Nga Marjana Doda

Shqipëria është ndër ato vende ku bashkëjetesa dhe harmonia fetare është shembull në gjithë botën. Ndonëse ka këndvështrime të ndryshme nëse bëhet fjalë për harmoni, tolerancë apo thjeshtë indiferencë fetare.

Megjithatë ndërsa i gëzohemi kësaj vlere kombëtare të harmonisë së komuniteteve fetare në tërësi, ka një boshllëk të madh ndërmjet ithtarëve fetarë dhe laikëve

A  jemi tolerant ndaj laikëve?

A janë praktikantët fetarë tolerantë ndaj fjalës së lirë, dhe mendimit ndryshe?

Jo gjithmonë…pa diskutim si tek ka ata që besojnë dhe te ata që nuk  besojnë ka elementë tejet fanatike në bindjen e tyre.

Kjo përplasje herë pas here është zhvilluar edhe në ekranet shqiptare nga gazetarë, praktikantë të fesë, apo opinionistë që ndajnë mendime të ndryshme rreth fesë.

Ky diversitet fetar e kulturor jo gjithmonë ka përfunduar në paqe sociale sikundër duhet të ndodhte. Megjithëse duhet thënë se kjo mund të shikohet vetem te disa individë të veçantë.

Rasti konkret është gazetari dhe publicisti i njohur Z.Kastriot Myftaraj i cili me daten 7 korrik i dha fund tragjikisht jetës së tij duke u vetëhedhur nga kati i katërt i banesës ku banonte.

Për shkak të pikëpamjeve të tij kontroverse mbi fenë vdekja e gazetarit dhe analistit Kastriot Myftaraj ka qenë një prej ngjarjeve më të diskutuara përgjatë dy ditëve të fundit.

Përpos miqve të tij të ngushtë, bashkëpuntorëve, kolegëve, edhe njerëz të thjeshtë që respektonin atë që përfaqësonte Z.Myftaraj, kanë shprehur me dhimbje ngushëllimet për ndarjen nga jeta në mënyrë të parakohshme por dhe kaq tragjike. Megjithatë sikundër ishte e zhurmshme e gjitha prezenca e tij mediatike me penën dhe fjalën e tij, aq e zhurmshme fatkeqësisht ishte dhe ikja e tij nga kjo botë.

I njohur për teoritë e tij konspirative, deri diku dhe radikale por gjithmonë të argumentuara, vdekja e tij si rrallë herë në opinionin shqiptarë çuditërisht ka gëzuar shumë njerëz, veçanërisht ata që dikur ndjeheshin të “sulmuar” nga fjala e lirë e Kastriot Myftaraj.

Besimtarët myslimanë janë ndjerë të sulmuar herë pas here nga teoritë e tij për fene myslimane ndaj vetëvrasjen e tij e kanë parë si ndëshkim nga Zoti.

Megjithatë le të ndalim te Zoti, te Feja, te ajo që vetë Kastriot Myftaraj anatemonte.

Pikërisht nga njerëz të fesë, nga ata që predikojnë çdo ditë fjalën e Zotit, të mirën, të drejtën, të vërtetën, hyjnoren…u derdhën lumenj gëzimi në rrjetet sociale për vdekjen e Myftarajt.

Si rrallëherë në historikun kulturor e religjioz të kombit shqiptarë një Hoxhë ndalon që të shprehin ngushëllimet, madje “kërcënon” ndjekësit e vet dhe ata që besojnë tek ai që Ai përfaqëson, me “BLOCK”.

Kështu Hoxha Ahmed Kalaja ka porositur ndjekësit e tij që të mos shprehin ngushëllime madje ai paralajmëron që të njëjtin fat mund ta ketë edhe dikush tjetër që ai e quan në komentin e tij “lepirsi”

“I mbeti ëndrra pa realizuar…

Lajm i darkës së Arafatit quhet ky…

Zotin e kam dëshmitar që e besoja se do jetë shembull për tallësit me fenë para tij.

Ky ka bërë thirrje për gjenocid ndaj muslimanëve autoktonë shqiptarë, se duhet të arratisen ne Turqi a arabi?!

Madje ligjëronte çdo lloj forme spastrimi ndaj tyre… Madje kishte kallëzuar Kuranin në prokurori…

Nuk lejohet të shahet i vdekuri prandaj mbajeni veten se tregon mungesë niveli por mund të bëni dua alejhi!

Ej se mos lutet ndonjëri për rahmet, apo na thotë ngushëllime se do pësojë, BLOCK! Paralajmërim kam frikë se edhe “Lëpirsi” që merret me Kuranin do të ketë të njëjtin fat”, shkroi ndër të tjerash Kalaja në Facebook.

Këngëtari Gold Ag, që viteve të fundit njihet edhe si praktikues i devotshëm i fesë islame, komentoi në postimin e Ahmed Kalajës duke ironizuar me vdekjen e gazetarit.

