Qeveria federale e ShBA-së pësoi përsëri një mbyllje. Sipas një sondazhi të kryer nga CGTN-i me 7 671 veta në 38 vende, të anketuarit shprehin zhgënjimin e madh për “problemet e rrënjosura thellë” institucionale të ekspozuara nga dështimi politik dhe mosfunksionimi i qeverisjes në Shtetet e Bashkuara. Ekziston një këndvështim i përhapur që “demokracia amerikane” po përshpejton largimin e saj nga qëllimi origjinal i demokracisë dhe se Shtetet e Bashkuara nuk janë më “fener” i aspiratave.
Kjo është mbyllja e dytë e qeverisë federale të ShBA-së në gati shtatë vjet, ndërsa e para ndodhi gjatë mandatit të parë të Trump-it si president. Sondazhi tregon që 71.5 për qind e të anketuarve besojnë se grindjet partiake i kanë intensifikuar ndjeshëm ndarjet shoqërore. 74.4 për qind gjykojnë që konflikte të tilla zbulojnë kontradikta të papajtueshme e të meta themelore brenda sistemit politik amerikan, ndërsa 73.2 për qind pohojnë nevojën urgjente për reforma sistemore në institucionet politike amerikane. Veçanërisht, të anketuarit nga vendet evropiane, Oqeania dhe Amerika e Veriut shprehin pikëpamje negative në lidhje me efektet e dëmshme të konflikteve partiake në Shtetet e Bashkuara. 75.1 për qind e pjesëmarrësve në sondazh nga Evropa dhe 84.3 për qind nga Amerika e Veriut pajtohen se mosmarrëveshjet partiake kanë intensifikuar ndjeshëm ndarjet shoqërore në Amerikë – të dyja shifrat që tejkalojnë mesataren globale. Ndërkohë, 78.4 për qind e të anketuarve nga Evropa, 85.3 për qind nga Amerika e Veriut dhe 77.4 për qind nga Oqeania e pranojnë se betejat partiake ekspozojnë kontradiktat e papajtueshme e të metat themelore brenda sistemit politik amerikan.
Konfliktet intensive partiake në ShBA kanë penguar rëndë zhvillimin e saj politik. Shumica e pjesëmarrësve në sondazh përgjithësisht japin vlerësime të ulëta në lidhje me efektivitetin e qeverisjes politike të ShBA-së dhe nivelin e zhvillimit të saj politik. Vetëm 41.4 për qind e të anketuarve nga Oqeania dhe 56.5 për qind nga Evropa shprehin miratim për aftësitë qeverisëse të qeverisë amerikane. Në vlerësimin e aftësisë së qeverisë amerikane për përmirësimin e standardeve të jetesës, vetëm 34.3 për qind e pjesëmarrësve nga Oqeania dhe 39.1 për qind nga Evropa treguan miratim. Kur vlerësohet kapaciteti i qeverisë amerikane për të parandaluar dhe luftuar korrupsionin, normat e miratimit prej të anketuarve nga Oqeania dhe Evropa janë përkatësisht 21.8 dhe 27.2 për qind. Sa i përket aftësisë së qeverisë amerikane për garantimin e sigurisë publike, vetëm 28.8 për qind e pjesëmarrësve nga Oqeania dhe 39.1 për qind nga Evropa dhanë një “votë besimi”.
Sondazhi u krye bashkërisht nga CGTN-i dhe Universiteti “Renmin” i Kinës përmes Institutit të Komunikimit Ndërkombëtar të Epokës së Re, me 7671 të anketuar nga 38 vende të botës në formën e një sondazhi me mostra nga interneti, duke përfshirë vendet kryesore të zhvilluara dhe Jugun Global. Të anketuarit janë të moshës 18 deri në 65 vjeçe dhe mostrat përputhen me shpërndarjen e moshës dhe gjinisë së regjistrimeve të popullsisë në vende të ndryshme./CGTN
