Presidenti amerikan Donald Trump pret të mërkurën në Uashington homologun kinez Xi Jinping për një vizitë treditore, në takimin e parë të liderit kinez në SHBA pas gati tre vitesh. Samiti zhvillohet në një klimë të tensionuar mes dy fuqive, me tregtinë, teknologjinë, Tajvanin, mineralet e rralla dhe Iranin ndër çështjet kryesore.
Xi dhe bashkëshortja e tij pritet të priten nga Trump në bazën ushtarake në Maryland, ndërsa programi përfshin një ceremoni në Shtëpinë e Bardhë, fluturime demonstrative të avionëve ushtarakë, një darkë shtetërore dhe vizitë në Arkivat Kombëtare.
Pavarësisht mosmarrëveshjeve të thella, të dyja palët kanë vijuar përgatitjet për samitin, në një përpjekje për të përcjellë një mesazh stabiliteti mes ekonomisë më të madhe prodhuese dhe konsumatorit më të madh në botë.
Pritshmëritë për një marrëveshje të madhe janë të kufizuara. Armëpushimi tregtar 11-mujor skadon në nëntor, ndërsa Uashingtoni dhe Pekini mbeten në mosmarrëveshje për Tajvanin, trafikun e narkotikëve, mineralet e rralla dhe kontrollet amerikane të eksporteve të teknologjisë.
Bisedimet e së enjtes mund të prodhojnë marrëveshje më të kufizuara, përfshirë ulje tarifash në sektorë të caktuar, bashkëpunim kundër trafikut të drogës dhe zgjerim të dialogut ushtarak. Trump pritet gjithashtu të kërkojë lirimin e disa amerikanëve dhe personave të tjerë të ndaluar në Kinë.
Një tjetër fushë ku dy vendet mund të bien dakord për më shumë dialog është inteligjenca artificiale, pavarësisht konkurrencës së fortë mes tyre.
Takimi zhvillohet në një moment të vështirë për Trump, ndërsa mbështetja për të ka rënë në nivele të ulëta dhe pakënaqësia publike për luftën me Iranin është rritur. Xi, nga ana tjetër, mbërrin në Uashington ndërsa ekonomia kineze po përfiton nga një performancë e fortë e tregtisë së jashtme.
© 2026 Argumentum
