Me rastin e Ditës së Shtetësisë së Kroacisë, Ambasada e Republikës së Kroacisë në Tiranë organizoi një pritje, ku morën pjesë përfaqësues të institucioneve shqiptare, trupit diplomatik dhe miq të Kroacisë në Shqipëri.
Në fjalën e tij përshëndetëse, ambasadori Zlatko Kramarić theksoi rëndësinë historike të kësaj date për popullin kroat, duke kujtuar konstituimin e parlamentit të parë demokratik dhe shumëpartiak në vitin 1990 – një moment themelor në rrugëtimin drejt pavarësisë, demokracisë dhe shtetësisë moderne. Po ashtu, ai vuri në dukje se shtetësia kroate është e rrënjosur thellë në historinë evropiane, duke sjellë në vëmendje 1100-vjetorin e kurorëzimit të mbretit Tomislav, mbreti i parë i Kroacisë.
Duke iu referuar marrëdhënieve mes Kroacisë dhe Shqipërisë, ambasadori theksoi miqësinë e sinqertë, bashkëpunimin politik dhe vizionin e përbashkët evropian. Ai vlerësoi rolin e Shqipërisë si një faktor stabiliteti në rajonin e Ballkanit dhe theksoi mbështetjen e palëkundur të Kroacisë për rrugën e saj drejt anëtarësimit në Bashkimin Evropian.
“Kroacia është e gatshme të ndajë përvojën e saj të anëtarësimit në BE, duke ofruar mbështetje teknike dhe politike për Shqipërinë”, deklaroi ambasadori, duke shtuar se Kroacia e sheh Shqipërinë si një partnere kyçe në Evropën Juglindore.
Ai gjithashtu përgëzoi përfaqësuesit e zgjedhur në zgjedhjet e fundit parlamentare në Shqipëri, duke e konsideruar procesin si dëshmi të pjekurisë politike dhe të forcimit të institucioneve demokratike.
Në fjalimin e tij u veçuan edhe marrëdhëniet ekonomike në rritje mes dy vendeve, me interes të shtuar për investime nga kompanitë kroate në Shqipëri dhe anasjelltas, si dhe bashkëpunimi në fusha si turizmi, energjia, transporti dhe zhvillimi i qëndrueshëm.
Ambasadori njoftoi gjithashtu hapjen e lektoratit të gjuhës kroate në Universitetin e Tiranës këtë vjeshtë, si një tjetër hap përpara në thellimin e bashkëpunimit kulturor dhe arsimor mes dy vendeve.
Në përmbyllje, ai uroi të gjithë të pranishmit dhe theksoi rëndësinë e ndërtimit të një të ardhmeje të përbashkët evropiane mbi vlerat e paqes, dialogut dhe respektit të ndërsjellë.
Fjala përshëndetëse e Ambasadorit të Kroacisë në Tiranë, z. Zlatko Kramarić
Të nderuar të ftuar, miq të dashur, zonja dhe zotërinj,
Kam nderin dhe kënaqësinë e veçantë t’ju përshëndes në emër të Republikës së Kroacisë me rastin e festimit të Ditës së Shtetësisë së Kroacisë. Sot kujtojmë 30 majin 1990, ditën kur në Zagreb u konstituua Parlamenti i parë demokratik dhe shumëpartiak – një moment kyç në procesin e rivendosjes së pavarësisë, lirisë dhe demokracisë kroate.
Një pjesë e historisë sonë të re mund të shihet sot në ekspozitën dixhitale “Kroacia që nga pavarësia.”
Edhe pse Kroacia, në kuptimin modern, është ende një shtet relativisht i ri në hartën politike të botës, shtetësia e saj është thellësisht e rrënjosur në historinë evropiane. Këtë vit shënojmë 1100-vjetorin e kurorëzimit të mbretit Tomislav, i cili në vitin 925 u kurorëzua në Fushën e Duvnos – sot Tomislavgrad – si mbreti i parë i Mbretërisë Kroate.
Kjo nuk është vetëm një simbolikë e thellësisë historike të shtetësisë kroate, por edhe një kujtesë se populli kroat gjithmonë ka aspiruar për pavarësi politike, paqe dhe bashkëpunim me fqinjët. Republika e sotme e Kroacisë është trashëgimtare e kësaj tradite dhe e përcjell atë në kuadrin modern evropian.
