Ministria Kineze e Mbrojtjes kritikoi të martën lëvizjet më të fundit të politikës së mbrojtjes të Japonisë, duke thënë se përshpejtimi i rimilitarizimit të Japonisë po e kthen këtë vend në një “fuçi baruti”.
Deklarata u bë nga koloneli i lartë Chen Xi, zëdhënës i Ministrisë kineze të Mbrojtjes, në përgjigje të raporteve se skica e Librit të Bardhë të Mbrojtjes të Japonisë për vitin 2026 e karakterizon Kinën si “një sfidë strategjike të pashoqe e më të madhe” dhe thotë se Tokioja do ta kundërshtojë atë me “forcën gjithëpërfshirëse kombëtare”. Pyetja përkatëse e bërë nga gazetarët përmendi gjithashtu paraqitjen së fundmi nga Forca Tokësore e Vetëmbrojtjes Japoneze të së ashtuquajturës “bombë rrëshqitëse” me shpejtësi të lartë “Tip 25”, e cila vlerësohet si një hap thelbësor i Japonisë drejt zhvillimit të aftësive proaktive të goditjes me rreze të gjatë.
Sipas Chen Xi-së, Japonia ka trumbetuar vazhdimisht të ashtuquajturin “kërcënim ushtarak nga Kina”, duke nxitur qëllimisht përballjen dhe duke krijuar ankthe sigurie për të përligjur heqjen e kufizimeve mbi forcat e saj të mbrojtjes dhe për të kërkuar shtimin e arsenalit ushtarak.
Ai theksoi se pala japoneze përsërit sulmet dhe shpifjet e saj kundër Kinës në këtë të ashtuquajtur libër të bardhë, gjë që nuk ia vlen të komentohet, duke shtuar se, në fakt, ata që pretendojnë se janë të kërcënuar janë burimi i vërtetë i kërcënimit.
Chen tha se Japonia ka rritur ndjeshëm shpenzimet e mbrojtjes, ka lehtësuar kufizimet mbi eksportet e armëve vdekjeprurëse, ka nxitur dislokimin e raketave me rreze të mesme e të gjatë, ka zgjeruar aftësitë ushtarake sulmuese, kërkon të rishikojë kushtetutën e vet paqësore dhe madje mburret se është një vend “i aftë për luftë”.
Ai paralajmëroi që një Japoni që përshpejton remilitarizimin po bëhet një fuçi baruti për rajonin e Azi-Paqësorit, duke shtuar se njerëzit që e duan paqen duhet të mbeten shumë vigjilentë dhe të marrin veprime të vendosura për të frenuar lëvizjet e pamatura të neomilitarizmit japonez, për të parandaluar që ai t’i shkaktojë shkatërrime botës dhe për të mbrojtur rendin ndërkombëtar të pasluftës dhe paqen e qëndrueshme./CGTN
