Deklaratat e ekspertit të sigurisë Ervin Karamuço mbi protestat kundër projektit turistik në Zvërnec kanë ngjallur reagime në opinionin publik. Duke komentuar zhvillimet e fundit, Karamuço u shpreh se pas protestave mund të fshihen edhe interesa të jashtme që synojnë të sabotojnë investimin e madh të planifikuar në zonën e Vlorës.
Sipas tij, kishte faktorë rajonalë dhe gjeopolitikë që nuk e shihnin me sy të mirë ardhjen e një investimi të lidhur me familjen e Presidentit amerikan Donald Trump në Shqipëri. Karamuço deklaroi se projekti ishte bërë “halë në sy” për vende të caktuara dhe la të kuptohej se në protesta mund të kishte elementë që i shërbenin këtyre interesave.
Ndaj këtyre deklaratave reagoi ekonomisti dhe ish-ministri Arben Malaj, i cili kundërshtoi ashpër çdo përpjekje për të lidhur protestuesit me agjentura të huaja.
“Ishin mijëra të rinj, ishin mijëra familjarë. Ishte protestë vetëm e të rinjve shqiptarë që e duan vendin e tyre dhe dëshirojnë të jetojnë në vendin e tyre”, shkruan Malaj.
Sipas tij, thelbi i protestës nuk duhet deformuar nga etiketime politike apo akuza për ndikime të huaja. Ai thekson se protestuesit ishin qytetarë të zakonshëm që po shprehnin shqetësimet e tyre për të ardhmen e vendit.
“Vetëm të verbërit partiakë nuk e shikojnë dhe nuk e vlerësojnë thelbin e kësaj proteste të shqiptarëve”, vijon ai.
Malaj kundërshton edhe argumentin se protesta mund të dëmtojë imazhin e Shqipërisë në arenën ndërkombëtare.
“Jo deri këtu zoti Karamuço”, shkruan ai, duke refuzuar idenë se reagimi qytetar mund të paraqitet si kërcënim për reputacionin e vendit.
Duke iu referuar pretendimeve për praninë e agjentëve të huaj në protestë, Malaj ngre një pyetje të drejtpërdrejtë ndaj institucioneve të sigurisë.
“Ju krenoheni se keni informacione të sigurta nga institucionet e sigurisë se në mes të protestuesve ka agjentë të huaj. Një pyetje kam: përse kolegët tuaj me informacion dhe besim nuk i arrestojnë?”, shprehet ai.
Ekonomisti kundërshton gjithashtu pretendimet se një projekt i vetëm turistik mund të përcaktojë të ardhmen ekonomike të Shqipërisë. Sipas tij, investimet e qëndrueshme tërhiqen nga shteti ligjor, siguria juridike, respektimi i pronës private dhe funksionimi normal i institucioneve demokratike.
“Investitorët investojnë për biznese disa qindra-vjeçare dhe nuk e garantojnë biznesin e tyre as me mbretërit e mbretërive familjare”, argumenton Malaj.
Ai e cilëson si të pabazuar tezën se ekzistojnë grupe gjeopolitike që po luftojnë për të ndaluar projektin dhe shprehet se një interpretim i tillë largon vëmendjen nga shqetësimet reale të qytetarëve.
Në fund të reagimit të tij, Malaj shpreh mbështetje për protestuesit, duke theksuar se ata meritojnë respekt dhe jo etiketime.
“Ata protestues meritojnë mirënjohje; ata nuk protestojnë për agjentura, por për shpresat për të ardhmen e tyre në vendin e tyre”, përfundon ai.
Debati mes mbështetësve dhe kundërshtarëve të projektit në Zvërnec vazhdon të mbetet i fortë, ndërsa polemikat tashmë janë shtrirë jo vetëm te ndikimi ekonomik dhe mjedisor i investimit, por edhe te interpretimi i motiveve të protestuesve që kanë dalë kundër tij.
Postimi i plotë i z. Malaj:
1.Ishin mijëra të rinj, ishin mijëra familjarë, ishte protestë vetëm e të rinjve shqiptarë që e duan vendin e tyre dhe dëshirojnë të jetojnë në vendin e tyre.
2.Vetëm të verbërit partiakë nuk e shikojnë dhe nuk e vlerësojnë thelbin e kësaj proteste të shqiptarëve!
3.Jo deri këtu z. Karamuca, sa ju vlerësoni se vetëm nga këto protesta do të krijohet vlerësimi ndërkombëtar se: “Shqipëria është një kosh plehrash?!”
4. E vlerësoj profesionalizmin tuaj, por jo përjushtimin tuaj emocional për të akuzuar protestuesit se po u shërbejnë agjenturave/vendeve të huaja.
5. Isha vetë aty, ishin dhjetëra mijëra të rinj, ishin shumë familje të reja bashkë me fëmijët e tyre.
6.Është e pamundur të gënjehen lehtë ata mijëra protestues të rinj që shpresojnë, besojnë dhe reagojnë kundër babëzisë arrogante.
7 Ju krenoheni se keni informacione të sigurta nga institucionet e sigurisë se në mes të protestuesve ka agjentë të huaj. Një pyetje kam: përse kolegët tuaj me informacion dhe besim nuk i arrestojnë, apo duan t’i kenë tabelë justifikuese të teorisë suaj se protestuesit po keqpërdoren nga agjenturat e huaja?
8. Sa për vlerësimet euforike për efektin çuditbërës të këtij projekti me lejoni si ekonomist, tju qartësoj se asnjë projekt turistik nuk ndikon dhe nuk përcakton ekonominë e asnjë vendi, sa do i madh të jetë ai.
9.Sa për merakun tuaj se ka grupe armiqësore gjeopolitike që duan ta ndalojnë projektin e familjes së vajzës së presidentit Trump, është më shumë se thjesht fantazi grevëthyese.
10.Investitorët investojnë për biznese disa qindra-vjeçare dhe nuk e garantojnë biznesin e tyre as me mbretërit e mbretërive familjare.
11. Kjo vërtetohet në faktin që vendet që thithin më shumë investime të huaja direkte (IHD) në Evropë janë vendet që respektojnë të drejtën e pronës, që kanë ndarje reale të pushteteve, që kanë një demokraci funksionale dhe jo “mbretëri kryeministrore”.
12. BE – i ka kërkuar qeverisë shqiptare dhe do te kushtezojne procesin e integrimit me anullimin e ligjit te investitoreve strategjike. Ju e kuptoni shumë mirë thelbin e këtij kushtëzimi!!
13. Ata protestues meritojnë mirënjohje; ata nuk protestojnë për agjentura, por për shpresat për të ardhmen e tyre në vendin e tyre!
14. As ju dhe askush nuk mund t’i përçmojë. Nuk mund t’i dekurajojë me asnjë lloj shpifjeje dhe intrige.
/Argumentum.al
