Drejtoresha e Shërbimit Informativ të Shtetit (SHISH), Vlora Hyseni, raportoi për më shumë se dy orë me dyer të mbyllura në Komisionin Parlamentar për Çështjet e Brendshme dhe Sigurinë Kombëtare, ku paraqiti vlerësimin vjetor mbi gjendjen e sigurisë në vend. Në fokus të raportit ishin rritja e kërcënimeve hibride, fushatat e dezinformimit, aktivitetet e shërbimeve të huaja të inteligjencës, terrorizmi, radikalizmi dhe krimi i organizuar. Seanca u shoqërua edhe me përplasje politike, pasi deputetët e opozitës akuzuan SHISH për përfshirje në monitorimin e protestave, akuza që Hyseni i hodhi poshtë, duke i cilësuar si dezinformim dhe retorikë politike.
Një burim nga ky komision tregoi për gazetarin e Top Channel Muhamed Veliu, një pjesë nga ajo çfarë Vlora Hyseni lexoi si pjesë të raportit vjetor të SHISH.
“SHSH vlerëson se ka rritje të kërcënimeve hibride në formën e aktiviteteve influencuese malinje, fushata deizinformimi operacione informative nga shërbimet e inteligjencës së vendeve kundërshtare ndaj proceseve integruese të Shqipërisë, të cilat shfrytëzojnë ç’do zhvillim të rëndësishëm, me impakt në këto procese, për të nxitur e shkaktuar destabilitet dhe pasiguri. Në këtë kontekst sigurie SHISH bashkëpunon me agjencitë ligjzbatuese dhe partnerët ndërkombëtarë për kundërvënien ndaj tyre”, tha drejtoresha e SHISH, Vlora Hyseni.
Tekst- Pak përpara nisjes të raportimit Vlora Hyseni u përball me akuzat e deputetëve të opozitës Klevis Balliu dhe Flamur Noka që sipas tyre agjentët e SHISH janë infiltruar brenda në protestë duke mbledhur e duke i çuar informacione kryeministrit Edi Rama.
“Shërbimi informativ është infiltruar atje në këtë protestë dhe në fakt është e çuditshme që kryeministri për çdo qytetar që flet 5 minuta atje, ka një informacion të gjerë se çfarë ka bërë më parë, ku ka qenë, ku është dënuar, ku s’është dënuar, me kë ka qëndruar”, u shpreh Klevis Balliu.
“Keni involvuar totalisht shërbimin në funksion të karriges së Edi Ramës dhe jo të shtetit. Keni involvuar totalisht shërbimin, për të dezinformuar, për të mbledhur informacione dhe dezinformacione rreth protestuesve për të shuar atë protestë dhe këtë s’mund ta bëjë kurrë një shërbim”, tha Falmur Noka
Mësohet se drejtoresha e SHISH u përgjigj shkurt dhe prerë çdo akuze, duke u i quajtur dizinformacion.
“Po dezinformoni dhe po e përdorni si gjithmonë raportimin në komision për retorika dhe interesa politike”, citohet t’i ketë thënë shefja inteligjencës shqiptare deputetëve demokratë Noka dhe Balliu./tch/
