Shtetet e Bashkuara ndërmorën një goditje të fortë që mund të ketë pasoja të rrezikshme, duke vrarë udhëheqësin e forcave elite Quds të Iranit. Gjenerali Qassem Soleimani u vra gjatë një sulmi ajror ndërsa ndodhej në aeroportin e Bagdatit në Irak. Pentagoni e konfirmoi vrasjen e tij duke thënë se sulmi u mor “me udhëzimin e Presidentit Trump”. Zyrtarët ushtarakë amerikanë thanë se sulmi ishte “një veprim i fuqishëm në mbrojtje të personelit amerikan jashtë vendit”. Sekretari i Shtetit Mike Pompeo pohoi të premten se vrasja e tij u bë për të shmangur një sulm “të menjëhershëm” të orkestruar prej tij kundër interesave amerikane.
Pas kësaj ngjarje ,Lideri suprem i Iranit, Ayatollah Ali Khamenei ka thënë se “hakmarrje e ashpër i pret kriminelët”, mbrapa këtij sulmi.
Por I menjehershem ka qene reagimi i Presidentit amerikan Donald Trump i cili u përgjigj ne Twiter se “Irani kurrë nuk fitoi një luftë, por kurrë nuk humbi një negociatë!”
Rusia: “Ky veprim mund të përkeqësojë seriozisht situatën në rajon,”
“Ky veprim mund të përkeqësojë seriozisht situatën në rajon,” tha Presidenti rus Vladimir Putin, sipas Kremlinit pas një bisede telefonike me homologun francez Macron.
Rusia e dënoi vrasjen duke e quajtur atë “një hap të papërgjegjshëm”, që rrezikon “paqen dhe stabilitetin në rajon”. Ministria e Jashtme ruse, u shpreh përmes një deklarate se kjo vrasje do të rrisë tensionet në rajon.
“Ky hap nga Uashingtoni mund të ketë pasoja të rënda për paqen dhe stabilitetin në rajon. Në pikëpamjen tonë, veprime si këto nuk ndihmojnë në arritjen e një zgjidhjeje për një problem të ndërlikuar që është akumuluar në Lindje të Mesme. Përkundrazi veprime si këto çojnë në rritje të tensioneve në rajon”, është shkruar sot në faqen zyrtare të Ministrisë së Jashtme ruse.
Franca: “Po, zgjohemi në një botë më të rrezikshme.
Përshkallëzimi ushtarak gjithmonë është i rrezikshëm. Është i rrezikshëm në çdo vend, në çdo territor, prandaj Franca angazhohet vazhdimisht për kushte stabiliteti dhe kështu do të vazhdojmë”, tha Amelie de Montchalin nga Ministria e Jashtme franceze.
Ndersa vete presidenti francez Presidenti francez Emmanuel Macron bëri jehonë thirrjes të OKB-së për qetësi në këtë kohë të tensionuar
Izraeli: “Ashtu si Izraeli ka të drejtën e vetëmbrojtjes, Shtetet e Bashkuara kanë pikërisht të njëjtën të drejtë.
Kryeministri izraelit Benjamin Netanyahu ka përshëndetur sulmin e fundit të kryer nga ana e ushtrisë amerikane që vrau Gjeneral Soleimani, duke thënë se Presidenti Donald Trump “meriton të gjithë mbështetjen që veproi me shpejtësi, forcë dhe vendosmëri. Izraeli qëndron përkrah Shteteve të Bashkuara në luftën e tij të drejtë për paqen, sigurinë dhe vetëmbrojtjen”, tha ai.
Netanyahu gjithashtu tha se SH.B.A. kishte të drejtë të mbrohej. “Qassem Soleimani është përgjegjës për vdekjen e qytetarëve amerikanë dhe shumë njerëzve të tjerë të pafajshëm. Ai po planifikonte më shumë sulme të tilla”
Turqia: Sulmi amerikan do të dëmtojë paqen dhe stabilitetin
Ministri i Jashtëm i Turqisë ka dënuar sulmin ajror amerikan në Irak, që vrau Gjeneralin e Gardës Revolucionare të Iranit, Qassem Soleimani dhe Abu Mahdi al-Muhandis, shefin e milicisë së Iranit.
Sipas ministrit Mevlut Cavusoglu, ky akt do të “rrisë pasigurinë dhe destabilitetin e rajonit”.
“Ne nënvizojmë paralajmërimin se kthimi i Irakut në zonë konflikti do të dëmtojë paqen dhe stabilitetin”, lexohet në një komunikatë të publikuar në agjencinë shtetërore të lajmeve turke.
Tensionet mes SHBA-së dhe Turqisë ishin në rritje edhe përpara kësaj ngjarjeje. Muajin e kaluar, bisedimet në samitin e NATO-s në Londër për pak sa nuk ngecën pasi pati mosmarrëveshje mbi veprimet ushtarake turke në veri të Sirisë.
Gjermania
Ministri i Jashtëm gjerman Heiko Maas foli për bisedën e tij me homologun e tij amerikan Pompeo: “Operacioni ushtarak amerikan pasoi një seri provokimesh të rrezikshme nga Irani. Megjithatë, ky veprim nuk e ka bërë më të lehtë për të zvogëluar tensionet. Unë e bëra këtë pikë të qartë për sekretarin Pompeo gjithashtu.””Pershkallëzimi i mëtejshëm, i cili mund të vërë zjarrin tërë rajonin, duhet të parandalohet,” shtoi Maas.
OKB
Shefi i Kombeve të Bashkuara Antonio Guterres tha përmes zëdhënësit të tij se ai është “thellësisht i shqetësuar nga përshkallëzimi i fundit në Gjirin”, dhe se “bota nuk mund të lejojë një luftë tjetër” në rajon, duke u kërkuar udhëheqësve të “ushtrojnë kufizim maksimal”.
© Argumentum
