Dhoma e Avokatisë në Shqipërisë deklaroi sot se Kodi i ri Penal, drafti i të cilit u prezantua nga Ministria e Drejtësisë pak ditë më parë, është represiv dhe që bie ndesh me legjislacionin penal evropian.
Kreu i Dhomës së Avokatisë Maks Haxhia, në një deklaratë për mediet sot, tha se ndryshimet e propozuara nuk përfaqësojnë një nevojë reale të sistemit të drejtësisë.
“Në këtë Kod nuk kemi asnjë prezencë të paraqitjes së nevojës se pse duhet të bëhej ky Kod. Nëse do të shtrohej problemi se këtë Kod e zolli nevoja e Reformës në Drejtësi në mënyrë absolute kjo nuk qëndron sepse këto vite që u zbatuar Reforma në Drejtësi të gjithë jemi dëshmitar që ka sjellë probleme në procedurën penale, në trajtimin e proceseve si dhe në burimet njerëzore të cilat janë shumë të mangëta në raport me nevojën dhe me organikat të prokurorive dhe gjykatave për shkak të asaj që ne e dimë të gjithë për procesin e Vetting-ut.
“Pra ky draft nuk është si rrjedhojë e nevojës së organeve të drejtësisë. Nga 1995 kur është bërë kodi i fundit, janë ndryshuar dhe janë bërë amendamente, 23 herë plus edhe 4 vendime të Gjykatës Kushtetuese lidhur me dispozita të cilat bien ndesh me Kushtetutën ose të drejtën ndërkombëtare. Nëse do pretendohet nga ata që kanë bërë këtë kod, që është bërë për të inkuadruar në kuadër të anëtarësimit të Shqipërisë në BE, nuk besoj ta thonë, sepse nuk ka logjikë që ta pranojë, që një kod i tillë, që është inkuizitor, me dispozita marramendëse, me dënime marramendëse, me teknike juridike që nuk e pranon asnjë mendje profesionale, që të jetë ky një draft që do ta pranojë Evropa. Ky në të gjithë aspektin e vet është në diskordancë me legjislacionin penal evropian, të gjitha vendeve, duke nisur nga rajoni, deri në Evropë dhe më gjerë”, tha Haxhia.
Sipas tij, drafti i propozuar përmban dënime represive, që në disa raste tejkalojnë edhe kohën e diktaturës.
“Që të bësh një kod duhet që të jenë aktorët e drejtësisë, jo se është monopoli i tyre, por kanë eksperienca të ndryshme dhe mund të sjellin problematika nga më të ndryshme. Kodi Penal nuk mund të riparohet në këtë mënyrë. Vetëm në Shqipëri ndodh që Kodi Penal, ndryshohet, shfuqizohen nene të caktuar ose shtohen me VKM, është njësoj si me VKM. Kodi Penal nuk mund të ndryshohet sa herë duam ne, sa herë del një problem. Kodi Penal është monopol i Ministrisë së Drejtësisë, i kodifikimit. Ka një drejtori kodifikimi, një drejtori që duhet të ketë personalitetet më të larta në fushat e jurisprudencës. Ky kod, nga kodi që lamë pas, nga kodi i diktaturës, po ta krahasojmë me dënimet, ky ka dënime represive. Edhe në kodin aktual, ka dënime të rënda. Madje ka dënime të tjera që nëse një vepër penale dënohet nga 10 në 20 vjet thuhet që po konkurroi edhe ky element shtohet edhe një e dyta, dy të tretat, apo edhe 30%”, tha Haxhia.
Haxhiu shtoi se Kodi i ri Penal duhet të udhëhiqet nga Ministria e Drejtësisë, teksa shtoi se ende nuk dihet se kush e përgatiti këtë kod dhe e kujt ishte iniciativa.
“Mësova që Ministria e Drejtësisë ka qenë në rolin e organizatorit. Unë nuk e di kush ka qenë në trupën e stafit që përgatiti këtë kod. Iniciativë e kujt është kjo? E treta, cili është qëndrimi i ndërkombëtarëve? Nëse kjo është pjesë e reformës në drejtësi, duhet të kishte vulën e ndërkombëtarëve. Të gjitha këto, vetëm nga pikëpamjet parimore bëjnë që ky kod nuk duhet të jetë. Duhet patjetër t’i nënshtrohet një diskutimi mbarë në opinion me gjithë aktorët e drejtësisë. Duhet të udhëhiqet nga Ministria e Drejtësisë. Në këtë draft gjejmë dispozita konfuze. Janë vënë nene diskriminuese”, tha Haxhia.
Haxhia tha se Dhoma e Avokatisë do ta kundërshtojnë me forcë që mos të miratohet ky draft.