Mbi këtë themel ndërtojmë edhe marrëdhëniet tona me Shqipërinë – me një shtet dhe një popull që na lidh një miqësi e sinqertë, besim i ndërsjellë dhe një vizion i përbashkët evropian. Bashkëpunimi ynë politik është i fuqishëm dhe përmbajtësor – si në kuadër dypalësh, ashtu edhe brenda aleancës së NATO-s dhe iniciativave rajonale që promovojnë stabilitetin dhe bashkëpunimin në Evropën Juglindore.
Ne gjithashtu e njohim rolin kyç të Shqipërisë në ruajtjen e stabilitetit dhe sigurisë në rajonin tonë. Shqipëria është një shtet themelor – garant i paqes, bashkëpunimit dhe përparimit në Evropën Juglindore. Stabiliteti në rajonin tonë nuk është vetëm një synim strategjik; është një përgjegjësi e përbashkët dhe një premtim për brezat e ardhshëm.
Kroacia mbështet fuqishëm dhe në mënyrë të qëndrueshme rrugën evropiane të Shqipërisë. Shqipëria e ka vendin e saj në Bashkimin Evropian dhe ne po bëjmë gjithçka që kjo të realizohet sa më shpejt. Për këto arsye, jemi të gatshëm të ndajmë përvojën tonë të çmuar të procesit të anëtarësimit, të përcjellim dije dhe të ofrojmë mbështetje konkrete teknike dhe politike.
Dua të shfrytëzoj këtë rast për të përgëzuar të gjithë përfaqësuesit e zgjedhur në zgjedhjet e fundit parlamentare. Çdo proces zgjedhor demokratik është dëshmi e pjekurisë politike dhe një mundësi për forcimin e mëtejshëm të institucioneve – mbi të gjitha të pavarësisë së tyre – ku dialogu dhe bashkëpunimi, veçanërisht mes aktorëve të rëndësishëm të jetës politike shqiptare, janë parakushte themelore për një shoqëri të ndershme dhe të përgjegjshme.
Gjithashtu mund të konstatojmë se dimensioni ekonomik i marrëdhënieve Kroaci–Shqipëri po zhvillohet gjithnjë e më dinamikisht. Shënojmë interesim gjithnjë në rritje të kompanive kroate për investime në Shqipëri, ndërsa kompanitë shqiptare gjithnjë e më shumë kërkojnë partnerë në Kroaci. Dy brigjet tona të Adriatikut i lidh më shumë se sa deti – na lidh interesi i përbashkët për korridoret e transportit, qëndrueshmërinë energjetike, turizmin, transformimin dixhital dhe zhvillimin e qëndrueshëm.
Bashkëpunimi kulturor dhe arsimor është veçanërisht i çmuar. Artistët, shkencëtarët, studentët dhe profesorët nga Kroacia dhe Shqipëria po bashkëpunojnë gjithnjë e më shpesh, ndërsa gjuhët, zakonet dhe shprehjet kulturore po gjejnë vend te njëri-tjetri. Diplomacia kulturore na mundëson të njihmi më mirë dhe të ndërtojmë mirëkuptim të ndërsjellë – që është themel i çdo partneriteti të vërtetë. Në këtë kontekst, më lejoni të paralajmëroj hapjen e lektoratit të gjuhës kroate në Universitetin e Tiranës, i cili pritet të nisë nga puna këtë vjeshtë.
Zonja dhe zotërinj,
Dita e shtetësisë është një rast për të kujtuar të kaluarën, por edhe për të parë me guxim drejt së ardhmes. Të ardhmen e Kroacisë dhe Shqipërisë e shohim në një Evropë të bashkuar, të fortë dhe solidare. Evropa është fati ynë! Jemi të bindur se Shqipëria shumë shpejt do të bëhet anëtare me të drejta të plota e Bashkimit Evropian – për të mirën e qytetarëve të saj, por edhe të gjithë kontinentit.
Në këtë ditë krenarie për të gjithë qytetarët e Kroacisë, falënderoj të gjithë miqtë e Republikës së Kroacisë në Shqipëri për miqësinë e sinqertë dhe bashkëpunimin. Thjesht: jemi të lidhur me njëri-tjetrin! Kuptimi i çdo miqësie të vërtetë qëndron në vetëdijen se duhet të jetojmë pranë njëri-tjetrit, e jo kundër njëri-tjetrit! Prandaj, le të ndërtojmë së bashku një të ardhme të bazuar në paqe, dialog dhe respekt të ndërsjellë.
Më lejoni që në përmbyllje të këtij fjalimi të ngre një dolli për të gjithë të pranishmit, duke ju uruar çdo të mirë të kësaj bote – shëndet, fat, lumturi dhe kënaqësi…
Rroftë Kroacia! Rroftë Shqipëria! Ju faleminderit.
© 2025 Argumentum
