Ka qenë vendim unanim nga të gjithë deputetët e PD-së, propozimi i bërë nga kreu demokrat Lulzim Basha.
Në fund të mbledhjes së grupit parlamentar të gjithë deputetët kanë votuar në mënyrë unanime për të lënë mandatet.
1. Unanimisht votohet pro djegies së mandateve, pavarësisht diskutimeve në parim.
2. Të mandatohet kryetari Lulzim Basha të mbledh Këshillin Kombëtar për marrjen e vendimit përfundimtar.
3. Të ngrihet një grup pune për teknikalitetet. Propozim për KK: Gazmend Bardhi, Oerd Bylykbashi, Enkelejd Alibeaj, Çlirim Gjata, Ivi Kaso.
Kreu i PD-së, Lulzim Basha në një konferencë për mediat tha se do të digjen mandatet.
Duke patur parasysh gjendjen e emergjencës kombëtare ku ndodhet vendi, për shkak të kapjes së kësaj qeverie në flagrancë duke vjedhur votat e qytetarëve shqiptarë, siç dëshmojnë edhe dosjet gjyqësore të publikuara nga mediat ndërkombëtare, për shkak të kapjes së kësaj qeverie në afera flagrante korruptive dhe kriminale, eliminimit të parlamentit si një forum i demokracisë, eliminimit të Gjykatës Kushtetuese, kapjes totale të sistemit të drejtësisë, paralizës së shtetit, shtypjes sistematike dhe dhunimit të të drejtave themelore të njeriut, që ka shkaktuar një situatë të paprecedentë të krizës ekonomike, emigracionit katastrofal, duke mbështetur plotësisht zgjidhjen politike të afruar nga opozita e bashkuar të një qeverie tranzitore, të gatshme për të ndarmarrë të gjitha hapat e nevojshëm që do të garantojnë integrimin e vendit, përmes zgjedhjeve të lira dhe të ndershme të parakohshme parlamentare, vendosi unanimisht djegien e mandateve parlamentare të PD në Kuvendin e dalë me votat e krimit dhe mafias në zgjedhjet e manipuluara të 25 qershorit 2017.
Grupi parlamentar i PD autorizoi kryetarin e partisë të ndjekë hapat e mëtejshëm në përputhje me statusin e PD.
