Ministri në detyrë i Punëve të Jashtme të Kosovës, Glauk Konjufca, priti në takim ministrin e Deleguar për Evropën të Francës, Benjamin Haddad, me të cilin nënshkroi pesë marrëveshje bashkëpunimi, duke i cilësuar ato si një hap të rëndësishëm drejt thellimit të marrëdhënieve mes dy vendeve.
Konjufca vlerësoi Francën si një nga partnerët më të rëndësishëm të Kosovës që nga shpallja e pavarësisë, duke theksuar se marrëveshjet e nënshkruara dhe letra e qëllimit e çojnë bashkëpunimin dypalësh në një nivel të ri.
Ai tha se gjatë takimit u diskutua edhe për perspektivën evropiane të Kosovës, duke nënvizuar se vendi mbetet i përkushtuar ndaj reformave demokratike, sundimit të ligjit dhe harmonizimit të politikës së jashtme dhe të sigurisë me Bashkimin Evropian.
“Në një kohë kur Evropa përballet me sfida të mëdha të sigurisë, besueshmëria e projektit evropian varet nga një zgjerim më i shpejtë, i drejtë dhe i bazuar në merita. Kosova ka bërë zgjedhjen e saj strategjike dhe kjo zgjedhje është Bashkimi Evropian”, deklaroi Konjufca.
Nga ana e tij, ministri francez Benjamin Haddad tha se vizita në Prishtinë shënon një shtysë të re për marrëdhëniet mes Francës dhe Kosovës. Ai theksoi se mbështetja franceze për Kosovën është e kahershme dhe rikujtoi angazhimin e tij personal si anëtar i Grupit të Miqësisë Francë–Kosovë në Asamblenë Kombëtare franceze.
Sipas Haddad, pesë marrëveshjet e nënshkruara krijojnë bazën për një bashkëpunim afatgjatë dhe hapin mundësi të reja në fushën ekonomike, tregtare dhe të investimeve.
Ai bëri të ditur se në delegacionin francez ndodheshin edhe përfaqësues të disa kompanive franceze, si dhe të Agjencisë Franceze për Zhvillim (AFD), të cilat synojnë të zgjerojnë bashkëpunimin me Kosovën.
“Ne mund të forcojmë marrëdhëniet tona tregtare, investimet franceze në Kosovë dhe të krijojmë më shumë mundësi biznesi mes dy vendeve tona. Mbështetja e AFD-së për Kosovën është tashmë e konsiderueshme, me 80 milionë euro të dedikuara për tranzicionin energjetik dhe luftën kundër ndryshimeve klimatike”, u shpreh Haddad.
/Argumentum.al
