Një zëdhënës i Ministrisë së Jashtme tha të premten se qëndrimi i Kinës mbi situatën në Iran është shumë i qartë, duke shtuar se nuk ka kuptim të vazhdojë një konflikt i cili nuk duhej të kishte ndodhur që në fillim.
Zëdhënësi i bëri këto komente në përgjigje të një pyetjeje të medias nëse Presidenti i Kinës Xi Jinping dhe Presidenti i SHBA-së Donald Trump, diskutuan për Iranin gjatë bisedimeve të tyre të enjten, si edhe cila është pikëpamja e Kinës mbi situatën aktuale në Lindjen e Mesme.
Gjetja e një mënyre të hershme për të zgjidhur situatën, është në interes jo vetëm të SHBA-së dhe Iranit, por edhe të vendeve të rajonit dhe pjesës tjetër të botës, tha zëdhënësi.
Foto nga VCG
Konflikti ka shkaktuar humbje të rënda tek njerëzit në Iran dhe në vendet e tjera të rajonit, tha zëdhënësi, duke shtuar se me përhapjen ende të pasojave, konflikti ka vënë një presion të madh mbi rritjen ekonomike globale, zinxhirët e furnizimit, rendin tregtar ndërkombëtar dhe stabilitetin e furnizimit global me energji, gjë që dëmton interesat e përbashkëta të bashkësisë ndërkombëtare.
Zëdhënësi tha se armëpushimi i kohëve të fundit dhe përpjekjet për të zgjidhur çështjet përmes negociatave, janë të mirëpritura nga vendet e rajonit dhe bashkësia ndërkombëtare. Ai shtoi se Kina gjithmonë beson se dialogu dhe negociatat janë rruga e duhur përpara, ndërsa përdorimi i forcës është një rrugë pa krye. Tani që dera e dialogut është e hapur, ajo nuk duhet të mbyllet përsëri, shtoi zëdhënësi.
Duke vënë në dukje se Presidenti Xi paraqiti katër propozimet për ruajtjen dhe promovimin e paqes dhe stabilitetit në Lindjen e Mesme, dhe se Kina dhe Pakistani nxorën iniciativën me pesë pika për rivendosjen e paqes dhe stabilitetit në rajonin e Gjirit dhe Lindjes së Mesme, zëdhënësi tha se Kina do të vazhdojë të veprojë në përputhje me katër propozimet e Xi-së, si dhe të punojë me bashkësinë ndërkombëtare për të ofruar mbështetje më të fortë për bisedimet e paqes dhe për të luajtur një rol konstruktiv në arritjen e paqes së qëndrueshme në Lindjen e Mesme./cgtn
