Destrojeri britanik “HMS Dragon” është nisur nga baza në Portsmouth drejt Lindjes së Mesme, pas kritikave nga politikanë të opozitës dhe nga qeveria e Qipros për reagimin e ngadaltë ndaj një sulmi me dron ndaj bazës britanike në Akrotiri, në jug të Qipros, më 1 mars.
Një dron i prodhimit iranian goditi pistën e bazës së Forcave Ajrore Mbretërore (RAF) në Akrotiri, duke rritur shqetësimet për sigurinë e interesave britanike në rajon.
Vendosja e shumëpritur e anijes vjen një ditë pasi presidenti amerikan Donald Trump deklaroi se lufta, e cila filloi më 28 shkurt, mund të përfundojë së shpejti.
Marina Mbretërore tha se anija ka aftësi të rrëzojë dronë dhe raketa balistike të lëshuara nga Irani dhe aleatët e tij, ndërsa sulmet iraniane vazhdojnë të synojnë interesat britanike në rajon.
“HMS Dragon është një nga anijet më të afta në botë për mbrojtje ajrore dhe do të forcojë ndjeshëm kapacitetet tona mbrojtëse në rajon, duke përmirësuar aftësinë për të zbuluar, gjurmuar dhe shkatërruar kërcënimet ajrore, përfshirë dronët”, njoftoi Ministria britanike e Mbrojtjes në një deklaratë.
Sipas ministrisë, personeli i Marinës Mbretërore ka punuar me ritëm të shpejtë për të përgatitur anijen, duke përfunduar punë që normalisht zgjasin gjashtë javë brenda vetëm gjashtë ditësh.
Më herët, ministria njoftoi se një tjetër anije britanike po përgatitet për një vendosje të mundshme në rajon.
Bëhet fjalë për “RFA Lyme Bay”, një anije zbarkimi me kapacitete humanitare dhe mjekësore, e cila është vendosur në gatishmëri të lartë për të ndihmuar në detyra detare në Mesdheun Lindor nëse do të jetë e nevojshme.
Gjatë javës së fundit, Britania ka dërguar gjithashtu specialistë shtesë kundër dronëve, helikopterë Wildcat dhe Merlin në Qipro, avionë Typhoon në Katar dhe ka nisur fluturime mbrojtëse në mbështetje të Emirateve të Bashkuara Arabe.
Gjatë natës, një njësi britanike tokësore rrëzoi një dron në hapësirën ajrore të Irakut që po drejtohej drejt forcave të koalicionit, njoftoi ministria.
“Pilotët britanikë kanë realizuar më shumë se 230 orë fluturime në operacione mbrojtëse në rajon”, shtoi ajo.
