Të enjten paradite, Presidenti i Kinës Xi Jinping u takua në Pallatin e Madh të Popullit në Pekin me Presidentin e Këshillit Evropian António Costa dhe Presidenten e Komisionit Evropian Ursula von der Leyen, të cilët ndodhen në Kinë për të marrë pjesë në Samitin e 25-të Kinë-BE.
Xi Jinping paraqiti tre propozime për zhvillimin e ardhshëm të marrëdhënieve Kinë-BE.
Së pari, këmbëngulja në respektin e ndërsjellë dhe konsolidimi i pozicionimit të partneritetit. Kina është një vend paqedashës që mbështet harmoninë, përfshirjen, bashkëpunimin dhe përfitimet e përbashkëta. Nëse përdorim rrugën e ndjekur nga Perëndimi për të përceptuar Kinën, kuptimi për Kinën do të jetë i anshëm. Kina dhe Evropa kanë histori, kultura, rrugë, sisteme dhe faza zhvillimi të ndryshme, por ky ndryshim nuk është bërë pengesë për vendosjen e lidhjeve diplomatike dhe zhvillimin e marrëdhënieve midis Kinës dhe Evropës në të kaluarën, ndaj nuk duhet të pengojë zhvillimin e marrëdhënieve dypalëshe në të ardhmen. Sfidat aktuale me të cilat përballet Evropa, nuk vijnë nga Kina. Nuk ka konflikt themelor interesash apo kontradikta gjeopolitike midis Kinës dhe Evropës. Bashkëpunimi tejkalon konkurrencën dhe konsensusi tejkalon dallimet. Kina gjithmonë i ka parë dhe i ka zhvilluar marrëdhëniet Kinë-BE nga një lartësi strategjike dhe perspektivë afatgjatë. Vendi e ka konsideruar Evropën si një pol të rëndësishëm në një botë shumëpolare dhe ka mbështetur vazhdimisht integrimin evropian dhe autonominë strategjike të BE-së. Shpresojmë që BE-ja do të respektojë gjithashtu rrugën dhe sistemin e zgjedhur nga populli kinez, do të respektojë interesat thelbësore dhe shqetësimet kryesore të Kinës, si edhe do të mbështesë zhvillimin dhe lulëzimin e Kinës. Marrëdhëniet Kinë-BE nuk synojnë, nuk varen ose nuk i nënshtrohen asnjë pale të tretë. Të dyja palët duhet të thellojnë komunikimin strategjik, të rrisin mirëkuptimin dhe besimin e ndërsjellë, si edhe të krijojnë perceptime të sakta të ndërsjella.
Së dyti, zbatimi i hapjes dhe bashkëpunimit si edhe trajtimi i saktë i dallimeve dhe fërkimeve. Historia dhe realiteti kanë vërtetuar se varësia e ndërsjellë nuk është rrezik dhe integrimi i interesave nuk është kërcënim. Përmirësimi i konkurrueshmërisë nuk mund të mbështetet në “ndërtimin e mureve dhe barrierave”. “Shkëputja dhe thyerja e zinxhirëve” vetëm sa do të na izolojë. “Ulja e varësisë” nuk mund ta zvogëlojë bashkëpunimin. Thelbi i marrëdhënieve ekonomike dhe tregtare Kinë-BE janë avantazhet plotësuese, përfitimet e përbashkëta, ndaj ato duhet të arrijnë dhe mund të arrijnë plotësisht ekuilibër dinamik në zhvillim. Zhvillimi me cilësi të lartë i Kinës dhe hapja në nivel të lartë, do të ofrojnë mundësi të reja dhe do të zgjerojnë hapësira të reja për bashkëpunimin Kinë-BE. Kina dhe BE-ja duhet të thellojnë marrëdhëniet e partneritetit të gjelbër dhe dixhitale, si dhe të promovojnë bashkëpunimin e investimeve të ndërsjella. Shpresojmë që Bashkimi Europian do t’i mbajë të hapura tregjet e saj tregtare dhe të investimeve, do të përmbahet nga përdorimi i mjeteve kufizuese ekonomike dhe tregtare, si edhe do të ofrojë një mjedis të mirë biznesi për kompanitë kineze që të investojnë në Evropë.
