Me maska dhe duke mbajtur distancë, qytetarët e Kosovës po votojnë të dielën për zgjedhjet e parakohshme parlamentare, pas më pak se një vit e gjysmë nga zgjedhjet e fundit.
Komisioni Qendror Zgjedhor (KQZ) ka njoftuar se deri në orën 11:00 në gjithë territorin e Kosovës kanë votuar 8.30 për qind apo 145,650 qytetarë të Kosovës.
Kryetarja e KQZ-së, Valdete Daka, ka thënë se procesi i votimit është duke u zhvilluar normalisht dhe se nuk ka raportime për incidente që mund të dëmtojnë procesin zgjedhor.
Daka ka thënë se në periudhën e njëjtë kohore, në zgjedhjet parlamentare të vitit 2019, kanë votuar 9.64 për qind e qytetarëve me të drejtë vote apo 174,669 persona.
Qendrat e votimit janë hapur në ora 07:00 dhe do të mbyllen në ora 19:00.
Të drejtë vote në këto zgjedhje kanë 1.794.862 qytetarë, të cilët do të mund të votojnë në 888 qendra të votimit, me 2.382 vendvotime në 38 komunat e Kosovës. Këtë vit, KQZ-ja ka larguar nga lista e votuesve rreth 122.000 persona, të cilët kanë qenë të regjistruar vetëm me dokumente të UNMIK-ut. Në këto zgjedhjet është thënë se do të votohet vetëm me dokumente të Kosovës.
Kryetarja e Komisionit Qendror të Zgjedhjeve, Valdete Daka, ka votuar e para në qendrën e votimit në Fakultetin Teknik. Pas votimit ajo ka deklaruar se KQZ-ja tashmë ka përfunduar të gjitha përgatitjet dhe obligimet e veta kushtetuese e ligjore për votimet e së dielës.
Procesi i votimit po mbahet në mot të ftohtë e me borë. Temperaturat minimale do të lëvizin ndërmjet -11 deri -9 gradë Celsius, ndërsa maksimalet e ditës parashihen të lëvizin ndërmjet -5 deri -3 gradë Celsius.
Në këto zgjedhje garojnë 28 subjekte politike: 21 parti politike, dy koalicione dhe pesë iniciativa qytetare, me 1.052 kandidatë të cilët garojnë për 120 ulëse në Kuvendin e Kosovës.
Lëvizja Vetëvendosje në këto zgjedhje ka për kandidat për kryeministër kreun e partisë, Albin Kurtin, i cili nuk u certifikua që të garojë për deputet në këto zgjedhje. Lidhja Demokratike e Kosovës garon për të parin e qeverisë me Avdullah Hotin, ndërkaq Partia Demokratike e Kosovës, garon me Enver Hoxhajn për postin e kryeministrit.
Për këto zgjedhje janë akredituar rreth 30 mijë vëzhgues.
Kandidati i Lidhjes Demokratike për kryeministër të Kosovës, Avdullah Hoti pasi ka votuar ka ftuar gjithë qytetarët me të drejtë vote që të dalin të votojnë në zgjedhjet parlamentare.
I shoqëruar nga bashkëshortja e tij, Hoti tha se sot është dita kur flasin qytetarët.
“Unë ftoj të gjithë qytetarët që kanë të drejtë vote që sot ta shfrytëzojnë të drejtën e tyre për te votuar, sot është dita e tyre ata sot thonë fjalën e tyre. Dëshiroj të falënderoj krejt stafin duke filluar nga zyrtarët e KQZ-së, vëzhguesit, komisionerët, monitoruesit ndërkombëtar dhe vendor për punën e tyre dhe pres të kemi një proces të rregullt zgjedhor në mënyrë që të mirëmbajmë standardet e organizimit të zgjedhjeve të rregullta sipas standardeve me të mira evropiane në zgjedhje të lira demokratike ku qytetarët lirshëm e thonë fjalën e tyre”, tha Hoti.
Kandidati për kryeministër nga Lëvizja Vetëvendosje, Albin Kurti i shoqëruar nga bashkëshortja e tij pasi ka ushtruar të drejtën e votës tha se sot është ditë e bardhë ashtu si e ardhmja e Kosovës.
Kurti tha se qytetarët kanë nevojë për demokraci.
