Ekspozita ndërkombëtare MAMA “Mother Nature” u prezantua në ambientet e Kryeministrisë së Shqipërisë, duke sjellë në Tiranë një projekt artistik me jehonë globale që vendos natyrën në qendër të vëmendjes krijuese dhe qytetare. E kuruar si një hapësirë reflektimi dhe dialogu, ekspozita është e vendosur në mjediset e COD – Center for Openness and Dialogue, ku arti bashkëkohor shndërrohet në një mjet ndërgjegjësimi mbi sfidat mjedisore të kohës sonë.
Në ceremoninë e hapjes, Leyla Aliyeva Zëvendëspresidente e Fondacionit “Heydar Aliyev” në Azerbajxhan theksoi se pikturat, skulpturat dhe instalacionet e ekspozuara pasqyrojnë fuqinë, bukurinë dhe brishtësinë e natyrës. Sipas saj, MAMA “Mother Nature” është dëshmi se arti ka fuqinë të kapërcejë kufijtë gjeografikë dhe politikë, duke shërbyer si një platformë ndërkombëtare për mbrojtjen e mjedisit.
Ajo nënvizoi lidhjet e forta mes Azerbajxhanit dhe Shqipërisë, duke i cilësuar ato si marrëdhënie të bazuara në miqësi të sinqertë, respekt të ndërsjellë dhe vlera të përbashkëta njerëzore. Në fjalën e saj, Aliyeva solli në vëmendje edhe sfidat globale mjedisore, duke përmendur shifra alarmante mbi shkatërrimin e pyjeve, zhdukjen e specieve dhe ndotjen e oqeaneve, si dhe ndikimin e këtyre proceseve në ekosistemin e Deti Kaspik.
Të pranishmit i përshëndeti edhe Kryeministri i Shqipërisë, Edi Rama, i cili e cilësoi ekspozitën si një moment të rëndësishëm në forcimin e dialogut kulturor mes dy vendeve. Ai u shpreh i nderuar që në këtë ekspozitë janë paraqitur edhe veprat e tij artistike, si dhe ato të artistit të njohur shqiptar Arben Golemi, duke e konsideruar këtë bashkëprezencë si simbol të unitetit mes artit dhe përgjegjësisë qytetare.
Ekspozita realizohet në bashkëpunim me IDEA Public Union, Heydar Aliyev Center dhe Ambasadën e Republikës së Azerbajxhanit në Shqipëri, duke krijuar një urë bashkëpunimi kulturor dhe diplomatik.
Nën kujdesin e Heydar Aliyev Foundation, projekti mbledh artistë nga mbi 50 vende, të cilët përmes gjuhëve të ndryshme artistike – nga instalacionet te piktura – eksplorojnë lidhjen e brishtë mes njeriut dhe natyrës. Pas prezantimeve në qendra të rëndësishme kulturore si Baku, Romë, Londër dhe Berlin, ndalesa në Tiranë shënon një tjetër hap në rrugëtimin e saj ndërkombëtar, duke e kthyer kryeqytetin shqiptar në një pikë takimi të artit, diplomacisë kulturore dhe angazhimit për një të ardhme më të qëndrueshme.
E hapur për publikun nga 18 shkurti deri më 17 mars 2026, MAMA “Mother Nature” nuk është thjesht një ekspozitë arti, por një hapësirë reflektimi mbi marrëdhënien e njeriut me natyrën. Përmes ngjyrave, formave dhe koncepteve artistike, vizitorët ftohen të mendojnë mbi rolin e tyre në mbrojtjen e planetit dhe në ndërtimin e një të ardhmeje më të qëndrueshme.
Në një kohë kur sfidat mjedisore janë bërë globale, kjo ekspozitë sjell në Tiranë një mesazh universal: arti nuk është vetëm estetikë, por edhe ndërgjegje. MAMA “Mother Nature” vjen si një thirrje e qartë për veprim, bashkëpunim dhe shpresë.
/Argumentum.al
