“Ministrja e Punëve të Jashtme dhe Diasporës e Republikës së Kosovës, znj.Meliza Haradinaj – Stublla, do të qëndrojë sot për vizitë zyrtare në Republikën e Maqedonisë së Veriut, së bashku me delegacionin e kryesuar nga kryeministri Avdullah Hoti”, thuhet në njoftim.
Gjithashtu, është bërë e ditur se do të nënshkruhet edhe një marrëveshje për rrjetin 5G.
Kryeministrat e Maqedonisë së Veriut dhe të Kosovës, Zoran Zaev dhe Avdullah Hoti, kanë vlerësuar raportet e deritanishme mes dy shteteve në të gjitha fushat, përfshirë edhe angazhimin e tyre në përballje me pandeminë e koronavirusit.
Pas takimit në Shkup, kryeministrat Zaev dhe Hoti janë përqendruar në veçanti në projektet infrastrukturore, rritjen e bashkëpunimit tregtar si dhe përgatitjen për mbajtjen e mbledhjes së përbashkët mes dy qeverive për konkretizimin e më shumë marrëveshjeve dypalëshe.
Kryeministri Zoran Zaev ka thënë se Maqedonia e Veriut synon që shumë shpejt të nisë punët për ndërtimin e autostradës Shkup- Bllacë në drejtim të Kosovës.
“Ndërtimi i autostradës Shkup-Bllacë besojmë se do të rrisë më shumë bashkëpunimin mes dy vendeve. Kjo rrugë, aq sa është e rëndësishme për Kosovën, aq është e rëndësishme për Maqedoninë (e Veriut). Dy kilometrat e parë veçse duhet të nisin të ndërtohen. Nëse gjithçka shkon mirë, besoj se në tremujorin e parë të vitit të ri, do të nisin punimet dhe brenda dy vjetësh të përfundojnë të gjitha punimet”, ka deklaruar Zaev, duke theksuar se Kosova mbetet një nga partneret më të rëndësishme tregtare për Maqedoninë e Veriut, që përkundër pandemisë, ka arritur në 170 milionë euro.
Kryeministri maqedonas Zaev tha gjithashtu se i ka bërë ftesë Kosovës që t’i bashkëngjitet iniciativës rajonale të “Mini-shengenit” ballkanik dhe se kjo çështje do të jetë një nga pikat e takimit me presidentin e Serbisë, Aleksandar Vuçiq dhe kryeministrin e Shqipërisë, Edi Rama.
Zaev ka përshëndetur edhe marrëveshjes e arritur më 4 shtator në Uashington mes Kosovës dhe Serbisë.
Kryeministri i Kosovës, Avdullah Hoti tha se Prishtina do të ndjekë përvojat e Maqedonisë së Veriut në realizimin e reformave në ekonomik, por edhe në arritjen e marrëveshjeve me shtetet fqinje, që garantojnë paqe dhe stabilitet në rajon.
Hoti tha se Kosova shpreson që Prishtina të lidhet me gazin natyror përmes territorit të Maqedonisë së Veriut, por tha se shpreson që të dyja vendet do të krijojnë një pikë të përbashkët kufitare.
“Kishim bashkëpunim të ngushtë për përballjen me pandeminë. Ne gjithçka po bëjnë që të përcjellim të gjitha rekomandimet e institucioneve ndërkombëtare për përballjen me koronavirusin. Të gjitha masat që merren kanë të bëjnë me parandalimin e virusit dhe jo të lëvizjes së qytetarëve”, tha Hoti.
Kryeministri i Kosovës u përgjigj edhe për atë nëse presidenti i Kosovës, Hashim Thaçi dhe kryetari i Partisë Demokratike të Kosovës, Kadri Veseli po e pengojnë punën e Gjykatës Speciale në Hagë.
“Besoj se Kosova ka dhënë gjithmonë, ka treguar vendosmëri për të respektuar vendimet e organeve të drejtësisë. Gjithmonë duhet të nisemi nga parimi se secili që mund të përfshihet në këto procese është i pafajshëm derisa të mos ketë një vendim përfundimtar nga gjykata. Në këtë gjykatë, dhe në cilado procese tjera, nuk gjykohet lufta e popullit të Kosovës për liri dhe pavarësi. Duhet të vlejë dhe të respektohet plotësisht parimi i prezumimit të pafajësisë derisa nuk ka një vendim përfundimtar”, theksoi kryeministri i Kosovës, Avdullah Hoti.
Kryeministrat e Kosovës dhe të Maqedonisë së Veriut gjatë ditës do të nënshkruajnë edhe një memorandum të bashkëpunimit për krijimin e Rrjeteve të pastërta 5G me nënsekretarit amerikan të Shtetit për Rritjen Ekonomike, Energjinë dhe Mjedisin, Keith Krach.
