Komandanti i misionit të NATO-s në Kosovë (KFOR), gjeneralmajor Özkan Ulutaş, i shoqëruar nga Shefi i Shtabit të KFOR-it, gjeneral brigade Chad W. Daniels, zhvilloi një takim në Prishtinë me kryeministrin në detyrë të Kosovës, Albin Kurti.
Sipas njoftimit zyrtar të KFOR-it, gjatë takimit komandanti i misionit informoi mbi aktivitetet e KFOR-it dhe riafirmoi angazhimin e vazhdueshëm të misionit për të kontribuar në një mjedis të sigurt dhe të qëndrueshëm për të gjithë qytetarët që jetojnë në Kosovë.
Gjeneralmajor Ulutaş vuri në dukje gjithashtu gatishmërinë e KFOR-it për të thelluar koordinimin dhe bashkëpunimin me të gjithë aktorët përkatës, përfshirë institucionet e Kosovës dhe organizatat e sigurisë, në funksion të ruajtjes së stabilitetit dhe sigurisë.
Në deklaratën e tij, KFOR rikujton se misioni vazhdon të zbatojë mandatin e përcaktuar nga Rezoluta 1244 e Këshillit të Sigurimit të Kombeve të Bashkuara e vitit 1999, me detyrën për të garantuar një mjedis të sigurt dhe lirinë e lëvizjes për të gjithë qytetarët, në çdo kohë dhe në mënyrë të paanshme.
KFOR nënvizon se vijon të bashkëpunojë ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me përgjegjësitë e tyre përkatëse si mekanizma të sigurisë.
Takimi zhvillohet në kuadër të kontakteve të rregullta të KFOR-it me udhëheqësit politikë dhe institucionalë në Kosovë, me synimin për të ruajtur koordinimin dhe shkëmbimin e vlerësimeve mbi situatën e sigurisë në vend.
© 2026 Argumentum
