Ushtria izraelite ka vrarë më shumë se 200 palestinezë dhe ka zhvendosur me forcë 300 mijë banorë në Gazën veriore, transmeton Anadolu.
“Në një tjetër krim të shtuar në historinë e përgjakshme të Izraelit, më shumë se 200 martirë u vranë vetëm në pjesën veriore të Gazës gjatë 48 orëve të fundit, në një seri të vazhdueshme masakrash”, tha zyra për media e qeverisë në Gaza.
Zyra për media tha se ushtria izraelite gjithashtu shkatërroi plotësisht dhe pjesërisht më shumë se 1 mijë njësi banimi dhe zhvendosi me forcë më shumë se 300 mijë civilë drejt Qytetit Gaza, të cilit i mungon infrastruktura e nevojshme për t’i strehuar ato.
“Rreth 140 viktima mbeten të bllokuara nën rrënoja për shkak të parandalimit të qëllimshëm nga ushtria izraelite të ekipeve të ambulancës dhe mbrojtjes civile për të arritur në vendet e bombardimit, në shkelje të hapur të ligjit ndërkombëtar humanitar”, tha zyra për media.
Më tej, gjithashtu u theksua se “dronët izraelitë u përqendruar në djegien e qindra tendave të destinuara për të strehuar njerëzit e zhvendosur në Tel al-Zaatar në kampin Jabalia, qytetin Beit Lahia dhe në zona të tjera në veri, mes heshtjes së dyshimtë ndërkombëtare dhe pjesëmarrjes aktive në gjenocidin e vazhdueshëm”.
Lidhur me kushtet në Qytetin Gaza, zyra për media theksoi se “qytetit i mungojnë tendat ose strehimoret, duke detyruar mijëra familje të dalin në rrugë, veçanërisht në rrugën al-Jalaa dhe në zonën al-Saftawi, mes mungesës totale të nevojave themelore si ushqimi, uji dhe ilaçet, nën rrethim të rreptë dhe bombardime të vazhdueshme.
Zyra për media bëri thirrje për “ndërhyrje të menjëhershme dhe efektive ndërkombëtare për të ndaluar masakrat, për të dërguar ekipe ndërkombëtare shpëtimi për të rikuperuar trupat dhe për të trajtuar të plagosurit, për të hapur menjëherë kalimet kufitare për hyrjen e ndihmës humanitare dhe mjekësore, si dhe për t’i mbajtur udhëheqësit izraelitë përgjegjës para gjykatave ndërkombëtare.
Ushtria izraelite vazhdon me ofensivën ushtarake në Gaza që nga 7 tetori i vitit 2023 dhe që atëherë ka marrën jetën e mbi 53 mijë palestinezëve, shumica prej tyre gra dhe fëmijë.
Gjatë turneut katër-ditor në Gjirin Persik të presidentit amerikan, Donald Trump, që përfundoi pas largimit të tij nga Emiratet e Bashkuara Arabe, forcat izraelite vranë më shumë se 378 palestinezë, gati katërfishi i numrit të vdekjeve të raportuara në katër ditët e mëparshme.
Nëntorin e kaluar, Gjykata Ndërkombëtare Penale lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza. Për luftën në enklavë, Izraeli gjithashtu përballet me një çështje gjenocidi në Gjykatën Ndërkombëtare të Drejtësisë./AA
