Kreu i shtetit kishte kthyer për rishqyrtim ndryshimet në Kodin Zgjedhor të miratuara në seancën plenare të datës 5 tetor.
Presidenca ka dërguar gjithashtu tetë pyetje në Komisionin e Venecias për Kod Zgjedhor nën argumentin se janë cenuar të drejtat e partive në zgjedhje dhe është favorizuar forca në pushtet.
Pas rrëzimit të dekretit të Metës nga komisioni parlamentar i ligjeve, Balla tha PS mirëpret opinionin e Venecias, por nuk ka kohë për të humbur pasi zgjedhjet po afrojnë.
“Duhet refuzuar përpjekja e Ilir Metës për të na futur në një spirale të rrezikshme. Ilir Meta ka mbajtur një pozicion ekstremist për të sabotuar zgjedhjet e 25 prillit. Nuk kemi kohë për të humbur me aventurat e Metës“, u shpreh Balla.
Deklarata e plotë e Ballës
Kuvendi i Shqipërisë përmes Komisionit të Ligjeve ka rrëzuar dekretin e Presidentit të Republikës për Kodin Zgjedhor, të shumta janë argumentet e rrëzimit që shoqërojnë dekretin, por ajo që dua të them është se rezultati i përket shumicës së deputetëve të Kuvendit për t’i dhënë rrugë hyrjes në fuqi të ndryshimeve në Kod. Duhet refuzuar përpjekja e Metës për ta futur vendin në një spirale të rrezikshme sa kohë që janë më pak se 180 ditë në dispozicion.
Ilir Meta për asnjë moment me këtë dekret s’ka pasur për qëllim të përmirësojë kuadrin zgjedhor në Republikën e Shqipërisë, por si gjithmonë pozicioni i tij ekstremist ka qenë sabotimi dhe gjithçka për të penguar zhvillimin normal të zgjedhjeve të 25 prillit.
Për shumicën Komisioni i Venecias gjithnjë është i mirëpritur për të sjellë një opinion të pjekur, i cili do diskutohet nga të gjitha forcat politike me vëmendje dhe do adresohet edhe për çështje pas 25 prillit, por tani s’kemi kohë për të humbur, për të hyrë në një aventurë.
Unë e kam sqaruar dhe komisionerin në një bisedë që kemi pasur, biseda të drejtpërdrejta miqësore, pa dorashka, se parlamenti nuk do presë asnjë sekondë sepse kemi zgjedhjet më 25 prill dhe s’kemi pse të hyjmë në spiralen e një aventure ku na fton Ilir Meta, i cili nuk ka qëllim të përmirësojë kodin zgjedhor por ka për qëllim të sabotojë nga pozicioni i tij ekstremist, anti-shumicë dhe anti-parlament në këtë proces.
Kanë nevojë të kenë të shkruar e zezë në të bardhë ligjin zgjedhor. Implementimi i ligjit zgjedhor kërkon kohën e vet, është marrë dhe një angazhim për identifikimin biometrik, koha është jashtëzakonisht e ngushtë. Ne nuk kemi asnjë arsye që të mos e refuzojmë në sekondën e parë që kalon afati i procedurës Ilir Metën i cili me gjithë këtë përpjekje që është botërisht e identifikuar si përpjekja e një lideri alternativ të një opozite të copëtuar dhe lideri absolut i një partie të degraduar.
Zëdhënësi i Presidencës, Tedi Blushi i bën thirrje kreut të grupit parlamentar të PS-së, Taulant Ballës që të reflektojë deri të enjten dhe i fton socialistët që të mos e marrin më peng të ardhen evropiane të Shqipërisë.
Balla, reflektoni dhe thellohuni deri të enjten!
Presidenti e dëgjoi thirrjen e Europës!
Dëgjojeni edhe ju!
Boll e morrët peng të ardhmen europiane të Shqipërisë,shkruan zedhenesi I Presidences Tedi Blushi
