Kreu i Partisë Demokratike, Lulzim Basha, pas një takimi me përfaqësues të Institutit Ndërkombëtar Republikan, deklaroi se është në harmoni të plotë me aleatët e tij, të cilët kanë një takim nesër me presidentin Meta për krizën politike.
I pyetur lidhur me këtë qëndrim dhe nëse do të ishte i gatshëm të ulej në tryezë me Ramën si kryetar i Partisë Socialiste, ashtu siç parashikohet në platformën e aleatëve, Basha tha se nuk ka asnjë mospërputhjes mes qëndrimeve të PD dhe koalicionit, por përsërit se kush kryesor mbetet largimi i Ramës si kryeministër dhe krijimi i një qeveri tranzitore.
“Nuk ka asnjë mospërputhje mes qëndrimeve të PD dhe gjithë koalicionit tonë. PD ka përfunduar javën e kaluar një dokument të detajuar sa i përket detyrave të qeverisë tranzitore në raport me zgjedhjet e lira dhe të ndershme dhe do ta paraqesë në ditët e ardhshme në mënyrë publike. E kemi diskutuar dhe me aleatët tanë dhe një pjesë e mirë e pikave që aleatët kanë shpalosur sot janë dhe pikat e programit tonë, ka një përputhje totale.
Koalicioni opozitar po vepron me bashkëpunim, mirëkuptim dhe sinergji të plotë për të ecur përpara. Çështjet e tjera janë detaje të parëndësishme. Kryesorja është zotimi i gjithë koalicionit opozitar, që është sot mazhoranca e re politike, numerike dhe morale në vend, është regjistrimi në zgjedhje dhe pjesëmarrja në zgjedhje vetëm kur të ketë vërtet zgjedhje dhe jo një farsë kriminale dhe kushti për këtë mbetet largimi i Edi Ramës nga qeveria dhe një qeveri tranzitore që do të plotësojë kushtet për të cilat do të keni më shumë informacione në ditët në vijim”, tha Basha.
