Presidenti i Republikës, Sh.T.Z. Bajram Begaj, në konferencën për shtyp pas përfundimit të Samitit të Procesit të Brdo-Brijunit të mbajtur në Shqipëri, theksoi rëndësinë e kësaj platforme rajonale për dialogun politik, forcimin e bashkëpunimit dhe përshpejtimin e integrimit evropian të Ballkanit Perëndimor. Ai u shpreh se sfidat e sigurisë dhe zhvillimit në rajon kërkojnë më shumë koordinim mes vendeve fqinje dhe mbështetje të ndërsjellë, ndërsa vlerësoi Planin e Rritjes të Bashkimit Evropian si një mundësi konkrete për zhvillim ekonomik dhe afrimin e vendeve të rajonit me BE-në.
Presidenti Begaj nënvizoi progresin që ka bërë Shqipëria në rrugën drejt anëtarësimit në Bashkimin Evropian, duke theksuar hapjen e pesë nga gjashtë grupkapitujve negociues dhe angazhimin e vendit për reforma të thella. Ai e cilësoi integrimin evropian si një mision kombëtar që reflekton vlerat demokratike dhe mbështetet gjerësisht nga shoqëria shqiptare. Në përmbyllje, ai falënderoi Presidentin e Kroacisë dhe Presidenten e Sllovenisë për mbështetjen e tyre në këtë proces.
Fjala e plotë e Presidentit Begaj, në konferencën për shtyp
Përshëndetje të gjithëve!
Së bashku me Presidentin e Kroacisë dhe Presidenten e Sllovenisë organizuam Samitin e Procesit të Brdo-Brijuni-t në Shqipëri.
Ky samit përfaqëson një platformë të rëndësishme rajonale për shkëmbimin e ideve dhe vizioneve mbi të ardhmen e rajonit tonë.
Bashkë me liderët e tjerë të rajonit diskutuan sfidat aktuale gjeopolitike, si dhe rritjen e bashkëpunimit rajonal.
Shqipëria mbështet dialogun rajonal dhe marrëdhëniet e fqinjësisë së mirë si elemente thelbësore për ruajtjen e paqes, zhvillimin ekonomik dhe integrimin rajonal.
Në samitin e sotëm theksuam se Ballkani Perëndimor ka bërë hapa të rëndësishëm përpara në drejtim të bashkëpunimit rajonal, sigurisë dhe forcimit të marrëdhënieve ekonomike. Megjithatë, rajoni ynë përballet me sfida, sfida të sigurisë, të cilat kërkojnë rritje të bashkëpunimit dhe koordinim më të ngushtë mes nesh.
Plani i Rritjes i Bashkimit Evropian për vendet e rajonit tonë përbën një mundësi të çmuar për zhvillim ekonomik, pasi krijon akses në instrumente financiare të Bashkimit Evropian, lehtësira tregtare dhe programe të përbashkëta për zhvillim.
Gjithashtu, diskutuam për rrugët e bashkëpunimit rajonal, me qëllim krijimin e kushteve që të rinjtë të ndërtojnë të ardhmen në vendin tonë, në vendet e tyre.
Në këtë kuadër, vlerësojmë veçanërisht takimin e drejtorëve të agjencive kombëtare të punësimit, si një nismë që do të vazhdojë edhe në të ardhmen për të forcuar bashkëpunimin ndërinstitucional në nivel rajonal.
Shqipëria ka bërë përparim të ndjeshëm dhe të qëndrueshëm në udhëtimin e saj drejt anëtarësimit në Bashkimin Evropian.
Brenda një kohe të shkurtër, kemi hapur pesë nga gjashtë grupkapitujt negociues, çka përbën një njohje konkrete të përpjekjeve tona për reforma, nga forcimi i institucioneve demokratike dhe pavarësia e gjyqësorit, te modernizimi i administratës publike, lufta kundër korrupsionit dhe krimit të organizuar, si edhe harmonizimi i politikave ekonomike me standardet e Bashkimit Evropian.
Aspirata e Shqipërisë për t’u anëtarësuar në Bashkimin Evropian nuk është vetëm një objektiv politik, por një mision kombëtar.
Integrimi në BE gëzon mbështetjen e gjerë të shoqërisë shqiptare, pasi pasqyron vlerat themelore të demokracisë, të drejtave të njeriut dhe sundimit të ligjit.
Këto vlera përbëjnë themelet e së ardhmes evropiane që Shqipëria po ndërton me vendosmëri.
Shqipëria synon të përfundojë negociatat teknike deri në vitin 2027 dhe të bëhet anëtare e plotë e Bashkimit Evropian deri në vitin 2030.
Në mbyllje, dua të shpreh mirënjohjen time për të gjithë pjesëmarrësit e sotëm të takimit dhe në mënyrë të veçantë të falënderoj Presidentin e Kroacisë dhe Presidenten e Sllovenisë për gjithçka, për angazhimin e tyre konstruktiv dhe shumë të rëndësishëm në rrugëtimin tonë drejt Bashkimit Evropian.
Faleminderit!
/Argumentum.al
