Pak çaste pasi janë vendosur mbishkrimet me emrin e ri të shtetit Republika e Maqedonisë së Veriut, të njëjtat janë shkarravitur deri më tani nga aktivistë të panjohur për organet e rendit, informon MEDIAL.MK
Shumë qytetarë përmes rrjeteve sociale kanë publikuar se në disa lokacione të vendit gjatë orëve të mbrëmjes është shkarravitur pjesa ku shkruhet “e Veriut”.
Pas disa rasteve me shkarravitjen e mbishkrimeve të reja të cilat u paraqitën deri tek Ministria e Brendshme, kjo e fundit thotë se tashmë po mendon për krijimin e një plani operativ për mbrojtjen e këtyre tabelave, në veçanti të atyre që janë të vendosura në vendkalimet kufitare me Greqinë.
Me një sprej të zi është fshirë fjala “E Veriut” dhe është shkruar “Asnjëherë e Veriut”! Qytetarët kanë komentuar se nuk miratojnë ndërrimin e emrit, dhe se revolta do të rritet pas çdo tabele të vendosur ku shkruan Republika e Maqedonisë së Veriut.
Pas marrjes së Notës verbale me të cilën Athina sot do ta informojë Shkupin se janë ratifikuar Marrëveshja e Prespës dhe protokolli për anëtarësim në NATO, dhe përmbushja e të gjitha kushteve juridike për hyrjen në fuqi të marrëveshjes përfundimtare dhe amendamentet kushtetuese, fillon zbatimi i emrit të ri Republika e Maqedonisë së Veriut.
Në Gazetën Zyrtare do të publikohet data e hyrjes së fuqi të amendamenteve kushtetuese dhe ligjit kushtetues.
Pastaj, siç paralajmëroi MPJ, Republika e Maqedonisë së Veriut dhe Republika e Greqisë do të dorëzojnë letër të përbashkët deri te sekretari i përgjithshëm i OKB-së Antonio Guteresh për datën e hyrjes në fuqi të marrëveshjes përfundimtare, me çfarë i jepet fund kontestit dypalësh shumëvjeçar midis të dyja vendeve.
Pastaj për ndryshimin e emrit do të informohen edhe Sekretariati i OKB-së, vendet anëtare, vendet vëzhguese të OKB-së, si dhe të gjitha organizatat e tjera ndërkombëtare.