Së treti, ne duhet të praktikojmë multilateralizmin dhe të ruajmë rregullat dhe rendin ndërkombëtar. Përballë zgjedhjeve kryesore të luftës dhe paqes, konkurrencës dhe bashkëpunimit, mbylljes dhe hapjes, multilateralizmi, solidariteti dhe bashkëpunimi janë përgjigjet e sakta. Kina dhe BE-ja duhet të ruajnë së bashku rregullat dhe rendin ndërkombëtar, të vendosur pas përfundimit të Luftës së Dytë Botërore, të ndërtojnë një sistem qeverisjeje globale më të drejtë dhe të arsyeshme, të punojnë së bashku për t’u përballuar me sfidat globale si ndryshimi i klimës dhe të lejojnë që pishtari i multilateralizmit të ndriçojë rrugën përpara për njerëzimin. Kina dhe BE-ja duhet të mbështesin zgjidhjen paqësore të mosmarrëveshjeve ndërkombëtare përmes mjeteve politike. Kina është gjithmonë e bazuar në të drejtën dhe të gabuarën e vetë çështjes, duke promovuar bisedimet për paqe. Kina është e gatshme të forcojë koordinimin me BE-në për të promovuar suksesin e Konferencës së Belemit të Kombeve të Bashkuara për Ndryshimet Klimatike të këtij viti, si dhe të japë kontribute më të mëdha në adresimin e ndryshimeve klimatike dhe transformimit të gjelbër global. Kina është gjithashtu e gatshme të zhvillojë komunikim politik dhe bashkëpunim praktik me BE-në në fushën e inteligjencës artificiale dhe të promovojë së bashku multipolarizim të barabartë dhe të rregullt botëror dhe globalizim ekonomik gjithëpërfshirës.
Pala e BE-së tha se tre propozimet e Presidentit Xi Jinping mbi marrëdhëniet BE-Kinë janë me rëndësi jetike. Gjatë 50 viteve të fundit që nga vendosja e marrëdhënieve diplomatike, Bashkimi Europian dhe Kina kanë zhvilluar bashkëpunime në fusha të ndryshme, me shkallën dhe thellësinë që zgjerohen vazhdimisht, duke u bërë partnerë të rëndësishëm bashkëpunimi dhe tregtie të njëra-tjetrës, si edhe duke kontribuar në prosperitetin e ekonomive të njëra-tjetrës dhe përmirësimin e mirëqenies së njerëzve. Kina është bërë një fuqi e madhe prodhuese dhe teknologjike, duke nxjerrë qindra miliona njerëz nga varfëria. Zhvillimi i Kinës ka tronditur botën dhe i ka dhënë botës frymëzim të rëndësishëm. BE-ja beson dhe mbështet zhvillimin më të madh të Kinës. BE-ja dhe Kina janë të dyja forca të rëndësishme në botë, ndaj marrëdhëniet BE-Kinë janë jashtëzakonisht të rëndësishme për të dyja palët dhe për botën. Bashkimi Europian është i përkushtuar për të thelluar marrëdhëniet BE-Kinë, për të trajtuar dallimet në mënyrë konstruktive dhe për të nxitur bashkëpunimin dypalësh për të vazhduar të arrijë rezultate më pozitive në bazë të ekuilibrit, barazisë dhe përfitimit të ndërsjellë. BE nuk kërkon të “shkëputet” nga Kina dhe mirëpret kompanitë kineze të investojnë në Evropë. Përballë një bote të trazuar dhe të pasigurt, BE-ja dhe Kina duhet të marrin përgjegjësi, të mbështesin së bashku multilateralizmin, të mbështesin qëllimet dhe parimet e Kartës së OKB-së, të punojnë së bashku për të adresuar sfidat globale si ndryshimi i klimës, të promovojnë zgjidhjen e çështjeve të nxehta rajonale dhe të ruajnë paqen dhe stabilitetin botëror. Bashkimi Europian pret me padurim të punojë me Kinën, për të vazhduar shkrimin e një kapitulli edhe më emocionues në marrëdhëniet BE-Kinë në 50 vitet e ardhshme./cgtn
