Shumica e qytetarëve të BE-së janë kundër zgjerimit, vetoja franceze ishte pasojë e mungesës së progresit, vendet kandidate nuk mund të avancojnë të vetme.
Këto janë disa nga dhjetë mitet që anëtarët e Grupit Këshillimor të Politikave të Ballkanit në Europë (BiEPAG) përpiqen të rrëzojnë në dokumentin e tyre non-paper mbi zgjerimin e BE-së.
Miti i parë me të cilin merret ky dokument është ai se vetoja mbi çeljen e negociatave të anëtarësimit të Maqedonisë së Veriut dhe Shqipërinë është pasojë e mungesës së përparimit të këtyre vendeve.
Në fakt, kundërshtimet e presidentit francez Macron, theksohet aty, janë rezultat i rezervave të forta në lidhje me pranimet e mëparshme, një skepticizmi të zgjatur ndaj zgjerimit që vihet re mes elitës franceze dhe shqetësimeve mbi rolin në rënie të BE-së.
Studiuesit e BiEPAG-ut shkruajnë se procesi i zgjerimit ka qenë në krizë për vite me radhë, e thonë se ai është aktualisht në “pilot automatik” me një angazhim të limituar nga shtetet anëtare.
Për rrjedhojë, “vendet e Ballkanit Perëndimor hiqen sikur po kryejnë reforma dhe Bashkimi Europian e anëtarët e tij hiqen sikur janë të kënaqur me përparimin e kufizuar në rajon”, thuhet në dokument, ku sqarohet se pavarësisht negociatave disa vjeçare me Malin e Zi dhe Serbinë, rezultatet kanë qenë minimale.
Sipas non-paper-it, procesi i pranimit në BE shpesh perceptohet si shumë burokratik.
Një nga “mitet” e diskutuara aty është ai se qytetarët e BE-së janë kundër zgjerimit.
Autorët argumentojnë se mbështetja për BE-në dhe institucionet e saj është në nivel rekord, 46% pro dhe 42% kundër.
“Fakti që disa nga mbështetësit më të mëdhenj të zgjerimit, si Austria, Gjermania dhe kritikët më të mëdhenj të saj, si Franca dhe Holanda kanë një popullsi skeptike në të njëjtën masë. Kjo nuk tregon se angazhimi strategjik i elitave për zgjerimin është rezultat i mendimit popullor , por përkundrazi se skepticizmi mes votuesve po përdoret si justifikim”, thekson dokumenti.
Dokumenti: https://biepag.eu/wp-content/uploads/2019/12/BiEpagBrosura.pdf
