Në një intervistë për televizionin rus VGTRK më 14 gusht 2026, ministri i Jashtëm rus Sergei Lavrov u ndal te zhvillimet në Ukrainë, marrëdhëniet me Japoninë, Gjermaninë dhe Serbinë, si dhe te perspektiva e një raundi të ri bisedimesh me Shtetet e Bashkuara.
Në deklaratat e tij, Lavrov përcolli një mesazh të qartë: Moska nuk është e gatshme të pranojë një ndalim të thjeshtë të luftimeve përgjatë vijës aktuale të kontaktit, por kërkon një marrëveshje që, sipas saj, të jetë afatgjatë, e besueshme dhe e qëndrueshme.
Përplasja me Kievin: “Nuk do të ndalemi vetëm në vijën e kontaktit”
Duke folur për sulmet që Moska i atribuon Ukrainës, Lavrov akuzoi Kievin se feston publikisht sulmet ndaj objektivave që ai i përshkroi si civile. Ai tha se Rusia nuk do të përgjigjet me të njëjtat metoda, por paralajmëroi se do t’i ashpërsojë goditjet ndaj infrastrukturës dhe kapaciteteve që, sipas tij, furnizojnë makinerinë ushtarake ukrainase nga Perëndimi.
Lavrov pretendoi se pasojat e këtyre veprimeve kanë filluar të ndihen dhe se, për këtë arsye, po shtohen zërat që kërkojnë një ndalim të menjëhershëm të luftimeve.
Por, sipas tij, një armëpushim i thjeshtë nuk është i mjaftueshëm.
“Duhet të ndalojmë vetëm kur të arrihet një marrëveshje afatgjatë, e besueshme dhe e qëndrueshme”, tha ai, duke e paraqitur pozicionin rus si një kërkesë për një zgjidhje përfundimtare dhe jo vetëm për një pauzë në luftime.
Lavrov e lidhi këtë qëndrim edhe me narrativën historike të Rusisë mbi Luftën e Dytë Botërore. Ai argumentoi se një ndalim i menjëhershëm në vijën aktuale të kontaktit do të nënkuptonte, sipas tij, lejimin e asaj që ai e përshkroi si “zhvlerësim” të sakrificës së brezave rusë që luftuan kundër nazizmit.
Kështu, lufta paraqitet nga Moska jo vetëm si një konflikt i sotëm gjeopolitik, por edhe si pjesë e një narrative më të gjerë mbi historinë, sigurinë dhe identitetin shtetëror rus.
Lavrov dhe paralajmërimi për Gjermaninë
Një pjesë e rëndësishme e intervistës iu kushtua edhe Gjermanisë.
Lavrov kritikoi kancelarin gjerman Friedrich Merz për deklaratat mbi nevojën që Gjermania të bëhet sërish fuqia kryesore ushtarake në Europë.
Ai e veçoi veçanërisht fjalën “sërish”, duke e lidhur atë me historinë ushtarake të Gjermanisë dhe me rolin e saj gjatë Luftës së Dytë Botërore.
Sipas Lavrovit, rritja e kapaciteteve ushtarake gjermane duhet parë në një kontekst historik shumë më të gjerë. Ai e lidhi këtë çështje edhe me një episod të konferencës së përbashkët për shtyp mes presidentit ukrainas Volodymyr Zelensky dhe presidentit serb Aleksandar Vuçiç, duke vënë në dukje se Vuçiç, sipas tij, nuk dha një reagim të qartë ndaj kësaj çështjeje.
Lavrov theksoi veçanërisht kontributin historik të Serbisë dhe popujve të ish-Jugosllavisë në luftën kundër nazizmit.
A do të rikthehen Witkoff dhe Kushner në Moskë?
Në pjesën tjetër të intervistës, Lavrov foli për mundësinë e një vizite të re në Moskë të të dërguarit amerikan Steve Witkoff dhe Jared Kushner.
Ai tha se nëse Witkoff dhe Kushner do të vijnë në Moskë, ata e dinë se presidenti rus Vladimir Putin është i gatshëm t’i presë përsëri.
Por Lavrov ngriti një pyetje mbi atë se çfarë do të sjellin me vete.
Sipas tij, vizita e mëparshme e Witkoffit kishte sjellë propozime nga presidenti amerikan Donald Trump, të cilat, sipas Lavrovit, Putin i kishte shqyrtuar dhe pranuar në formën në të cilën ishin paraqitur.
Lavrov më pas përmendi vendosjen e sanksioneve amerikane ndaj kompanive ruse të naftës Lukoil dhe Rosneft, duke e paraqitur këtë si një zhvillim që binte në kundërshtim me pritshmëritë ruse pas kontakteve diplomatike.
Ai kritikoi gjithashtu udhëheqësit e Bashkimit Europian dhe NATO-s, si dhe presidentin ukrainas Zelensky, duke i akuzuar se kishin ushtruar presion ndaj Trumpit për të penguar nismat e tij diplomatike.
Kontradiktat amerikane sipas Moskës
Lavrov u ndal veçanërisht te deklaratat e sekretarit amerikan të Shtetit, Marco Rubio.
Sipas versionit të paraqitur nga Lavrov, Rubio fillimisht kishte sugjeruar se Shtetet e Bashkuara mund të mos ishin në gjendje të luanin rolin e ndërmjetësit për shkak të mbështetjes së tyre ndaj Ukrainës.
Më vonë, sipas Lavrovit, Rubio deklaroi se vetëm Trumpi mund të sillte Rusinë dhe Ukrainën në tryezën e bisedimeve dhe të gjente një zgjidhje.
Për Moskën, kjo tregon një kontradiktë në politikën amerikane: nga njëra anë Uashingtoni pretendon se kërkon një zgjidhje diplomatike, ndërsa nga ana tjetër vazhdon të mbështesë Ukrainën me armë dhe inteligjencë.
Japonia: një “takim” që nuk ishte takim
Lavrov foli me ironi edhe për një deklaratë të ministrit të Jashtëm japonez pas takimeve të ASEAN-it në Filipine.
Sipas tij, ministri japonez kishte deklaruar se kishte diskutuar me Lavrovin çështje dypalëshe dhe situatën rajonale.
Lavrov dha një version krejt tjetër të episodit.
Sipas tij, gjatë një banketi formal, ku ministrat ishin ulur në një tryezë të gjatë, kolegu japonez iu afrua nga pas, e përshëndeti dhe i shtrëngoi dorën, duke u kthyer më pas në vendin e tij.
Me ironi, Lavrov tha se ky episod duket se ishte interpretuar si një “diskutim i çështjeve dypalëshe dhe rajonale”.
______________________________
Lexoni intervistën e plotë:
https://mid.ru/ru/foreign_policy/news/2133003
© 2026 Argumentum
