Nga Mal Berisha
Janë të shumtë artistët shqiptarë të cilët nuk e gjejnë veten në atdheun e tyre dhe detyrohen të emigrojnë drejt vendeve të tjera perëndimore. Shumë prej tyre, kanë bërë emër, edhe pse konkurenca në vendet ku janë vendosur mbart me vete jo vetëm vështirësitë e të qenit i huaj por edhe vështirësi të tjera siç është gjuha e huaj dhe ndonjëherë edhe paragjykimet.
Të gjitha këto vështirësi i ka tejkaluar një shkrimtar malësor nga Puka, i cili ka mëse njëzet vjet që jeton në Irlandë. Ai është:
NDREK GJINI I CILI FITON GRANTIN IRLANDEZ:
“SHKRIMTAR NË RESIDENCË”
Ky titull është i barabartë me atë që neve e njohim në vendin tonë me termin:
SHKRIMTAR NË KRIJIMTARI TË LIRË
Kush është Ndrek Gjini:
Ndrek Gjini ka lindur në Pukë dhe ka mbaruar Universitetin Pedagogjik në Shkodër në degën Gjuhë -Letërsi. Pas shkollës ai ka punuar si mësues në Pukë dhe më pas gazetar në gazetën locale të rrethit të tij të lindjes. Në vitin 1991 vendoset në Tiranë. Fillimisht ai ka punuar në gazetën “Kombi”, më pas në Agjencinë Telegrafike Shqiptare dhe në gazetën “Rilindja Demokratike”. Në vitin 1996, fillon punë si zëdhënës i Ministrisë së Brendshme. Më pas, kthehet prapë në gazetën “RD”. Gjatë gjithë këtyre viteve përveç punës së përditshme ai shkruan letërsi artistike dhe arrin të botojë disa libra. Në vitin 2001 ai emigroi në Irlandë. Atje përkrah veprimtarisë së përditëshme që lidhen me mbijetesën në emigracion vazhdon të merret me letërsi dhe me përkthime. Puna njëzet vjeçare, shkrimet, përkthimet, botimet, librat e sjellin atë në mesin e:
184 SHKRIMTARËVE MË TË MIRË TË IRLANDËS.
Ministria e Kulturës e Republikës së Irlandës ka marrë nga qeveria e këtij vendi një fond prej 75 milionë eurosh që do t’ua paguaj si grante artistëve për një periudhë tre vjeçare. Fituesit do përfitojnë një pagesë mujore të barabartë me një rrogë të mirë të një nëpunësi të administratës irlandeze.
Në Republikën e Irlandës, janë mbi 9000 artistë të fushave të ndryshme që kanë aplikuar për të fituar këtë privilegj të veçantë. Prej tyre atë e kanë fituar 184 shkrimtarë, pa përmendur artistë të tjerë në të gjitha fushat e artit.
NË MESIN E KËTYRE 184 SHKRIMTARËVE FITUES TË KËTIJ GRANTI GJËNDET EDHE EMRI I SHQIPTARO – IRLANDEZIT NDREK GJINIT.
Një sukses ky që nderon jo vetëm autorin por dhe kombin e origjinës së tij, Shqipërinë.
Ndër veprat e tij gjëndet edhe një volum poetik me përkthime nga krijimtaria e poetit, tani President i Republikës së Irlandës, Michael D. Higgins. Në prillin e këtij viti, në shenjë mirënjohje ndaj këtij akti sa artistik aq edhe miqësor të një emigranti shqiptar, shtetas i shtetit të Tij, Presidenti Irlandez e priti z. Gjini, në një audiencë zyrtare në Pallatin Presidencial dhe i shprehu mirënjohjen për këtë akt që kontribuon në njohjen dhe miqësinë midis dy popujve tanë.
Libri ishte botuar para disa muajsh nga shtëpia botuese “Klubi i Poezisë” në Tiranë ndërkohë që z. Gjini ia dhuroi atë Presidentit Michael D. Higgins, gjatë atij takimi.
Ndrek Gjini banon familjarisht për mëse 20 vjet në Republikën e Irlandës ku dhe është shkolluar me kohë të plotë duke marrë Bachelor Honours në Studimet e Trashëgimisë Kulturore si dhe Mjeshtër i Artit në Letërsi. Ai është autor i disa librave në gjuhën angleze, dhe lektor i jashtëm në Universitetin Nacional të Irelandës në Galway, si dhe redactor drejtues i revistës letrare “The Galway Review”. Gjini ka punuar më parë në Drejtorinë e Kulturës pranë Bashkisë së qytetit Galway, si dhe në Drejtorinë Arsimore të këtij qyteti si Kordinator Programi. Para disa vitesh ai është nominuar nga bashkia e qytetit Galway për çmimin “Personi i Vitit”. Ndrek Gjini ka botuar disa libra në gjuhën angleze si dhe mjaft shkrime, ese dhe studime në shtypin irlandez.
Shqiptarë të tillë i bëjnë nder atdheut dhe lartësojnë emrin e shqiptarëve në botë, kudo që ndodhen ata.
Ky shkrim gjëndet në website, në linkun:
https://malberisha.com/shkrimtari-ndrek-gjini-model-i…/
/Argumentum.al
