Pasiguria është një rrezik i sigurt, me të cilin po përballet bota në vitin 2026; rendi ndërkombëtar i pasluftës po shkatërrohet – këto ishin paralajmërimet e lëshuara nga Forumi Ekonomik Botëror dhe Konferenca e Sigurisë e Mynihut në raportet e tyre vjetore. Që nga fillimi i vitit, konfliktet dhe trazirat kanë shpërthyer njëra pas tjetrës nga Amerika Latine në Lindjen e Mesme, duke shkaktuar shqetësime të përhapura në lidhje me të ardhmen e botës.
Si anëtare e përhershme e Këshillit të Sigurimit të OKB-së, si e sheh Kina situatën aktuale ndërkombëtare? Çfarë roli do të luajë ajo në ruajtjen e paqes, sigurisë dhe zhvillimit botëror? Një konferencë shtypi e mbajtur të dielën nga Ministri i Jashtëm i Kinës, gjatë organizimit të sesionit vjetor legjislativ në Pekin, tërhoqi vëmendje globale.
Në gati 90 minuta, kryediplomati kinez Wang Yi iu përgjigj 21 pyetjeve, duke shtjelluar hollësisht politikën e jashtme të Kinës. Nga marrëdhëniet e fuqive të mëdha tek bashkëpunimi rajonal, nga konfliktet e nxehta tek qeverisja globale, kjo konferencë i tregoi qartë botës se çfarë mbështet dhe kundërshton Kina dhe si do të veprojë ajo. Sipas ministrit Wang, Kina po “ofron qëndrueshmëri dhe garanci të vlefshme për një botë të trazuar, duke u bërë një shtyllë e pazëvendësueshme në kaosin global”.
“Një grusht i fortë nuk do të thotë arsye më e fortë”. “Fuqitë e mëdha duhet të marrin drejtimin në respektimin e rregullave, ruajtjen e besueshmërisë dhe zbatimin e sundimit të ligjit”. “Krijimi i sistemeve, grupeve ose rretheve të vogla jashtë Kombeve të Bashkuara, nuk mund të fitojë mbështetje të gjerë dhe është i paqëndrueshëm”. “Kina nuk pajtohet me logjikën e ‘bashkëqeverisjes nga fuqitë e mëdha”. “Ne kurrë nuk do të lejojmë askënd të mbështesë kolonializmin ose rikthimin e agresionit”…
Foto nga VCG
Këto deklarata të Ministrit të Jashtëm të Kinës, referuar trendit të rrezikshëm të hegjemonizmit në rritje dhe politikës së pushtetit, demonstrojnë qartë pozicionin e Kinës si një fuqi e madhe, e përgjegjshme për të mbrojtur pozicionin thelbësor të Kombeve të Bashkuara, arritjet e fitores së Luftës së Dytë Botërore, si dhe për të ndërtuar një botë shumëpolare të barabartë dhe të rregullt.
Aktualisht, rendi ndërkombëtar i pasluftës po dëmtohet rëndë dhe pozicioni i Kombeve të Bashkuara po dobësohet vazhdimisht. Shtatorin e kaluar, presidenti kinez Xi Jinping propozoi Nismën e Qeverisjes Globale, duke theksuar pesë koncepte kryesore që janë përkatësisht, barazia sovrane, sundimi i ligjit ndërkombëtar, multilateralizmi, vënia e popullit në qendër dhe orientimi nga veprimet. Kjo iniciativë shënoi rrugën për përmirësimin e qeverisjes globale dhe mori mbështetje nga më shumë se 150 vende dhe organizata ndërkombëtare. Sekretari i Përgjithshëm i OKB-së, Antonio Guterres, vlerësoi se konceptet kryesore të kësaj nisme, janë në përputhje me bindjet thelbësore të Kombeve të Bashkuara.
Foto nga VCG
“Statusi i një fuqie të madhe, qëndron në përfitimet që i sjell botës”. “Izolimi çon në mungëse përkrahjeje, ndërsa bashkimi krijon forcë”. “Promovimi i plotësimit të kërkesave reciproke gjatë hapjes dhe i realizimit të arritjeve nëpërmjet integrimit të interesave”. Gjatë konferencës për shtyp, kryediplomati kinez shpjegoi thellësisht konceptet e Kinës për nxitjen e globalizimit ekonomik gjithëpërfshirës, duke demonstruar vendosmërinë e palëkundur të vendit për të ndjekur rrugën e bashkëpunimit të hapur dhe përfitimeve reciproke.
Këto ditë në Pekin po shqyrtohet dhe po diskutohet drafti i Planit të 15-të Pesëvjeçar (2026-2030). Ky nuk është vetëm një plan i ri për zhvillimin e Kinës, por edhe një vizion për bashkëpunimin global. Në fakt, si ekonomia e dytë më e madhe në botë, përqendrimi i Kinës në menaxhimin e mirë të punëve të veta, është në vetvete burimi më i madh i stabilitetit në një botë të trazuar.
Foto nga VCG
Gjatë pesë viteve të fundit, ekonomia e Kinës është rritur me një normë mesatare vjetore prej 5.4%, duke kontribuar rreth 30% në rritjen ekonomike globale, shifër kjo që e tejkalon kontributin e kombinuar të vendeve të G7. Në pesë vitet e ardhshme, Kina do të vazhdojë të promovojë hapjen në nivel të lartë, duke shërbyer si “fabrikë e botës” dhe si “treg i botës”, si dhe do të vazhdojë të jetë motori më i qëndrueshëm i rritjes globale, përfundon komenti i Grupit Mediatik të Kinës
