Nga Prof. Dr. Enver Bytyçi
Sali Berisha nuk është më i sanksionuar nga SHBA. Pak më shumë se pesë vite atë e ndoqi “mallkimi qeveritar” i non-gratës, me qëllim denigrimin e tij në integritet dhe dinjitet. Por Berisha qëndroi. Luftoi fort për të vërtetën. Kundërshtoi jo vetëm sanksionet e ish-sekretarit të shtetit, Antony Blinken, por injoroi gjithashtu “pordhët” e Juri Kim e deri te Gabriel Escobar, i cili thoshte se “të qenit anëtar i Partisë Demokratike nuk të bën pro-amerikan”! Luftoi gjithashtu lideri demokrat veçmas kundër mafies së narco-shtetit shqiptar. Kundër kreut të organizatës mafioze dhe kriminale në Shqipëri, i veshur me kokolet e kryeministrit! Luftoi ndaj kolonës së pestë të Edi Ramës në Partinë Demokratike aq shumë sa qytetarët shqiptarë gati harruan se në krye të opozitës është tashmë “një i sanksionuar prej SHBA-ve”!
Në luftën dhe përpjekjet e tij për të dëshmuar integritet dhe dinjitet, Sali Berisha u përball me shumë sfida. Pushteti i mafies ishte dhe mbetet sfida e tij. E helmuan me gazlotësjellës në përpjekjet e tij për të marrë zyrat e partisë. E linçuan me bedelë gjyqtarësh për të mos ia kthyer simbolet e Partisë Demokratike. E në këtë rast e këshilluan që të hiqte dorë nga këto simbole. Por ai tha jo, simbolet dhe vula e Partisë janë identiteti i saj. Luftoi me gjithë forcën e tij për ta rikthyer këtë identitet dhe ia arriti. Kur dështuan në këto përpjekje djallëzorët i kërkuan SPAK-ut që ta izolonte me arrest shtëpie. Dhe ia bënë kurthin. Siç dinë këta djallëzorë, me sjellje antiligjore e anti-kushtetuese. Treqind e tridhjetë e tri ditë e mbajtën në izolim.
Por ai sërishmi nuk u dorëzua. Mbajti 333 fjalime nga dritarja e shtëpisë së tij, përtej derës së të cilës nuk lejohej të dilte. Demonstroi forcë, guxim, profesionalizëm politik, derisa e detyroi regjimin të tërhiqej. Megjithatë i thanë se ai duhej të shkonte dy herë në muaj në dyert e SPAK. E respektoi këtë vendim dhe lajmet flasin për diskutime, sipas të cilave “u bë gabim që Berisha të thirrej rregullisht në SPAK”! Sepse në vend të hetojë prokurori, Berisha e heton prokurorin. Në vend të ngrejë akuzë SPAK, Berisha ngre akuza të përhershme kundër tij, ose më saktë kundër emrave që e keqpërdorin SPAK-un. Sa herë shkoi te Dumani, lideri demokrat njoftoi publikun për skandalet e tij si dhe të Irena Gjokës. Dhe fitoi me dinjitet!
Më 11 qershor 2026 atij ia komunikuan lajmin se mund të vizitojë Shtetet e Bashkuara të Amerikës. Që do të thotë se kjo konfirmon faktin e përpjekjeve të qeverisë dhe Edi Ramës, së bashku me Sorosin, për ta linçuar Sali Berishën. Për ta denigruar figurën, personalitetin, dinjitetin dhe integritetin e tij. Por e drejta fitoi. Prej të enjtes së shkuar Berisha është i lirë të udhëtojë si individ e si politikan në Uashington e kudo në SHBA. Çfarë do të thotë kjo për kundërshtarët e tij?! A do të dorëzohen ata?! A do ta pranojnë faktin se Sali Berisha është dhe mbetet unikal dhe model për çdo qenie njerëzore në qëndresën e tij në mbrojtje të dinjitetit dhe integritetit personal, familjar dhe kombëtar?!
Jam i sigurt se jo. Ushtria e rrjeteve sociale ka nis aksionin dhe betejën e saj për ta vazhduar denigrimin e mëtejshëm e në forma të tjera të dinjitetit dhe integritetit të liderit demokrat. Vetëm 24 orë pas heqjes së non-gratës kanë filluar të qarkullojnë lloj-lloj statusesh dhe montimesh anti-Berishë. Si gjithmonë! Si në vitin 1991-1992! Si në vitet 1996-2005. Edhe në pesë vitet e qenies nën sanksione. Sot filloi faza e re e linçimit ndaj tij. Faza e shpifjeve dhe trillimeve digjitale dhe e rrjeteve sociale. Në bllok, në unison, me regji dhe me skenar të caktuar. Mijëra patronazhistë tani kanë vetëm një objektiv: – Ta dëmtojnë sa më shumë figurën historike dhe aktuale të Sali Berishës.
Ndodh kjo, sepse beteja e kundërshtarëve të liderit demokrat është beteja për historinë. Të shkretët besojnë se historia bëhet me shpifje dhe trillime, me karikatura dhe montime bajate, të cilat Gonzales i ka futur edhe në protestën madhështore të rinisë shqiptare! Harrojnë se historia flet me fakte. Harrojnë se nuk mjafton të thuash “Berisha është mashtrues”! Do të duhen fakte dhe prova për çdo akuzë. Kur u çmontuan akuzat e ish-sekretarit të Shtetit të SHBA-ve, nuk do të jetë aspak e vështirë të demontohen akuzat e shfiparakëve banalë!
