Autoritetet qendrore e Kinës, të udhëhequra nga Ministria e Çështjeve Civile, planifikojnë të nisin një program vjetor kombëtar rekreativ dhe fitnesi për të moshuarit, ndërsa vendi vijon të shtojë përpjekjet për të adresuar nevojat sociale dhe kulturore të popullsisë së saj që po plaket me shpejtësi, shkruan “China Daily”.
Programi “Një moshë e tretë e këndshme”, që do të fillojë këtë vit, synon të promovojë mirëqenien dhe stilin e jetës aktive te të rriturit e moshuar, sipas një qarkoreje të postuar të shtunën nga ministria.
Iniciativa mbulon gjashtë fusha kryesore: artet dhe kulturën, aktivitetet krijuese, leximin, fitnesin, mirëqenien dhe turizmin, si dhe popullarizimin e shkencës.
“Garantimi për një pleqëri të lumtur dhe të përmbushur për të moshuarit është një pjesë kyçe e planit të qeverisë kineze drejt modernizimit”,- tha një zyrtar i ministrisë.
foto nga VCG
Sipas programit të arteve, qeveritë lokale do të inkurajohen të organizojnë shfaqje artistike të fokusuara te të moshuarit, konkurse talentesh, gala dhe ngjarje kulturore në nivel lokal.
Aktivitetet do të shfaqin muzikë, vallëzim, opera, recitim, shfaqje kostumesh dhe arte popullore. Autoritetet po u bëjnë thirrje artistëve dhe punonjësve të kulturës të marrin pjesë në aktivitete të mirëqenies publike që u sjellin oferta kulturore të moshuarve, veçanërisht atyre në zonat rurale.
Iniciativa e kulturës krijuese do të mbështesë pikturën, kaligrafinë, fotografinë dhe ekspozitat video, duke inkurajuar njëkohësisht pjesëmarrjen e të moshuarve në krijimin e poezisë, artit popullor, videove të shkurtra dhe mikrofilmave.
Qeveria do të mbështesë gjithashtu prodhimin e filmave, programeve televizive dhe shfaqjeve të ndryshme mbi temat e të moshuarve, dhe do të përmirësojë kanalet e transmetimit të përshtatura për audiencën e të moshuarve.
foto nga VCG
Programi i leximit do të organizojë aktivitete kombëtare promovuese të leximit gjatë javëve të caktuara të leximit, duke kombinuar materialet tradicionale në letër me leximin digjital, librat audio dhe klasat online. Do të lançohet gjithashtu një program trajnimi vullnetar për të udhëhequr lexuesit e moshuar.
Përveç kësaj, aktivitetet sportive do të përfshijnë takime sportive kombëtare dhe rajonale për të moshuarit, së bashku me iniciativa për të promovuar argëtime të njohura midis të rriturve të moshuar, të tilla si ecja në natyrë, ecja në palestër, tai chi, baduanjin qigong – një ushtrim tradicional meditativ kinez – dhe pingpong.
Qarkorja gjithashtu inkurajon zhvillimin e produkteve të udhëtimit të përshtatshme për udhëtarët e moshuar dhe udhëtimet familjare shumëgjeneracionale, me plane për të lançuar itinerare hekurudhore turistike miqësore për të moshuarit dhe për të optimizuar oraret e fluturimeve për në destinacionet kryesore./CGTN