“Shyqyr që nuk e paska lënë për nesër habib, se soji i tij do të kishte menduar që ishte i mirë pasi iku (vdiq) në xhuma”, ishte komenti i këngëtarit në postimin e Hoxhës.

Ndërkohë, mbi këtë koment ka pasuar një tjetër replikë nga vet Ahmed Kalaja, i cili i shkruan reperit Gold Ag: “Ku të shkon mendja, i rrezikshëm, po edhe habib je”.

Ndërsa  Elvis Naçi një tjetër Hoxhë, bamirës dhe njëri që përcjell fjalën e Zotit, duket i lehtësuar nga vdekja e një njeriu si Kastriot Myftaraj pasi ky i fundit ka folur kundër tij por dhe xhamive apo vendeve të tjera të shenjta për besimtarët musliman si Meka dhe Medina.

“Ka qenë një gazetar që ka folur keq ndaj kulteve, ndaj besimit në Zot. Unë jam ndioshta nga më kryesorët që ai ka sharë, ka shkruajtur lloj lloj akuzash të pavërteta. Por vjen një ditë që do shkojmë te Zoti dhe këto ngjarje duhet të na bëjnë më të kujdesshëm. Se një ditë do japim shpirt dhe do shkojmë te i madhi Zot.

Përsa i përket gjërave që ka thënë ndaj meje, unë sot po e them para të gjithëve që unë ja kam bo hallall. Por problemi me të do jetë për shkak të mohimit të  Zotit dhe fjalëve që ka fol kundrejt Mekës, Medinës, Xhamiave dhe gjërave që janë fetare”, thotë Elvis Naçi ndër të tjera.

Nuk janë njerëz të zakonshëm që nuk dinë çfarë thonë, por janë njerëz me vetëdije të plotë, që nëpërmjet liturgjive të tyre fetare kanë qindra njerëz që i ndjekin dhe që ndikohen prej tyre.

Po ashtu edhe këngëtari Gold Ag ka një përgjegjësi publike si një njëri publik ku ka me qindra fansa që e ndjekin.

-Çfarë mesazhi përcillni kur i gëzoheni ngjadhënjimit të errësirës ndaj dritës?

-Si mund ti gëzoheni vdekjes së një qenie njerëzore?

Përsonalisht nuk pajtohem me teoritë konspirative të asnjë lloji, qofshin këto politike, gjeopolitikke, fetare etj, e në këtë rast jo domosdoshmërisht mund të jem dakort me opinionet e të ndjerit Kastriot Myftaraj, por gjithsesi ndërsa lexoj komente të disa individëve që shumë kush u ka besuar ushqimin shpirtëror siç është besimi dhe fjala e shenjtë nëpërmjet liturgjisë fetare, më ben ti jap të drejtë vetë Myftarajt.

Sot këta hoxhallarë dhe besimtarë të devotshëm të fesë muslimane, duke u gëzuar për vdekjen e “armikut të islamit” pa dashur i dhanë të drejtë atij, pikërisht Kastriot Muftarajt.

Vertetë, këto komente të frikshme që shprehin gëzim për vdekjen e një bashkëkombësi e një frymë njerëzore e një biri të një nënë që sot e përcolli për në banesën e fundit më ngjall frikë dhe dëshpërim. Më kujton ato akte të tmerrshme terrori në Europë vite më parë ku në emër të Allahut u vranë qindra e mijëra njerëz të pafajshëm(!)

Cili profet i gëzohet vdekjes…cili profet përfaqëson vdekjen…në emrin e cilës fe duartrokisni vdekjen?

Jo në emrin e profetit Muhamet e as të profetit Isait (Jezu Krishtit) që jetën e tyre deri në frymën e fundit sipas shkrimeve të shenjta ua dedikuan burimit të pashtershëm … JETËS.

Ju Hoxhallarë që sot në Minaret e Xhamive po flisni në emrin e  Zotit dhe për Zotin, për atë që përfaqëson; për mirësinë, faljen, durimin, dashurinë, respektin…si mund ti gëzoheni vdekjes së një njeriu që nuk ishte si ju që nuk mendonte si ju që nuk e kuptonte botën si ju?

Në vigjiljen e Kurban Bajramit, që simbolizon ditën e flijimit, ku u vu në provë Ibrahimi të flijoje djalin e tij në emër të Zotit, ju të nderuar Hoxhallarë, ju të nderuar besimtarë, pikërisht Ju u vutë në provë nga Zoti.

“Vetëflijimin” e një njeriu që zgjodhi të ikte nga kjo botë ju e përqeshet e manifestuat e duartrokitët. Ju nuk ishit në gjendje as në emrin e Zotit të falni, ndaj nuk e di nëse do ju falë Zoti sepse kësaj radhe ju e dini se çfarë keni bërë…megjithëse Mëshira e Zotit është e pafund!

Gëzuar Kurban Bajramin!

/Argumentum.al