Pa Turqinë, aleanca nuk do të kishte mbijetuar”, tha për Anadolu Agency (AA) Miguel Moratinos, ish-ministër i jashtëm dhe përfaqësues i lartë i Aleancës së Qytetërimeve të OKB-së
Diplomati i lartë spanjoll, Miguel Moratinos, vlerësoi bashkë-sponsorizimin e Aleancës së Qytetërimeve, iniciativë për të ndërtuar respekt në mesin e njerëzve nga kultura dhe besime të ndryshme.
“Pa Turqinë, aleanca nuk do të kishte mbijetuar”, tha për Anadolu Agency (AA) Miguel Moratinos, ish-ministër i jashtëm dhe përfaqësues i lartë i Aleancës së Qytetërimeve të OKB-së.
“Turqia ka qenë një partner i angazhuar për të ruajtur aktivitetin dhe punën e aleancës”, shtoi ai.
“Nuk janë vetëm kontributet financiare, kontributet politike dhe diplomatike që janë thelbësore për ne. Kam marrë mbështetje të plotë nga qeveria e Turqisë”, tha Moratinos.
Moratinosi gjendet në ditën e fundit të një vizite dyditore në Turqi me ftesë të ministrit të Jashtëm turk Mevlüt Çavuşoğlu.
Të dy diplomatët kishin një takim me dyer të mbyllura në kryeqytetin turk Ankara të hënën.
Aleanca e Qytetërimeve është një iniciativë politike e bashkëfinancuar nga Turqia dhe Spanja pasi u themelua në vitin 2005 nga ish-sekretari i përgjithshëm i OKB-së Kofi Annan.
Moratinos u bë përfaqësuesi i lartë i iniciativës në janar.
Parandalimi dhe zgjidhja e konflikteve
“Duhet të vlerësoj presidentin e Turqisë (Recep Tayyip Erdoğan), sepse gjatë vitit të fundit ai ka qenë i vetmi, madje edhe në rrethana të vështira, që ka këmbëngulur në ruajtjen e aleancës”, theksoi ai.
“Tani ka filluar një kapitull i ri dhe natyrisht që kam marrë parasysh pikëpamjet e Turqisë”, shtoi ai.
Moratinos tha se plani i tij është ta bëjë aleancën më “të orientuar drejt rezultateve dhe më konkrete”.
“Përgjegjësia ime është të punoj në dy elemente kryesore. Njëri është të punoj në diplomacinë parandaluese dhe e dyta në zgjidhjen e konflikteve”, shtoi ai.
“Nëse ka një krizë nga e cila ndikohet, e krijuar nga keqkuptimi i fesë dhe qytetërimit kulturor, ne mund të kontribuojmë për një zgjidhje pozitive”, tha më tej Moratinos.
“Lidhur me parandalimin, ne duhet të ndryshojmë shoqërinë tonë. Duhet të punojmë në pesë fusha: arsimi, të rinjtë, gratë, migracioni dhe mediat”, theksoi ai.
Duke përmendur Forumin e fundit Global të Aleancës së Qytetërimeve në New York nëntorin e kaluar, Moratinos tha se tashmë kanë filluar të punojnë për forumin e nëntë global.
Ai tha se megjithëse nuk ka ende vendim përfundimtar, forumi i ardhshëm do të mbahet në Afrikë.
