Hartimi dhe zbatimi i planeve pesëvjeçare në një mënyrë shkencore është një përvojë e rëndësishme dhe një epërsi e spikatur e qeverisjes së Kinës. Plani i 15-të Pesëvjeçar, propozimet për të cilin do të shqyrtohen në plenumin e katërt të Komitetit Qendror të 20-të të Partisë Komuniste të Kinës (PKK), po tërheq vëmendjen globale.
Në një sërë sondazhesh të zhvilluara nga CGTN-i për tre vjet me radhë me 47 000 pjesëmarrës nga 46 vende, janë dhënë vlerësime pozitive për përvojën, praktikat dhe efektivitetin e qeverisjes së Kinës, dhe besimi i të anketuarve tek ekonomia kineze është rritur vazhdimisht.
Gjatë tre vjetëve të zhvillimit të këtyre sondazheve, pjesa e të anketuarve globalë që e konsideron “Kinën si një vend të suksesshëm” ka mbetur vazhdimisht mbi 84 për qind. Midis pjesëmarrësve nga vendet e Jugut Global, ky nivel ka qëndruar mbi 92 për qind, ndërsa përqindja midis të anketuarve nën 44 vjeç e ka tejkaluar mesataren e tre vjetëve me radhë. Në vlerësimin e efektivitetit të qeverisjes së Kinës, “përmirësimi i infrastrukturës”, “forcimi i arsimit” dhe “rritja e niveleve të të ardhurave” morën vlerësimet më të larta, secila me një mesatare më shumë se 70 për qind.
Në sondazhin e vitit 2025, 79.8 për qind e pjesëmarrësve i vlerësuan arritjet e Kinës në përmirësimin e infrastrukturës, 78.8 për qind vunë në dukje përparimin e rëndësishëm të Kinës në arsim dhe 73 për qind pranuan rritjen e dukshme të të ardhurave të njerëzve. Midis të anketuarve nga Jugu Global, niveli i miratimit për qeverisjen e Kinës në këto tre fusha ishte përkatësisht 89.6, 89.3 dhe 86.7 për qind. Të anketuarit e moshës 44 vjeç e poshtë treguan vlerësim dukshëm më të lartë se ata të moshës 45 vjeç e lart, me normat e miratimit në rritje të vazhdueshme midis grupmoshave më të reja.
Për më tepër, në tre vjet radhazi të sondazheve, të anketuarit globalë kanë treguar besim në rritje në zhvillimin e shëndetshëm ekonomik afatgjatë të Kinës. Në sondazhin e vitit 2025, 89.5 për qind e pjesëmarrësve pranuan fuqinë e madhe ekonomike të Kinës, me nivelin e miratimit që i tejkalon 90 për qind midis pjesëmarrësve nën 44 vjeç. Ndërkohë, 89.3 për qind vlerësojnë rritjen ekonomike të qëndrueshme të Kinës, ndërsa 86.4 për qind pohuan kontributin e rëndësishëm të Kinës në ekonominë globale, me nivelin e miratimit midis të anketuarve nën 44 vjeç që e tejkalon 88 për qind. Sipas rajoneve, të anketuarit nga Afrika (95.6 për qind), Amerika e Jugut (92.9 për qind) dhe Azia (85.6 për qind) treguan miratimin më të lartë në këtë drejtim.
Në sfondin e rritjes së unilateralizmit dhe proteksionizmit tregtar, pjesëmarrësit globalë pohuan në një masë të madhe parashikueshmërinë e tregut kinez dhe mundësitë e paraqitura nga hapja e nivelit të lartë të Kinës. Sipas sondazhit të vitit 2025, 72.6 për qind e të anketuarve e konsiderojnë Kinën një treg të hapur dhe konkurrues, 79.8 për qind besojnë se tregu i gjerë i Kinës ofron mundësi të rëndësishme për vendet e tyre, 79.8 për qind e shohin mjedisin e favorshëm të biznesit të Kinës si shumë tërheqës për investitorët e huaj, ndërsa 78 për qind e pranojnë që vendet e tyre kanë përfituar shumë nga tregtia me Kinën.
Sondazhet u kryen nga CGTN-i dhe Universiteti “Renmin” i Kinës, nëpërmjet Institutit Ndërkombëtar të Kërkimeve të Komunikimit të Epokës së Re, duke mbuluar vendet kryesore të zhvilluara, si edhe Jugun Global. Të anketuarit ishin të moshës 18 vjeç e lart, me shpërndarjen e mostrave që pasqyron të dhënat e regjistrimit kombëtar të popullsisë për moshën dhe gjininë të vendeve përkatëse./CGTN
