në Segmentin e Nivelit të Lartë të KDNJ, që po mbahet në Gjenevë.
Hasani theksoi se një nga prioritetet e Shqipërisë si anëtare e KDNJ, është gjithashtu vënia para përgjegjësisë e autorëve të krimeve të rënda, luftimi i pandëshkueshmërisë dhe parandalimi i shkeljeve të mëtejshme të të drejtave themelore.
“Ne mbështesim plotësisht mandatin e Komisionit Hetimor dhe si anëtar i KDNJ-së do të punojmë fort, së bashku me partnerët drejt arritjes së objektivit për të vënë para drejtësisë autorët për krimet kundër njerëzimit në Ukrainë. Më 28 shkurt do të presim në Tiranë, Samitin Ukrainë-Evropa Juglindore, për të mbështetur Ukrainën dhe për të denoncuar këtë agresion të paligjshëm dhe krimet që ka sjellë ai”, u shpreh Hasani.
![](https://www.argumentum.al/wp-content/uploads/2024/02/gjenevee-igli-1024x682.jpg)
Kryediplomati shqiptar deklaroi se Shqipëria po përgatitet për ciklin e katërt të Rishqyrtimit Periodik Universal, i cili sipas tij, është një mundësi për prezantuar veprimet e ndërmarra për të përmirësuar situatën e të drejtave të njeriut në Shqipëri dhe të ndajë praktikat më të mira.
“Ne do të punojmë për të mbështetur pjesëmarrjen e aktorëve të shoqërisë civile dhe mbrojtësve të të drejtave të njeriut, veçanërisht të grave, në punën e Këshillit të të Drejtave të Njeriut dhe në terren. Ky është një prioritet shumë i rëndësishëm për vendin tim”, u shpreh ai.
Është hera e dytë që, brenda një periudhe më pak se 10-vjeçare, Shqipëria bëhet pjesë e këtij organizmi të rëndësishëm të OKB-së që trajton çështje të mbrojtjes dhe respektimit të të drejtave të njeriut. Shqipëria pati mandatin e parë në KDNJ në vitet 2015 – 2017.
Duke folur për samitin që pritet të organizohet në Tiranë, Hasani tha se ai synon të mbështesë Ukrainën dhe të denoncojë këtë agresion të paligjshëm dhe krimet që ka sjellë ai.
Hasani theksoi se “duke vepruar kështu, ne në fakt po luftojmë për të drejtat e njeriut dhe sistemin e bazuar në rregulla”.
Ministri për Europën dhe Punët e Jashtme, Igli Hasani foli sot nga Gjeneva edhe për Samitin Ukrainë-Evropa Juglindore, që do të zhvillohet në Tiranë më 28 shkurt.
“Më 24 shkurt 2022, Rusia nisi luftën e saj të paprovokuar, të pajustifikuar dhe të paligjshme të agresionit kundër Ukrainës. Gjatë dy viteve të fundit, trupat ruse janë përfshirë në një mori të tmerrshme krimesh lufte dhe krimesh kundër njerëzimit: tortura, deportimi i fëmijëve, dhuna seksuale e lidhur me konfliktin, sulme zjarri mbi civilët, lëvizjet ose zhvendosjet e civilëve, keqtrajtimi dhe ekzekutimi i të burgosurve të luftës, ndalimet arbitrare dhe vrasjet janë vetëm disa nga to gjëra që po ndodhin. Së fundmi, këtyre krimeve i shtohet edhe vdekja e liderit të opozitës Alexey Navalny – episodi i fundit i një vargu trajtimesh të tmerrshme të kundërshtarëve nga regjimi rus”, u shpreh Hasani.
Kreu i diplomacisë shqiptare nënvizoi se “ajo që ka qenë vërtet tronditëse, madje edhe më shumë se krimet në vetvete, është arroganca e autorëve të cilët kanë lavdëruar krimet e tyre, gjë e cila është parë nga e gjithë bota”.
“Autorët e këtyre krimeve duhet të mbajnë përgjegjësi. Ne mbështesim plotësisht mandatin e Komisionit Hetimor dhe si anëtar i Këshillit të të Drejtave të Njeriut do të punojmë fort, së bashku me partnerët, aleatët dhe vendet të njëmendta drejt arritjes së objektivit për të vënë para drejtësisë autorët”, shtoi ai.
/Argumentum.al