Presidenti kinez Xi Jinping do të bëjë një vizitë shtetërore në Rusi nga 7 deri më 10 maj dhe do të marrë pjesë në kremtimet për 80-vjetorin e fitores së Luftës së Madhe Patriotike në Moskë, me ftesën e presidentit rus Vladimir Putin, njoftoi një zëdhënës i Ministrisë së Jashtme të Kinës të dielën.
Me një vizion historik dhe nga nje largpamësi strategjike, presidentët Xi e Putin kanë udhëhequr forcimin e përhershëm të marrëdhënieve Kinë-Rusi në epokën e re me gjithë mjedisin e ndërlikuar ndërkombëtar dhe kanë demonstruar tiparet e fqinjësisë së mirë e të miqësisë të këtyre marrëdhënieve, bashkërendimit të gjithanshëm strategjik dhe bashkëpunimit me përfitime të ndërsjella, tha zëdhënësi.
Ai theksoi gjithashtu se gjatë vizitës shtetërore, presidenti Xi do të zhvillojë komunikim strategjik me presidentin Putin lidhur me marrëdhëniet Kinë-Rusi në rrethanat e reja dhe një numër çështjesh të rëndësishme ndërkombëtare e rajonale.
“Ne besojmë se konsensusi i rëndësishëm strategjik ndërmjet dy presidentëve do të thellojë më tej besimin e ndërsjellë politik mes dy vendeve, do t’i shtojë përmbajtje të re koordinimit strategjik, do të promovojë bashkëpunimin praktik në fusha të ndryshme, do të sjellë më shumë përfitime për të dy popujt e do t’i japë më shumë qëndrueshmëri e energji pozitive komunitetit ndërkombëtar,” theksoi zëdhënësi.
Duke vënë në dukje që sivjet është 80-vjetori i fitores së Luftës së Rezistencës së Popullit Kinez kundër Agresionit Japonez, i Luftës së Madhe Patriotike dhe i Luftës Antifashiste Botërore, ai shtoi që, si dy vendbetejat kryesore në Azi e Europë në Luftën e Dytë Botërore, Kina e Rusia bënë sakrifica të jashtëzakonshme e dhanë kontribut të madh historik për të siguruar fitoren e luftës, duke shpëtuar të dy vendet dhe mbarë njerëzimin.
Presidenti Xi dhe homologu i tij Putin kanë rënë në një mendje më parë që të dy palët do të kujtojnë së bashku historinë, do të nderojnë martirët, do të kenë një vështrim të drejtë të historisë së Luftës së Dytë Botërore, do të mbrojnë rezultatet e fitores së luftës e të rendit të pasluftës, dhe të ruajnë barazinë dhe drejtësinë ndërkombëtare, shtoi zëdhënësi.
Me këtë rast të veçantë historik, pjesëmarrja e presidentit Xi në festimet me rastin e 80-vjetorit të fitores së Luftës së Madhe Patriotike në Moskë me ftesë është një pjesë e rëndësishme e vizitës së tij, tha zëdhënësi, duke shtuar që ajo pasqyron gjithashtu mbështetjen nga Kina dhe Rusia për festimet nga njëra-tjetra të 80-vjetorit të fitores në Luftën Antifashiste Botërore.
Ky vit shënon edhe 80-vjetorin e themelimit të OKB-së, tha zëdhënësi, duke shtuar se Kina e Rusia, si themeluese të OKB-së dhe vende anëtare të përhershme të Këshillit të Sigurimit, mbajnë përgjegjësi të posaçme e të rëndësishme për ruajtjen e sistemit ndërkombëtar me OKB-në në qendër.
/CGTN-Argumentum.al
