“Ballkani i Hapur” është mekanizmi i parë real rajonal i bashkëpunimit në Ballkanin Perëndimor, ka deklaruar kreu i qeverisë shqiptare Edi Rama.
Në konferencën e përbashkët për shtyp me Presidentin e Serbisë, Aleksandar Vuçiq dhe kryeministrin e Maqedonisë së Veriut, Dimitar Kovacevski, pas samitit BE-Ballkani Perëndimor të enjten në Bruksel, Rama tha se “Ballkani i Hapur” po jep rezultate për njerëzit. fermerët dhe tregtarët.
Shqipëria dhe Maqedonia e Veriut nuk arritën të marrin dritën jeshile për të nisur bisedimet e pranimit me BE të enjten.
“Ballkani i Hapur” po jep rezultate në të gjitha fushat. Diku janë më të dukshme, diku më pak, por po jep rezultate. Meqenëse Ballkani nuk është vendi i Jezu Krishtit, por i Shën Thomait, ne nuk besojmë nëse nuk vendosim dorën mbi plagën; shkoni në kufi dhe shikoni vetë ndryshimin! Nëse kalon kufijtë e ‘Ballkanit të Hapur’ ka një korridor të gjelbër dhe nuk ka të dytën pritje për kamionë, mallra, produkte bujqësore, qumësht. Ndërkohë, nëse qumështin e çojmë në vende që nuk janë në ‘Ballkanin e Hapur’, kur mbërrijnë bëhet kos. Ky është ndryshimi”, tha Rama.
Kryeministri tha se nuk e kupton se cila është arsyeja që bëhet kaq shumë zhurmë.
“Është një tryezë e hapur për të gjithë, për të 6 vendet. Aleksandri e quajti të ashtuquajturën Kosovë, por unë e quaj Kosovë, dhe pikë. Por kjo nuk na pengon të punojmë së bashku. Imagjinoni sikur të luftonim, të ziheshim me njëri-tjetrin se si do të ishte Ballkani sot”, tha Rama.
Rama shtoi se ndjehet i privilegjuar të punojë për Shqipërinë përmes këtij mekanizmi dhe të promovojë këtë bashkëpunim që do të sjellë paqe.
Opozita dhe shoqatat qytetare në Shqipëri kritikojnë Ramën për nismën duke thënë se ai e ka kthyer Tiranën në një Beograd të vogël. Kosova, gjithashtu, vazhdon të refuzojë përfshirjen e saj në Ballkanin e Hapur nga frika e hegjemonisë së Serbisë.
/Argumentum.al