“Sot është ditë e bardhë, e ndritshme ashtu siç do jetë edhe e ardhmja. Qytetarët kanë nevojë për demokraci, institucionet kanë nevojë për legjitimitet sot kjo nevojë është e drejtë e cila me tej paraqet mundësinë dhe shans që duhet shfrytëzuar dhe duhet përdorur. Kosova si shtet u pavarur i kthehet popullit si burim i sovranitetit. Me dashuri për vendin duhet të votojmë”, tha ai.
Ushtruesja e detyrës së presidentes së Kosovës, Vjosa Osmani ka votuar në Fakultetin Teknik në Prishtinë.
Osmani e cila ishte e shoqëruar nga bashkëshorti dhe dy vajzat e saj tha pas votimit se sot është një ditë e bardhë për Kosovën dhe ftoi të gjithë qytetarët që vendosin për fatin e tyre duke shfrytëzuar të drejtën që të votojnë.
“Sot është një ditë e bardhë për Kosovën, është një ditë kur të gjithë qytetarët tanë do ta përcaktojnë të ardhmen e tyre, do ta përcaktojnë fatin e vendit dhe individual. Është një ditë e ftohtë por ftoj të gjithë qytetarët të votojnë, ftesë e veçantë për të gjitha vajzat dhe gratë”, ka thënë ajo.
“Dua t’i falënderoj nga zemra të gjithë mërgatën tonë, që kanë bërë një sakrificë të madhe duke ardhë e duke marrë pjesë në votime përmes postës”, ka thënë Osmani.
Edhe kreu i Nismës, Fatmir Limaj ka votuar .
Me këtë rast, ai ka thënë që shpreson që këto zgjedhje të prodhojnë stabilitet, siguri dhe qeverisje stabile.
“Shpresoj që këto zgjedhje do të prodhojnë stabilitet, siguri dhe qeverisje stabile”, ka thënë ai.
Të gjitha këto, sipas Limaj, vijnë nëse vazhdojmë të ndihemi krenar për të kaluarën. “Duke mos e mohuar të kaluarën mund të ecim në të ardhmen”, ka shtuar ai.
Prijësi i Listës së AAK-së, Ramush Haradinaj ka votuar sot në qendrën e Votimit në shkollën e mesme të Mjekësisë “Ali Sokoli”.
Pas votimit Haradinaj ka kërkuar nga qytetarët që të shfrytëzojnë të drejtën e votës në mënyrë që t’i jepet legjitimiteti institucioneve të Kosovës.
“Ushtruam të drejtën tonë për të votuar, i lus të gjithë qytetarët që kanë të drejtë vote, të votojnë, këto zgjedhje janë me rëndësi që t’i japim legjitimitet institucioneve të Kosovës, na presin shumë sfida si përballja me Serbinë, situata me pandeminë dhe forcimi i brendshëm i vendit”, ka thënë Haradinaj.
Ai ishte i shoqëruar nga bashkëshortja e tij Anita Haradinaj.
KQZ përmes një konference për media ka njoftuar se deri në ora 11:00 kanë votuar mbi 145 mijë qytetarë.
Komisioni Qendror i Zgjedhjeve (KQZ) ka njoftuar se pjesëmarrja e qytetarëve në votime deri në ora 11:00 është 8,30 %, apo 145 mijë e 650 votues.
“Procesi i votimit është duke vijuar normalisht. Nuk ka raportime për incidente të cilat mund të dëmtojnë integritetin e ditës së zgjedhjeve. Deri në ora 11:00 kanë votuar 8,30 për qind e votuesve apo 145 mijë e 650 votues nga 1 milionë 794 mijë e 862 votues. Deri në të njëjtën kohë në zgjedhjet e parakohshme parlamentare të vitit 2019 kishin votuar 9,64 për qind apo 174 mijë e 669 votues nga 1 milion e 937 mijë e 868 votues sa kanë qenë atë kohë”, ka thënë Daka.
Kjo dalje deri në orën 11, është më e vogël krahasuar me vitin 2019 dhe vitin 2017, kjo mbase si pasojë e motit të ftohtë dhe reshjeve të borës
Qendra e votimeve janë hapura në ora 07:00 dhe do të mbyllën në ora 19:00.
Të drejtë vote në këto zgjedhje kanë 1.794.862.
© Argumentum
