“Me programin e Rindërtimit Laçi dhe Thumana do të marrin një përmasë të re, që do të krijojë mundësi për zhvillim ekonomik”, deklaroi sot kryeministri Edi Rama, në konferencën për prezantimin e projekteve të rindërtimit.
Rama tha se “ne duam ta shfrytëzojmë këtë krizë si një mundësi për të rindërtuar me standarde të tjera dhe për t’i dhënë njerëzve të pamundur mundësinë që të kenë shtëpi që nuk do t’i ndërtonin dot kurrë me forcat e tyre”.
Po ashtu, programi i Rindërtimit do t’u japë zonave të prekura një dimension të ri social dhe ekonomik”.
“Thumana ka një liqen dhe natyrë të mrekullueshme dhe nga një ferrë urbane që u prek rëndë nga tërmeti do të kthehet në një pikë që të jetojë me turizëm ditor, si Belshi”, tha Rama.
Kryeministri shtoi se edhe “Laçi, që për shumë vite ishte kryeqyteti i bingove dhe bixhozit dhe ka 3 milionë turistë në vit që shkojnë në zonën e shenjtë, me këtë zhvillim do të marri një përmasë të re”. “Njerëz nga Shqipëria dhe trojet shqiptare, të cilët vijnë me makinë shkojnë dhe bëjnë një parkim asfiksues atje, kryejnë ritualet dhe ikin prapë, nuk ndalon njeri në Laç. Nuk është thjesht rindërtimi i godinave të dëmtuara dhe të shembura ku do të ndërhyjë Enti Kombëtar i Banesave të Turqisë, por janë edhe rruga e spitali ku do ndërhyjmë ne, janë projektet e infrastrukturës dhe i transformimit të zonës që shkon për te kisha në hapësirë turistike”, tha Rama.
Këto, sipas tij, “do të krijojnë një mundësi ekonomike për qytetin, ndërsa ata që qëndrojnë një ditë apo një fundjavë do të kenë struktura shërbimi dhe e gjitha kjo vë në lëvizje një ekonomi”.
Rama solli si shembull edhe Durrësin, ku pas dëmtimit të murit të kalasë, nuk po bëhet vetëm riparimi i murit, por ka filluar projekti për Amfiteatrin dhe për ta çuar në nivel tjetër, duke prishur një sërë godinash.
