Me ftesë të Komitetit Qendror të Partisë së Punëtorëve të Koresë dhe qeverisë së Republikës Popullore Demokratike të Koresë, Li Qiang, anëtar i Komitetit të Përhershëm të Byrosë Politike të Komitetit Qendror të PKK dhe Kryeministër i Këshillit të Shtetit të Kinës, udhëhoqi një delegacion të partisë dhe qeverisë kineze, i cili udhëtoi nga Pekini mëngjesin e së enjtes për të marrë pjesë në festimet e 80-vjetorit të themelimit të Partisë së Punëtorëve të Koresë, si edhe për të zhvilluar një vizitë zyrtare dhe miqësore në Korenë e Veriut.
Mesditën e së enjtes sipas orës lokale, Li Qiang mbërriti në Aeroportin Ndërkombëtar Sunan të Phenianit. Pak Thae-sung, anëtar i Byrosë Politike të Komitetit Qendror të Partisë së Punëtorëve të Koresë dhe Kryeministër i Kabinetit, udhëhoqi zyrtarë të lartë të partisë dhe qeverisë në aeroport për të mirëpritur Li Qiang, si edhe për të mbajtur një ceremoni mirëseardhjeje.
Li Qiang u shpreh se Kina dhe Korja e Veriut janë vende fqinjë socialistë, të lidhur nga male dhe lumenj, që kanë një miqësi të thellë tradicionale. Vitet e fundit, nën udhëheqjen strategjike dhe promovimin personal të Sekretarit të Përgjithshëm Xi Jinping dhe Sekretarit të Përgjithshëm Kim Jong-un, marrëdhëniet Kinë-RDPK kanë lulëzuar me një vitalitet të ri. Në shtator të këtij viti, Sekretari i Përgjithshëm Kim Jong-un vizitoi Kinën për të marrë pjesë në përkujtimet e 80-vjetorit të fitores së Luftës së Rezistencës së Popullit Kinez Kundër Agresionit Japonez dhe Luftës Botërore Antifashiste. Udhëheqësit më të lartë të dy vendeve u takuan përsëri me sukses, duke arritur një sërë unanimitetesh të rëndësishme që do të drejtojnë zhvillimin e marrëdhënieve Kinë-Kore e Veriut.
Li Qiang theksoi se Kina është e gatshme të punojë me Korenë e Veriut për të zbatuar konsensusin e rëndësishëm të arritur nga udhëheqësit më të lartë të dy vendeve, për të forcuar komunikimin strategjik, për të ruajtur shkëmbime të ngushta, për të çuar përpara bashkëpunimin miqësor Kinë-Kore e Veriut, si edhe për të dhënë kontribute më të mëdha në promovimin e paqes, stabilitetit, zhvillimit dhe lulëzimit në rajon dhe botë./cgtn
