Ministria e Bujqësisë dhe Zhvillimit Rural njofton se “Programi IPARD i mbështetjes në bujqësi nuk është ndërprerë. Puna vazhdon, programi vazhdon”.
Në një njoftim për shtyp MBZHR bën të ditur se, nisur nga disa publikime mediatike sqarojmë publikun, por sidomos fermerët dhe agropërpunuesit, në lidhje me procesin e mbështetjes nga programi IPARD se programi i mbështetjes në bujqësi nuk është ndërprerë.
“Autoritetet shqiptare janë vënë në dijeni të një pezullimi të faturës aktuale të rimbursimit nga DG AGRI për një pjesë të shpenzimeve të radhës. Ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE. Këto janë procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara”, thekson MBZHR-ja.
Sipas MBZHR-së, të gjithë strukturat shqiptare janë në bashkëpunim dhe në koordinim të vazhdueshëm me zyrën e OLAF dhe DG AGRI duke ofruar transparencë të plotë, sikurse kanë vepruar nga dita e parë e akreditimit, të të gjithë proceseve kontrolluese, hetuese dhe administrative të ndjekura deri më sot apo që mund të aktivizohen në të ardhmen.
Ministria e Bujqësisë dhe Zhvillimit Rural thekson se procesi i akreditimit të programit IPARD ka nisur prej më shumë se 10 vjetësh dhe zbatimi ka mundur të nisë vetëm në fund të vitit 2018 pas akreditimit të strukturave operuese në përputhje me Marrëveshjen Kuadër, Sektoriale dhe Financiare të ratifikuar në parlamentin shqiptar. Prej vitit 2018 programi ka sjellë një transformim rrënjësor të proceseve prodhuese e përpunuese në vendin tonë, si dhe në rritjen e ekspertizës teknike të stafit vendas.
Si çdo mekanizëm financiar, programi shqyrton, kontrollon dhe zbaton projekte në përputhje me rregulla të mirëpërcaktuara e të miratuara nga Bashkimi Europian, të cilat kontrollohen dhe auditohen vazhdimisht nga struktura të brendshme e të jashtme. Nëse vërehen shkelje, programi përcakton strukturat operuese që marrin masa dhe veprohet në përputhje me procedurat ligjore të parashikuara, ashtu sikurse veprohet në çdo strukturë të ngjashme në vendet e Bashkimit Europian.
Kjo është një punë e përditshme ku të gjithë institucionet e akredituara punojnë bashkarisht në respekt të rregullave të BE-së për të përmirësuar hallka të ndryshme administrative të funksionimit në shërbim të suksesit të programit duke u përballur me sfidat e implementimit në sektorin bujqësor, ndaj është e rëndësishme që një program për zhvillimin ekonomik të Shqipërisë rurale të mos bëhet objekt i konsumit politik.
“Programi IPARD është një gur themeli për zhvillimin e bujqësisë shqiptare, rezultatet e të cilit i ka ndjerë zhvillimi i sektorit që reflektohet sot në indikatorë të rëndësishëm performance pozitive. Ky rezultat ka ardhur si pasojë e punës së jashtëzakonshme të përbashkët me fermerë e agropërpunues si edhe të punonjësve të strukturave në Shqipëri dhe në Bruksel.
Vetëm në këtë mënyrë kemi garantuar rezultate të prekshme duke mundësuar 85 pika grumbullimi, mbi 40 fabrika përpunimi agro ushqimore, mbi 130 investime në mekanikë bujqësore dhe shtim sipërfaqesh të mbjella, mbi 50 investime në subjekte agroturistike, mbi 30 investime në stalla e ferma blegtorale, mbi 40 investime në kantina dhe vreshta, mbi 85 investime në sera, investime në energji të rinovueshme etj., me impaktin direkt të krijimit të mbi 5000 vende të reja pune.
Jemi krenarë për punën e bërë, programi vazhdon dhe të gjithë strukturat e akredituara në zbatim të tij janë në partneritet të plotë me partnerët europianë për të mundësuar mbarëvajtje të suksesshme në të mirë të vendit”, thekson MBZHR në njoftimin për shtyp.
