Në komunikimin e parë publik pas agresionit masiv që Shqipëria ka pasur për një sulm kibernetik që ka shqetësuar jo vetëm shqiptarët, por edhe partnerët dhe aleatët e saj, zv.kryeministrja Belinda Balluku tha se ky agresion është një luftë e vërtetë.
Zv.kryeministrja Belinda Balluku, drejtoresha e AKSHI-t Linda Karçanaj dhe përfaqësuesi i skuadrës speciale të Microsoft për sigurinë kibernetike, Kevin Chin, në një konferencë për mediet dhanë detaje lidhur me sulmin masiv ndaj sistemeve, punën e bërë për rikthimin në normalitet të shërbimeve, si edhe masat e marra për më tutje.
“Do vazhdojmë të monitorojmë të gjithë situatën dhe çfarë është me e rëndësishme dhe duhet përsëritur është që sistemet po rikuperojnë, sistemet po kthehen të gjitha në normalitet. Megjithatë vigjilenca jonë për sa i përket të gjitha problematikave që mund të sjellin edhe sulme në vazhdim është maksimale”, tha ajo.
Balluku shtoi se, sot ndodhemi në konferencë për mediet për shkak të protokolleve të sigurisë dhe të kërkesës nga Microsoft për të komunikuar me publikun dhe për të sqaruar situatën.
“Dua të informoj edhe për hapat që ka marrë qeveria, pasi ditën e djeshme ka patur edhe një takim tjetër të Komitetit për Mbrojtjen Kibernetike dhe janë lënë një sërë detyrash për të gjithë aktorët e fushës dhe sigurisht janë marrë edhe vendimet që do zbatojmë në të ardhmen, si dhe për bashkëpunimin që do të kemi si me aleatët, dhe teknikët, si në rastin e Microsoft, që ka dhënë mbështetjen, duke përmendur këtu edhe faktin e përfshirjes së CIA-s duke na dhënë mbështetje nga dita e parë, apo dhe shërbime të tjera inteligjente”, theksoi ajo.
Balluku tha se, “është e rëndësishme të themi që ne punojmë me partnerë ekselentë, siç është rasti i Microsoft-it apo edhe ndihma që na është dhënë nga ‘Jones Group’, por pa harruar këtu edhe gjithë ndihmën që kemi marrë nga aleatët, edhe nga partnerët, duke nisur edhe nga kontributi i rëndësishëm që FBI ka dhënë”.
“Falenderoj dhe njëherë Lindën për punën e saj, për ato ditët pa gjumë që së bashku me stafin më shumë se dy javë tashmë ka qenë në krye të këtij operacioni. Falenderoj Kevin dhe të gjithë skuadrën që ndodhet këtu në Tiranë dhe do të vazhdojë të qëndrojë edhe në ditët e ardhshme, dhe falënderoj të gjithë punonjësit e administratës për angazhimin që kanë pasur dhe mirëkuptimin që kanë treguar. Edhe një herë, faleminderit të gjithë qytetarëve dhe ne do të qëndrojmë në komunikim të vazhdueshëm publik për të bërë transparent atë pjesë të këtij procesi, e cila mund të bëhet transparente dhe duke ruajtur të gjithë pjesën tjetër teknike apo edhe sekretimin e disa proceseve që na janë kërkuar edhe nga partnerët, edhe nga Microsoft që operon në këto momente”, përfundoi Balluku.
Në konferencën për mediet, me zv.kryeministren Belinda Balluku, dhe përfaqësuesin e skuadrës speciale të Microsoft për sigurinë kibernetike, Kevin Chin, Drejtoresha e përgjithshme e Agjencisë Kombëtare të Shoqërisë së Informacionit (AKSHI) Mirlinda Karçanaj theksoi se pas 14 ditësh nga sulmi kibernetik më në fund u bë e mundur që edhe administrata publike t’i rikthehet normalitetit.
“Unë jam sot këtu për t’ju thënë se pas 14 ditësh pune të pandërprerë, ekipi i AKSHI-t, i ekspertëve të kompanive lokale, i partnerëve tanë brenda dhe jashtë vendit, më në fund u bë e mundur që edhe administrata publike t’i rikthehet normalitetit dhe proceseve të punës hap pas hapi. Përgjigjja e AKSHI-t në këtë betejë kibernetike ka qenë në dy fronte kryesore: rikuperimi i të gjitha sistemeve dhe infrastrukturave kritike qeveritare dhe paralelisht dhe izolimi i aktivitetit keqdashës”, tha ajo.
Karçanaj shtoi se, AKSHI po punon ngushtësisht me partnerët e Microsoft nëpërmjet ekspertëve të tyre më të mirë të dedektimit dhe përgjigjes ndaj incidenteve kibernetike e njohur si “DART Team”.
Karçanaj tha se falë bashkëpunimit me partnerët dhe punës së madhe që është bërë nga gjithë stafi i AKSHI-t, është rikthyer 98% e shërbimeve online.
“Faqet zyrtare të ministrive dhe sistemi i fiskalizimit u rikthyen në funksion të plotë brenda 12 orësh nga momenti i sulmit. Drejtoria e Përgjithshme e Transportit Rrugor me sistemin e lejeve të drejtimit dhe sistemin e targave po ashtu. Drejtoria e Përgjithshme e Doganave, Fondi i Sigurimit të Kujdesit Shëndetësor me sistemin e recetës elektronike, Agjencia Kombëtare e Barnave dhe Pajisjeve Mjekësore me sistemin e barnave. Mund të them që mbi 98% të shërbimeve online janë tashmë funksionale. Vetëm 4 ditë pas sulmit, në një kohë rekord kjo krahasuar me vendet e tjera, e-Albania u kthye në funksion për 1118 nga 1225 shërbime elektronike. Gjeneroheshin dokumente me vulë elektronike, certifikata të gjendjes civile, vërtetime tatimore, ekstrakte të regjistrimit të biznesit, vërtetimet e papunësisë, certifikata e gjendjes gjyqësore, dëshmia e penalitetit, aplikohet për regjistrimin e fëmijëve në klasë të parë dhe të dhjetë, aplikohet për gjithë licencat e biznesit, për pasuritë e paluajtshme, për të gjitha ndryshimet e pronarëve përfitues. Ndrësa sot që flasim, e-Albania është rikthyer për qytetarët për 1202 shërbime, të gjitha ofrohen në platformën digjitale. Të vetmet shërbime me të cilat ende po punohet janë njehsimi i diplomave dhe certifikatat e lëshuara nga institucionet e huaja, vërtetimi i ndihmës ekonomike, i pagesës së aftësisë të kufizuar, i kërkesës për të përfituar nga programet e strehimit social, lista e notave dhe vërtetimi i diplomës për studentët që kanë ndjekur Universitetin e Tiranës, kryerja e pagesave të ujit dhe energjisë elektrike dhe shërbimet që lidhen me to”, theksoi ajo.
/Argumentum.al
