Kryeministri Edi Rama në një vizitë zyrtare në Holande, duket se ka marrë gjithë mbështjen nga homologu i tij Mark Rutte.
Kryeministri i Holandës, Mark Rutte deklaroi sot se Ballkani Perëndimor, përfshirë Shqipërinë, po punojnë fort për t’u bërë pjesë e Evropës.
Rutte në konferencën e përbashkët për shtyp me kryeministrin Rama, tha se Shqipëria ka mbështetjen e plotë të Holandës në procesin e integrimit evropian.
“Në samitin për Ballkanin Perëndimor që u mbajt në Bruksel, BE ripohoi në mënyrë pozitive angazhimin e saj. Po kështu edhe komentet e Edi Ramës më pas, dhe besoj se kishte të drejtë nuk ishte takim i suksesshëm. Ne duhet të bëjmë më shumë. Ne e dimë se vendet e Ballkanit Perëndimor, përfshirë Shqipërinë, po punojnë fort për t’u bërë pjesë e BE-së dhe Shqipëria ka mbështetjen e plotë të Holandës. Problemi këtu është me Maqedoninë e Veriut dhe falë përpjekjes franceze, ka patur një moment të ri në procesin e anëtarësimit, që ndikon edhe Shqipërinë, pasi të dyja, politikisht së paku, janë të lidhura. Ne mbështesim propozimin francez për heqjen e pengesave që në këtë moment ende po bllokojnë Maqedoninë e Veriut dhe po kështu Shqipërinë në procesin e anëtarësimit. Propozimi trajton të gjitha shqetësimet e mbetura”, tha Rutte.
Rutte deklaroi se BE do të vijojë të mbështesë Maqedoninë e Veriut në hapat e mëtejshëm, nëse pranon propozimin francez.
“Qeveria po i hedh një vështrim pozitiv. Shpresojmë që edhe në Parlament të ketë një mbështetje të fortë për këtë kompromis. Bashkimi Evropian, në momentin që të arrihet një kompromis nuk do ta lerë vetëm Maqedoninë e Veriut. Sa të kemi një “po” pozitive, KE dhe udhëheqësit më të lartë do të jenë të lidhur ngushtë me Maqedoninë e Veriut. Dhe këtë angazhim po e bëj sot dhe nuk do ta lëmë këtë proces të kalojë. Do të jemi në mbështetje të tij”, tha Rutte.
Kryeministri holandez theksoi se dhënia e një date për tryezën e parë ndërqeveritare do të ishte edhe një shpërblim për qeverinë shqiptare të Edi Ramës, për reformat e ndërmarra.
“Po kështu, do të jetë një shpërblim i drejtë për të gjithë punën e bërë nga qeveria e Edi Ramës dhe reformat që ka ndërmarrë, që i pashë vetë, me sytë e mi, në vizitën time në nëntor, kur vizitova Tiranën, në një vizitë të këndshme”, deklaroi ai.
Rutte u shpreh optimist se Maqedonia e Veriut do ta pranojë propozimin francez dhe për rrjedhojë nuk do të jetë e nevojshme ndarja me Shqipërinë në rrugëtimin e integrimit.
Megjithatë, nëse një gjë e tillë nuk do të ndodhë, pra Maqedonia e Veriut ta refuzojë si propozim, atëherë Rutte theksoi se Shqipëria do të ketë një mbështetje më të madhe nga vendet evropiane që ta vazhdojë rrugën drejt BE-së, e vetme.
“Nëse Maqedonia e Veriut nuk do e pranojë propozimin francez, Shqipëria do të ketë më tepër mbështetje nga kolegët që ta vazhdojë e vetme rrugën, por shpresoj që të mos jetë e nevojshme”, tha Rutte.
Rutte: “Ballkani i Hapur” nismë tejet pozitive,
Kryeministri i Holandës, Mark Rutte ka vlerësuar nismën për “Ballkanin e Hapur”, duke vlerësuar mjaft pozitivisht edhe lidershipin e kryeministrit Edi Rama në rajon.
“Gjithçka që mund të bëhet dhe Edi Rama është një ndër udhëheqësit më me përvojë në Ballkanin Perëndimor dhe e kemi diskutuar gjatë se çfarë po ndodh në rajon, por po kështu edhe brishtësinë ndonjëherë midis vendeve të rajonit. Mendoj se nën udhëheqjen e tij, fakti që kjo nismë ka ecur përpara, është tejet pozitive. Do të përgëzoja dhe do të rekomandoja çdo lloj platforme që bën vendet të diskutojnë. Dhe kjo është mënyra për shumë vende të Ballkanit Perëndimor që të diskutojnë çështje të interesit të përbashkët. Ideja është për të ecur në një zonë të lirë tregtare midis vendeve dhe kjo do të ndihmojë në mënyrë të jashtëzakonshme kur të çelen kapitujt e negociatave, çka nënkupton që përshpejton procesin e anëtarësimit dhe ndihmon për t’u siguruar që tensionet të mos bëhen të papërballueshme. Dhe kjo kërkon lidership dhe po të shihni rajonin për momentin, drejtuesi më me përvojë që ka marëdhënie të mira me të gjithë është Edi Rama që ka ditëlindjen sot”, tha kryeministri holandez në konferencën e përbashkët për shtyp me kryeministrin Edi Rama, i cili po zhvillon një vizitë zyrtare në Holandë.
Kryeministri Edi Rama vlerësoi angazhimin e Holandës dhe kryeministrit holandez, Mark Rutte për shtyrjen përpara të procesit të integrimit në BE të Ballkanit Perëndimor.
“I jam mirënjohës Markut për përpjekjet e tij serioze e bujare për të shtyrë Ballkanin Perëndimor drejt Evropës dhe për të nxitur më tej Shqipërinë dhe Maqedoninë e Veriut. Ndërkohë qe ne i kemi bërë detyrat tona, në njëfarë mënyre Marku më mësoi që mund ta dashurosh Evropën, por duhet të përgatitesh që është një dashuri e ashpër”, tha kryeministri Rama gjatë konferencës së përbashkët për shtyp me homologun holandez, Mark Rutte.
Rama komentoi edhe qëndrimin e rreptë të mbajtur nga Holanda për disa vite më parë sa i takon procesit të hapjes së negociatave.
“Sa i takon bashkëpunimit dypalësh shpreh mirënjohjen e vërtetë, jo formale, për qeverinë holandeze, për kombinimin e qëndrimit të tyre të rreptë, që në fakt ishte nervozues për njëfarë kohe deri sa e kuptuam për çfarë ishte. Me mbështetjen e tyre reale në terren përmes një programi të quajtur “Matra”, i cili ka bërë ndryshimin në çuarjen para të reformës sonë në drejtësi, që praktikisht ka forcuar po kështu marrëdhëniet tona, sepse në fund të fundit kuptuam se Holanda ishte serioze lidhur me kriticizmin e saj. Por edhe Holanda e kuptoi se ne ishim seriozë në përmbushjen e detyrimeve tona”, u shpreh Rama.
/Argumentum.al
