Fjala kyçe: 治理—[zhì lǐ]—qeverisje
Organizata e Bashkëpunimit të Shangait (O.B.SH) është e pajisur dhe e aftë ta marrë zbatimin e përbashkët të Nismës Globale të Qeverisjes, si një mundësi për të luajtur një rol më të madh, që ta çojë botën drejt një qeverisje të mirë, tha të martën Kryeministri i Kinës Li Qiang.
Li i bëri deklaratat në Takimin e 24-të të Krerëve Qeveritarë të Vendeve Anëtare të O.B.SH-së.
Liderët dhe përfaqësuesit nga anëtarët e O.B.SH-së, vëzhguesit dhe partnerët e dialogut, të ftuarit e vendit mikpritës, si dhe përgjegjësit e organizatave ndërkombëtare morën pjesë në këtë takim, i cili u drejtua nga Kryeministri i Rusisë Mikhail Mishustin.
Li tha se kryetari i shtetit i Kinës Xi Jinping, në mënyrë solemne paraqiti Nismën Globale të Qeverisjes në Samitin e Tianjinit të O.B.SH-së në shtator, duke ofruar mençurinë dhe zgjidhjet kineze për të ndihmuar bashkësinë ndërkombëtare të adresojë së bashku transformimin global dhe sfidat urgjente.
Ai nënvizoi rëndësinë e O.B.SH-së në ndërtimin dhe reformimin e sistemit të qeverisjes globale.
Së pari, O.B.SH duhet të shfrytëzojë pikat e saj të forta unike, tha Li.
Duke vënë në dukje se Fryma e Shangait është shumë e përafruar me konceptet thelbësore të Nismës Globale të Qeverisjes, Li tha se O.B.SH. ka përvojë të gjerë praktike dhe garanci të forta institucionale, ndaj duhet t’i shfrytëzojë plotësisht këto avantazhe për të dhënë kontribute më të mëdha në qeverisjen globale dhe për të ndihmuar në ndërtimin e një komuniteti me një të ardhme të përbashkët për njerëzimin.
Së dyti, O.B.SH duhet të përqendrohet në fushat kryesore të zhvillimit dhe sigurisë.
Ai i nxiti vendet e O.B.SH të promovojnë zhvillimin dhe sigurinë përmes bashkëpunimit, të rrisin harmonizimin e strategjive të zhvillimit, të promovojnë bashkëpunimin me cilësi të lartë në nismën “Një brez, një rrugë”, të sigurojnë stabilitetin dhe rrjedhën e qetë të zinxhirëve globalë të prodhimit dhe furnizimit, dhe së bashku të ndërtojnë një ekonomi botërore të hapur dhe gjithëpërfshirëse.
Ai tha se Kina është e gatshme të punojë ngushtë me të gjithë anëtarët e O.B.SH-së për të krijuar sa më shpejt Bankën e Zhvillimit të O.B.SH-së dhe propozon krijimin e një qendre bashkëpunimi Kinë – O.B.SH për sëmundjet metabolike.
Li bëri thirrje gjithashtu për përpjekje për të forcuar mekanizmat e bashkëpunimit në siguri, për t’i dhënë mundësi të plotë rolit të rëndësishëm të katër qendrave të sigurisë dhe për të punuar me bashkësinë ndërkombëtare, për të mbështetur së bashku multilateralizmin dhe për të promovuar sigurinë dhe paqen e qëndrueshme.
Së treti, O.B.SH duhet të stimulojë vitalitet të fortë në inovacion dhe transformim, tha ai. Ai nxiti përpjekje të përbashkëta për të forcuar bashkëpunimin në shkencë dhe teknologji, në inovacion industrial, si dhe për të promovuar bashkëpunimin në energjinë tradicionale dhe atë të rinovueshme.
Li tha se Kina mirëpret pjesëmarrjen aktive të të gjitha palëve në Forumin e Ekonomisë Dixhitale të O.B.SH-së dhe në Forumin e Bashkëpunimit për Inteligjencën Artificiale Kinë-O.B.SH. Kina është e gatshme të ndërtojë dhe të shfrytëzojë së bashku platformën e bashkëpunimit për ekonominë dixhitale Kinë-O.B.SH dhe qendrën e bashkëpunimit për inovacionin shkencor-teknologjik. Gjithashtu, të rrisë vazhdimisht kapacitetin e instaluar të energjisë fotovoltaike dhe të erës me nga 10 milionë kilovat secila në pesë vitet e ardhshme.
Li vuri në dukje se udhëheqësit në Samitin e O.B.SH-së në Tianjin, miratuan së bashku strategjinë e zhvillimit për O.B.SH në periudhën 2026-2035.
Kina është e gatshme të punojë me të gjitha vendet anëtare, për t’i kushtuar më shumë vëmendje koordinimit strategjik, për të nxitur në mënyrë efektive zbatimin e bashkëpunimit, për të optimizuar dhe përmirësuar mekanizmin e operacionit, për të rritur më tej kohezionin, aftësinë për veprim dhe ndikimin, si dhe për ta bërë vazhdimisht Organizatën e Bashkëpunimit të Shangait më të mirë dhe më të fortë.
Palët e tjera pjesëmarrëse në takim vunë në dukje se O.B.SH po luan një rol gjithnjë e më të rëndësishëm në promovimin e integrimit rajonal, si dhe në lehtësimin e krijimit të një bote shumëpolare të drejtë dhe të barabartë.
Ata u bënë thirrje të gjitha palëve të bashkohen për të zbatuar rezultatet e Samitit të O.B.SH në Tianjin, për të optimizuar mekanizmin e organizatës, për t’u përshtatur me NIsmën “Një brez, një rrugë” dhe për të zbatuar strategjinë e zhvillimit të O.B.SH për periudhën 2026-2035.
Ata gjithashtu u kërkuan palëve të ndryshme të forcojnë bashkëpunimin në fusha si lidhshmëria, ekonomia dhe tregtia, siguria, shkëmbimet midis njerëzve, të zbatojnë Nismën Globale të Qeverisjes dhe të mbrojnë multilateralizmin dhe rolin qendror të Kombeve të Bashkuara.
Pas takimit, Li dhe udhëheqës të tjerë nënshkruan komunikatën e përbashkët dhe dokumentet e bashkëpunimit në lidhje me ekonominë, tregtinë, hekurudhat, zhvillimin social dhe sigurinë, si dhe miratuan rezolutat përkatëse mbi ndërtimin e O.B.SH-së./cgtn
