Kryeministri Edi Rama ka dhënë sot një intervistë për rrjetin televiziv amerikan, CNN, lidhur me projektin në Zvërnec.
Kreu i qeverisë tha se shqetësimet e ngritura vijnë si rezultat i keqinformimit dhe i një “lufte hibride” kundër Shqipërisë.
I pyetur në lidhje me protestat e zhvilluara në vend, Rama tha se bëhet fjalë për një protestë vetëm në kryeqytet, ndërsa një pjesë e shqetësimeve të ngritura burojnë nga keqinformimi dhe nga materiale të rreme të shpërndara në rrjetet sociale.
Rama tha se ende nuk ka një projekt përfundimtar dhe se procesi i vlerësimit të ndikimit mjedisor vazhdon.
“Së pari, faleminderit që më jepni këtë mundësi, sepse më duhet ta them, por kjo është përshtypje e rreme për të ndjerë barrën e lajmeve të rreme që vijnë edhe nga medie shumë të respektuara, në sytë e mi, dhe thjesht për ta sqaruar. Ju thatë, protesta në gjithë Shqipërinë, kjo është e pavërtetë. Nuk ka protesta në gjithë Shqipërinë. Ka një protestë në kryeqytet. Ne jemi në një luftë hibride. Shqipëria është nën sulm nga armiq që ju i njihni shumë mirë. Është nën sulm nga konkurrenca që është shumë e fortë në pjesën tonë të Mesdheut. Nën sulm nga qindra e mijëra mjete që janë krijuar për të nxitur këtë stuhi, dhe sigurisht, në këtë protestë ka njerëz me qëllime të mira, të rinj, njerëz të interesuar sinqerisht për mjedisin, por që janë keqinformuar. Nuk ka asgjë të tillë si familja Trump. Nuk ka asgjë të tillë si familja e Presidentit të Amerikës që merr nën zotërim zona të mbrojtura, ku flamingot do të vriten prej tyre. Këto janë histori që sigurisht marrin vëmendje, por nuk janë të vërteta”, tha Rama.
Kryeministri tha gjatë intervistës për CNN se imazhet dhe informacionet që qarkullojnë në rrjetet sociale janë të pavërteta dhe nuk përfaqësojnë një projekt real.
Sipas tij, grupi i investitorëve ka angazhuar arkitektë dhe ekspertë ndërkombëtarë të njohur për të hartuar një plan që synon bashkëjetesën mes zhvillimit dhe mbrojtjes së natyrës.
Kryeministri nënvizoi se “nuk ka projekt. Për të krijuar këtë projekt, grupi që nuk përbëhet vetëm nga Jared Kushner dhe Ivanka Trump, por nga një grup shumë më i gjerë që përfshin edhe investitorë të tjerë shumë të respektuar, ka angazhuar pesë nga arkitektët më të mirë në botë sot: Kengo Kuma nga Japonia, Bjarke Ingels nga Danimarka, Emre Arolat nga Turqia, K-Studio nga Greqia, Jean Nouvel nga Franca”.
“Këta po punojnë së bashku me inxhinierë të nivelit më të lartë për mjedisin dhe specialistë të ndikimit social. Ndërkohë është angazhuar edhe një nga kompanitë më të mëdha konsulente për vlerësimin e ndikimit mjedisor. Sepse sfida nuk është të ndërtohet një qytet. Sfida nuk është të derdhet beton mbi kokat e flamingove. Sfida është të provohet se zhvillimi dhe natyra jo vetëm që mund të bashkëjetojnë, por se natyra dhe zhvillimi kanë nevojë për njëra-tjetrën sepse njerëzit meritojnë të jetojnë në një lloj tjetër mjedisi, ku mund ta shijojnë natyrën dhe njëkohësisht t’i tregojnë respekt. Pra, projekti ende nuk ekziston. Vlerësimi i ndikimit mjedisor është ende duke u kryer”, sqaroi Rama.
I pyetur në lidhje me hetimet e Prokurorisë së Posaçme kundër Korrupsionit dhe Krimit të Organizuar, Rama tha se hetimi lidhet vetëm me një transaksion privat të një prej pronarëve të tokës dhe jo lidhur me projektin.
“Ky është lajm i rremë. Ka një hetim lidhur me një nga pronarët e tokës. Është tokë private dhe një nga pronarët e ka shitur pronën, e cila është blerë përmes transaksioneve bankare tërësisht transparente. Hetimi është për atë çështje. Nuk është për investimin, nuk është për projektin, nuk është për Kushner, nuk është për Trump dhe nuk është për asgjë nga ato që po hidhen në këtë përzierje për të krijuar lajmin e bujshëm të rremë që Shqipëria është një vend ku po vrasim flamingot. Jo, Shqipëria sot është vendi ku, teksa ne flasim, në anën tjetër janë disa prej qindra arkitektëve më të mirë të botës. Pse? Sepse sot po prezantojmë këtë libër, që përmban plot e përplot projekte të Shqipërisë së re, që shumë njerëz nuk duan ta shikojnë të bëhet dhe ne s’jemi këtu për të shkatërruar vendin tonë, por jemi këtu për ta bërë Shqipërinë një model për t’u marrë shembull”, deklaroi Kryeministri Rama në intervistën për CNN.
