Presidenti i Libanit, Joseph Aoun, propozoi zhvillimin e negociatave të drejtpërdrejta me Izraelin gjatë një videokonference të mbajtur sot me presidenten e Komisionit Evropian, Ursula von der Leyen, dhe presidentin e Këshillit Evropian, Antonio Costa.
Sipas një deklarate të qeverisë libaneze, Aoun paraqiti një iniciativë që synon ndalimin e përshkallëzimit të fundit të sulmeve izraelite ndaj Libanit. Propozimi bazohet në katër pika kryesore: një armëpushim të plotë, mbështetje logjistike të menjëhershme për forcat e armatosura libaneze, çarmatimin e plotë të Hezbollahut dhe nisjen e negociatave të drejtpërdrejta mes Libanit dhe Izraelit nën mbikëqyrje ndërkombëtare.
Aoun akuzoi grupin e armatosur Hezbollah, i mbështetur nga Irani, se po përpiqet ta çojë vendin drejt kolapsit për t’i shërbyer interesave strategjike të Teheranit, ndërsa përleshjet mes Hezbollahut dhe Izraelit po intensifikohen.
Në videokonferencë morën pjesë edhe liderë të tjerë rajonalë, përfshirë presidentin egjiptian Abdel-Fattah al-Sissi dhe kryeministrin e Irakut Mohammed al-Sudani. Aoun theksoi se më shumë se 600 000 njerëz janë zhvendosur tashmë në Liban si pasojë e përshkallëzimit të fundit të konfliktit.
“Disa prej tyre po enden nëpër rrugë, pa strehë dhe pa nevojat më bazike”, tha ai. Pak më shumë se një javë më parë, Hezbollah, një aleat i rëndësishëm i Teheranit, lëshoi raketa drejt Izraelit në përgjigje të vrasjes së udhëheqësit suprem të Iranit, ajatollah Ali Khamenei. Që atëherë, ushtria izraelite ka intensifikuar sulmet në territorin libanez.
Hezbollahu, një milici e fuqishme e mbështetur nga Irani dhe njëkohësisht lëvizje politike, ka një prani të fortë në Liban dhe e konsideron veten si forca kryesore e rezistencës kundër armikut të saj kryesor, Izraelit. Libani dhe Izraeli mbeten zyrtarisht në gjendje lufte.
/Argumentum.al
