Ministri i Jashtëm kinez Wang Yi theksoi të dielën rolin kyç të diplomacisë së kreut të shtetit në formimin e politikës së jashtme të vendit, duke e përshkruar atë si “themelin” e diplomacisë së Kinës.
Wang Yi i tha këto në një konferencë për shtypin mbi diplomacinë kineze në kuadër të sesionit të katërt të legjislaturës së 14-të të Asamblesë Kombëtare Popullore të Kinës në Pekin.
Ai vuri në dukje që vitin e kaluar, në sfondin e situatës së ndërlikuar ndërkombëtare në ndryshim të shpejtë, presidenti kinez Xi Jinping ka kryer gjerësisht diplomacinë e kreut të shtetit, duke shënuar një sërë momentesh të rëndësishme historike.
Diplomacia e kreut të shtetit ka krijuar modelin e ri të dialogut dhe koordinimit midis vendeve të mëdha gjatë vitit të kaluar dhe ka sjellë një vrull të ri të fqinjësisë së mirë e të bashkimit të Jugut Global, duke bërë thirrje të fuqishme për mbrojtjen e paqes dhe drejtësisë, tha Wang Yi.
Kryediplomati kinez theksoi më tej që, nën udhëheqjen e presidentit Xi Jinping, diplomacia e Kinës i ka ofruar botës qëndrueshmëri dhe siguri shumë të nevojshme, duke luajtur një rol të pazëvendësueshëm përballë turbullirave globale.
Ai tha gjithashtu se vargu i nismave dhe propozimeve të rëndësishme të paraqitura nga presidenti Xi Jinping demonstrojnë largpamësi strategjike dhe vizion të gjerë global, duke treguar drejtimin e duhur për zhvillimin e botës.
Wang Yi theksoi që këtë vit presidenti Xi Jinping do të drejtojë një numër veprimtarish të mëdha diplomatike në Kinë, duke përfshirë takimin jozyrtar të udhëheqësve të APEC-ut dhe Samitin e dytë Kinë-Shtetet Arabe. Presidenti kinez do të bëjë gjithashtu disa vizita të rëndësishme jashtë vendit, shtoi ai./cgtn
