Përfaqësuesi i përhershëm i Rusisë në OKB, Vassily Nebenzia tha se Gjermania do të përfshihet drejtpërdrejt në luftën në Ukrainë nëse i dorëzon Kievit raketa me rreze të gjatë veprimi “Taurus”.
“Po, do të bëhej”, tha Nebenzia për Anadolu kur u pyet nëse një veprim i tillë do të nënkuptonte që Gjermania të bëhej një palë e drejtpërdrejtë në konflikt.
Ai akuzoi Gjermaninë dhe disa vende të tjera perëndimore se tashmë janë përfshirë në luftë përmes mbështetjes për Ukrainën. “Këto vende po bëjnë një luftë kundër Rusisë duke përdorur forcat e tyre ‘proxy’. Dorëzimi i raketave ‘Taurus’ do të ishte një hap tjetër drejt përshkallëzimit”, tha ai.
Raketat “Taurus”, me një rreze prej më shumë se 500 kilometrash, janë të njohura për saktësinë e tyre në goditjen e objektivave të fortifikuara si urat dhe bunkerët e komandave të groposura thellë.
Në lidhje me kërcënimin e SHBA-së për të përdorur forcën ushtarake kundër Iranit nëse negociatat për programin e tij bërthamor dështojnë, Nebenzia tha se Washingtoni publikisht favorizon zgjidhje politike, një qëndrim që ndan edhe Moska.
Duke kujtuar një armëpushim të pjesshëm që mbulon infrastrukturën energjetike, për të cilën u ra dakord nga presidenti rus Vladimir Putin dhe presidenti i SHBA-së, Donald Trump pas një telefonate më 18 mars, Nebenzia tha se Moska e mbështeti iniciativën dhe urdhëroi forcat e saj ta respektonin.
Ai tha gjithashtu se vendi i tij i ishte përmbajtur propozimit që nga fillimi, ndërsa Ukraina, pavarësisht se e mbështeste publikisht, vazhdoi sulmet e saj çdo ditë.
Nebenzia vuri në dukje se Ukraina kishte kryer mbi 120 sulme, përfshirë objektet energjetike ruse.
“Ukraina nuk e zbatoi armëpushimin e pjesshëm në lidhje me infrastrukturën energjetike. Prandaj, të flasim për një armëpushim është joreale në këtë pikë”, tha ai.
– “Duam që vendet evropiane të ndalojnë armatosjen e Ukrainës”
Nebenzia tha se shkeljet e Ukrainës treguan se Kievi nuk kërkon paqe. Ai u bëri thirrje “mbështetësve perëndimorë” dhe vendeve evropiane që të bëjnë presion ndaj Ukrainës për të ndaluar sulmet ndaj infrastrukturës energjetike.
Ai theksoi se vendet evropiane duhet të ndalojnë armatosjen e Ukrainës, duke vënë në dukje se asnjë hap në këtë drejtim nuk është ndërmarrë.
Nebenzia tha se shumë vende evropiane janë përfshirë në luftë.
“Vendet evropiane nuk po flasin për paqen. Nuk u intereson. Ata vazhdojnë ta shtyjnë Ukrainën drejt humnerës”, theksoi përfaqësuesi rus.
/Argumentum.al
